Hibru 10 - Aria New Testament

Ongwa inarak marau karanga kli udo elio epmes ina kovok

¹ Moses ila sogongon nisngen vala ke wan itau ka mase ma polou e iye wan itau tonari kovok. Aurou. Iye nisngen vala. Langka osep tididi Moses ila sogongon deka tidue elio opmu ina ke tobor aling aling. E ke batne langane Moses ila sogongon karanga due osep ka kla ke Ida Tapolngon ila ninu tidong itau ke Ida Tapolngon bitna kovok.

² Langka Moses ila sogongon karanga due osep tidong itau ke Ida Tapolngon bitna deka ina lange tidue elio opmu ina aling aling? Kesua langka langane elio ka osep kla ke Ida Tapolngon ila ninu ma tidue elio opmu ina aling aling polou yagos kodong. E osep aitno lisak mter ke urok elio epmes ina kovok e tinamani ine kovok.

³ E aurou. Elio opmu ina tonari ka osep tidue ke tobor aling aling sruk aitno lisak ma aling aling aitno lisak mter ke urok elio epmes ina.

⁴ Kesua Ida Tapolngon karanga klok osep urok elio epmes ina batne ke bulmakau bole koke meme inarak marau kovok.

⁵ Alo ka Krais me ke taklak iye wai ke Ida Tapolngon langane. “Amwaiki osep tidue elio opmu ina koke tipaur wan bitna bitna ke wom kovok. Aurou. E emkere pampamu lungong vala ma ngadong ine.

⁶ E aitno lugom itau ke elio ka osep tikamlu ongwa okurne e tipaure ke wom koke tipaur wan ka tiwaiki timosi urok elio epmes ina ine kovok.

⁷ Deka ngawai ke wom langane. Ngadong ane e ngame ma ngadue elio ka amwaiki ngadue. Eriar langka oglou osep napaprangan ina tisogoe.”

⁸ Mgo iye wai ke elio bitna bitna ka Moses ila sogongon wai ine. Iye wai langane. “Amwaiki osep tidue elio opmu ina koke tipaur wan bitna bitna ke wom kovok. E aitno lugom itau ke elio ka osep tikamlu ongwa okurne e tipaure ke wom koke tipaur wan ka tiwaiki timosi urok elio epmes ina ine kovok.”

⁹ Mase iye wai ke Ida Tapolngon langane. “Ngadong ane e ngame ma ngadue elio ka amwaiki ngadue.” Iye wai langane kesua iye due Ida Tapolngon ila kontrak oglou ina yagos e due kontrak oku ina polou e kasip amune.

¹⁰ Yesus Krais didi Ida Tapolngon aitno deka pli tarna e mete langka iye wan ka osep tidue elio opmu ina ine. Iye due langane aling kene vala e Ida Tapolngon klok udo elio epmes ina la deka itopolou Ida Tapolngon ila osep batne ke iye.

¹¹ Osep loulou ina ka isak osep Israel ina tidue urok bokongon oklou aling aling. Aling aling tidue elio opmu ina e elio tonari karanga klok osep urok elio epmes ina kovok.

¹² E udo gute loulou ina ka Krais me deka mete aling kene vala e klok udo elio epmes ina dong vala dong. Iye mete deka bauluk tito ke omur heven e dong ke Ida Tapolngon limla odung.

¹³ E iye dong para ke alo ka Ida Tapolngon due ina oul keniye tidong moli ke kevep.

¹⁴ Iye pli tarna e mete aling kene vala e due osep tipolou Ida Tapolngon ila osep ine. E iye due isak tipolou itau lokono dong vala dong.

¹⁵ E Ano Itau wai ine blang langane.

¹⁶ “Ngong Upu Puda e ngawai langane. Mase ma ngawai lou kontrak oku ina ke isak langane. Ma ngadue lou pelengon sep ke aitno lisak e ngasogoe sep ke bara lisak.”

¹⁷ Deka iye wai langane blang. “Ma omtongu uli ke urok elio epmes ina e ke urok elio soulu ka tidue.”

¹⁸ Deka alo ka Ida Tapolngon klok osep urok elio epmes ina osep ma tidue elio opmu ina aling silang blang kovok.

Itopolou olwo boto ke Ida Tapolngon

¹⁹ Sipmi. Ngawai ke umu langane. Yesus ina marau kli udo elio epmes ina kodong. Deka ita-karanga itesep ke Ida Tapolngon ila ninu molo ina ila Eliang Ka Itau Lokono.

²⁰ Itakaranga itesep ke eliang tonari ke elio oku ina ka ina mosongon dong ine. Oglou molo ka botom mana ke Eliang Ka Itau Lokono bitna. Molo tonari nisngen ke Yesus pampamu ine. Yesus ina metengen ekreng ma itesep ke Eliang Ka Itau Lokono.

