Hibru 1 - Aria New Testament

Ida Tapolngon Otno Arang kar pelengon ke ite

¹ Ke oglou Ida Tapolngon due osep napaprangan ina tiwai ila pelengon ke udo seia. Iye due langane aling pula e ke elio bitna bitna pula.

² E oku ane alo ka isuk boto wan ka pula keniye yagos iye wai ke ite ke Otno Arang. Ke Otno Arang tonari Ida Tapolngon due wan ka pula keniye e iye rere Otno Arang ma iye wan ka pula keniye inarak gute.

³ E Otno Arang nis ite ke Ida Tapolngon ila elio ka itau lokono e iye eriar langka Ida Tapolngon. E ila arit due wan ka pula keniye tiboko itau e tidong itau. Iye duru ke taklak e mete kodong deka ina marau kli osep urok elio epmes ina. Iye due langane yagos deka iye bauluk tito ke omur heven e dong ke Ida Tapolngon ka ila arit ombatno lokono limla odung.

Ida Tapolngon Otno Arang mole ensel ka pula keniye

⁴ E iteile omur langane. Otno Arang mole ensel ka pula keniye eriar langka Ida Tapolngon kar iye angaine ka mole ensel ka pula keniye angainsak blang.

⁵ Ke oglou Ida Tapolngon wai ke Otno Arang langane. “Wom Erigu Arang e ngong Ngap Abo.” E iye wai blang langane. “Ma ngadong Timla e iye dong Erigu Arang.” E Ida Tapolngon wai langane ke ila ensel gesa koke aurou? Aurou lokono.

⁶ E silang blang alo ka Ida Tapolngon pagei ina sirngen duru ke taklak iye wai langane. “Ma lou ensel ka pula keniye tilotuim iye.”

⁷ E Ida Tapolngon wai blang lang-ane. “Ngadue lou ensel ma isak langka engen e silang blang osep ka tidue lou bokongon isak langka eiou ila bublongon.”

⁸ E Ida Tapolngon wai ke Otno Arang langane. “Wom Tapolngon e wom emvri mgo e amplau osep dong vala dong. E emdidi elio itau vala e amplau lem osep.

⁹ Aitno lugom itau ke elio itau ka osep tidue e aitno lugom engil ke elio soulu ka osep tidue. E ke batne langane ngarere wom ma ommole supmu keniye deka aitno lugom neser ine.”

¹⁰ E Ida Tapolngon wai blang langane. “Puda oglou alo ka wan gesa dong kovok amtapol taklak keniye deka amtapol omur ka egim keniye blang.

¹¹ Mase taklak e omur ka egim ma tipolou yagos e wom omdong vala. Ma tipolou oglou ina langka molo polou oglou ina.

¹² Ma omgrum isak langka gute grum molo oglou ina e omdue isak tipolou oku ina langka gute klok molo oglou ina e tnei molo oku ina. E omdong vala e amkaranga emsegesege kovok. E silang blang ma omdong vala omdong.”

¹³ Oglou Ida Tapolngon wai ke Otno Arang langane. “Omdong ke lungu odung la lama ngadue ngap oul keniye tidong moli ke kevep.” Ida Tapolngon wai langane ke Otno Arang vala e iye wai ke ila ensel gesa langane kovok.

¹⁴ E langane. Ida Tapolngon ila ensel isak ansak ka tidue ila bokongon. Iye pagei isak ma tilua osep ka Ida Tapolngon waiki lua isak ke urok elio epmes ina.