Galesia 6 - Aria New Testament

Ma itodue elio itau ke sudo

¹ Sipmi. Ngawaiki umeile lang-ane. Langka lumu aten gesa due elio epmes ina deka umu ka umedidi Ano Itau umodue elio itau ke iye e umolua iye ma iye mosi ila elio epmes ina. E umaplau umu itau lama Satan tok umu deka umu blang umegene ke elio epmes ina.

² E umolua supmu leklou ke elio ka polou ka opru ka isak. Langka umodue elio langane ma umeini e umedidi Krais ila elio.

³ Langka gute gesa aitno mter langka angaine omba e dau angaine omba kovok deka gute tonari yak iye tona vala.

⁴ Osep ka pula keniye ma isak kensak kensak tiwade urok bokongon langka bokongon itau koke soulu. Gute ka due langane ma aitno itau ke iye tona ila elio e iye ma wade ila elio kap osep leklou urok elio kovok.

⁵ E silang blang osep ka pula keniye ma isak kensak kensak aitno lisak mter ke urok bokongon e urok elio ka tidue.

⁶ Gute ka klingen Ida Tapol-ngon ila pelengon ma iye tuk ila wan leklou e kare ke gute ka parere iye ke Ida Tapolngon ila pelengon.

⁷ Langka umayak umu tona e langka aitno lumu mter langka umakaranga umayak Ida Tapolngon are itau kovok. Umakaranga umayak Ida Tapolngon kovok. Ma ngawai pelengon ano langane. Umousak wansua londo ke lumu yage deka wan ka langare vala ma polou.

⁸ E lana ine langane. Langka gute gesa usak wan ke aitno oglou ina ma aitno oglou ina due elio soulu polou ke iye tona aitno e ma due agegeng ke aitno. E langka iye usak wan ke Ano Itau ma Ano Itau due elio itau polou ke aitno e iye ma dong vala dong.

⁹ Deka ite ma itodue elio itau e tarna lite meingen ine kovok. Langka itoboko engil deka alo ka ngangon anino ma itodue ngangon itau lokono.

¹⁰ E alo ka itakaranga itodue elio itau ke osep leklou ma itodue. Itodue elio itau ke osep ka pula keniye e wan ka itau lokono itodue elio itau ke Ida Tapolngon ila osep.

Pol babrum ila pelengon

¹¹ Umavati pelengon ka ngong tona ngasogoe ane. Umavati leta omba ka ngasogoe.

¹² Umoklingen. Osep ka isak arit isak lokono ka tidue elio ulangngan ina ke umu tidue langane kesua tiwaiki tikakai angainsak ke osep leklou amtarsak. E tidue langane kesua tiwaiki osep leklou tile langane kovok. Aitno lisak dagar ke Krais ka mete ke ina akai. E tiwaiki osep tidue agegeng ke isak ine kovok.

¹³ Osep ka tididi elio ulangngan ina kodong isak tona tididi Moses ila sogongon itau kovok. E tiwaiki tidue elio ulangngan ina ke umu ma angainsak omba ke elio ka tiulang otne lumu.

¹⁴ Ngong tona ngakaranga ngakakai angain ngong kovok. Aurou. Ngakakai Ida Puda Yesus Krais angaine vala. Iye mete ke ina akai e aitno lungong itau ke elio langane. E elio ka taklak ane ina iye mete ke aitno lungong kodong batne ke bokongon ka Krais due ke ina akai. E langka ngong tona ngamete kap Krais ke ina akai deka ngakaranga ngadidi elio ka taklak ane ina kovok.

¹⁵ Elio ulangngan ina iye wan adai e elio ka gute gesa ulang merge kovok iye blang wan adai. Ida Tapolngon due ite itopolou oku ina e elio ane iye wan omba lokono.

¹⁶ Ida Tapolngon aitno due osep ka tididi elio langane e iye due aitno lisak tidong epen. Isak Ida Tapolngon ila osep ka osep Israel ina lokono.

¹⁷ Ngawaiki ma gute gesa kar ngong elio ka opru ngong kovok. Aurou. Osep timluk ngong kodong deka tarna lungong amal amal kodong. Deka amal tonari nisngen langka ngong Yesus ila gute bokongon ina lokono.

¹⁸ Sipmi. Ngawaiki ma Ida Puda Yesus Krais ila makaingan dong kap umu ka pula keniye. Lokono.