²¹ Udo gute loulou ina ka mgo dong e plau Ida Tapolngon ila ninu ka dong ke omur heven.

²² E iye ris aitno lite ke ina marau ma elio soulu vri ke ite kovok. Ane langka iye ris pampamu lite ke aki ka wan sasi dong ine kovok. Deka aitno lite kene ke Ida Tapolngon e aitno lite ila dagar dong dagar e itopolou olwo boto ke Ida Tapolngon.

²³ E itapalongo osep ke aitno lite ila dagar e ke wan itau lokono ka itapara ine. Deka itekis dagar ine e aitno lite orwo ine kovok. Kesua iteile Ida Tapolngon didi ila pelengon keniye ka iye wai ine kodong.

²⁴ E ma aitno lite mter ke elio ka ma itakaranga itosruk aitno lite ma ite lana ite pulu e itodue elio itau pulu.

²⁵ E aling aling itoduni pulu e itosongon elio tonari langka osep leklou tidue kovok. Iteile oklou ka Ida Puda ma iding me isuk boto polou deka itoboko engil ma itodue osep aitno lisak ila dagar dong dagar.

Ma itopul dogur ke Ida Tapolngon Otno Arang kovok

²⁶ Umoklingen. Langka osep tile ke Ida Tapolngon ila pelengon ka lokono kodong e dau aling aling tidue elio epmes ina deka elio epmes ina ina klingen silang blang dong ka karanga lua isak ke urok elio epmes ina kovok. Aurou.

²⁷ Langka osep tidue langane deka ma tilim omba kesua Ida Tapolngon ma wade isak ine. E Ida Tapolngon ila eiou ma ngen ina oul keniye.

²⁸ Ke oglou langka gute dar Moses ila sogongon e osep orwo eklu langane tivati iye due elio tonari deka osep aitno lisak due iye kovok e timluk iye ma iye mete ine.

²⁹ Langka elio tonari dong deka aitno lumu lange ke gute ka pul dogur ke Ida Tapolngon Otno Arang? Ma Ida Tapolngon due elio lange ke iye? Ida Tapolngon ma due agegeng omba ke iye kesua ane langka gute tonari aitno mter Krais ina marau wan adai vala. E Krais ina marau batne ke Ida Tapolngon ila kontrak oku ina ka due osep tidong itau ke Ida Tapolngon bitna. E iye wai soulu ke Ano Itau ka makai iye.

³⁰ Iteile Ida Tapolngon kodong. E iye wai langane. “Ngong ma ngakoli batne ke osep ka tidue elio soulu. Ane lou bokongon.” E Ida Tapolngon wai blang lang-ane. “Ma Inarak Puda wade ila osep.”

³¹ Deka iteile omur langane. Osep ka Ida Tapolngon ka dong vala dong ules isak ma tinakarkar e tilim omba ke iye.

Ma itekis dagar ke aitno lite ila dagar

³² Aitno lumu mter ke oglou alo ka umoklingen Ida Tapolngon ila omon itau aling kene ina. Alo ari osep tidue agegeng omba ke umu e dau aitno lumu segesege kovok e umodong dagar ine.

³³ Alo ari aling leklou osep tiwai apok ke umu e tidue agegeng ke umu ke osep pula amtarsak. E aling leklou osep tidue langane ke osep leklou e umevri kap isak.

³⁴ E alo ka osep tidue lumu saten tisep ke kalabus deka aitno lumu langka umodong ke kalabus kap isak. E alo ka osep tipi lumu wan deka aitno lumu epen ine kesua umeile lumu wan ka mole wan tonari dong para ke umu ke omur heven.

³⁵ E eknikane aitno lumu dong dagar langka oglou iye dong dagar. E ma Ida Tapolngon kar ila kerengen ka itau lokono ke umu.

³⁶ Ma umodong dagar e umedidi Ida Tapolngon aitno ke wan bitna bitna ka iye waiki umodue. Umodue langane deka Ida Tapolngon ma kar umu wan bitna bitna ka iye wai dagar ine kodong.

³⁷ Oglou osep tisogo Ida Tapolngon pelengon ka wai langane. “Isuk boto ma gute me langka oglou iye wai ke osep ine. Iye me e suvu kovok.

³⁸ E lou osep ka tididi aitno lungong ma aitno lisak ila dagar due isak tidong itau. E langka tipul dogur ke ngong deka aitno lungong itau ke isak kovok.”

³⁹ E ite langka osep ka tipul dogur ke Ida Tapolngon e timina kovok. Aurou. Aitno lite dagar ke Ida Tapolngon e iye lua ite ke udo elio epmes ina.