Galesia 5 - Aria New Testament

Krais lua ite e Moses ila sogongon pes ite kovok

¹ Krais due ite itopolou osep ka itodong fri deka itodong moli ke Moses ila sogongon kovok. Aurou. Deka aling aling umevri dagar ine. Ma itosongon osep tidue ite ma itopolou wokboi nating blang kovok.

² Umoklingen. Ngong Pol ngawai ke umu langane. Langka osep tidue elio ulangngan ina ke umu are langka Krais ila bokongon ma lua umu kovok. Aurou lokono.

³ Umu kenmu kenmu ka umosongon osep tidue elio ulangngan ina ke umu ngawaiki ngawai malak ke umu langane. Langka umodue elio langane ma umedidi Moses ila sogongon keniye blang.

⁴ Langka umawaiki umedidi Moses ila sogongon e umawaiki Ida Tapolngon sir umu osep itau ke ekreng langane deka umosongon Krais kodong. Umosongon Ida Tapolngon ila makaingan kodong.

⁵ Ke Ano Itau ila arit aitno lite dagar ke Ida Tapolngon e itapara ma iye sir ite osep itau.

⁶ Langka gute dong ke Krais Yesus deka elio ulangngan ina iye wan adai vala e elio ka gute due elio ulangngan ina kovok iye wan adai blang. E elio ka aitno lite ila dagar sruk ite ma ite lana ite ke osep leklou elio langane iye wan lokono.

⁷ Oglou umeile itau ke Krais ila ekreng. Deka sei dangdang umu ma umeini pelengon ka lokono kovok?

⁸ Elio tonari me ke Ida Tapolngon kovok. Iye Ida Tapolngon ka gi umu ma umopolou ila osep.

⁹ Aitno lumu mter ke pelengon ane. Yis sasi boto vala ma due bret pula polou omba.

¹⁰ Aitno lungong dagar ma Ida Puda lua umu ma aitno lumu mter eriar langka aitno lungong. E ngaile sei pagolgol aitno lumu kovok. E Ida Tapolngon ma koli batne ke elio soulu ka gute tonari due.

¹¹ Sipmi. Ngawai ke osep ke elio ulangngan ina kovok. Aurou. Langka ngawai ine dau ina lange osep tidue elio soulu ke ngong? Langka ngong dau ngawai ke osep ma tididi elio ulangngan ina deka Ida Puda ina metengen ke ina akai ma due osep aitno lisak amnga ine kovok.

¹² Osep ka tipagolgol aitno lumu isak dau arit isak ke elio ka tiulang osep otne lisak. Deka itau langka ma isak tona tiulang otne lisak e tisok lesna lisak blang.

¹³ Sipmi. Ida Tapolngon gi umu ma umodong fri. E aitno lumu mter langane kovok. Imi imodong fri e imakaranga imedidi aitno limi ke elio oglou ina. Aurou. Ma aitno lumu mter langane. Imi kenmi kenmi imodong wokboi nating ke Ida Tapolngon ila osep leklou e ma imi lana imi ke isak.

¹⁴ Pelengon ka pula keniye ke Moses ila sogongon dong sep ke pelengon kene. Pelengon tonari langane. Umu lana umu ke supmu langka umu lana umu ke umu tona.

¹⁵ E langka umu amnga umu pulu e umodue evlei pulu airavu ke umu deka ma umeile umu itau. Lama umu ka pula keniye umodue agegeng pulu.

Elio ke aitno lite oglou ina e elio ke Ano Itau

¹⁶ Lou pelengon langane. Umedidi Ano Itau ila plaungan ma iye plau umu ke lumu mosongon. Langka umodue langane ma umedidi aitno lumu oglou ina kovok.

¹⁷ Iteile aitno lite oglou ina waiki mole Ano Itau e Ano Itau waiki mole aitno lite oglou ina. Isak orwo tipara pulu e wan ka umawaiki umodue umakaranga umodue kovok.

¹⁸ E langka umedidi Ano Itau deka ma umodong moli ke Moses ila sogongon kovok.

¹⁹ Umeile kodong ke elio ka aitno lumu oglou ina. Elio tonari langane. Okwa e isungon e elio ka soulu lokono.

²⁰ E osep tilotuim sapingen e tidue muso e tidue burwa e aitno lisak engil e tidue amnga e aitno lisak soulu. E tingale gute silang ila wan e aitno lisak vri ke isak tona e orsak mluk pulu e tidardar ke osua osua.

²¹ E aitno lisak nevlik ke osep ka tidong itau e tinim aki dagar ma amtarsak balilu e tikepis ke rogo omba e elio bitna bitna langane. Oglou ngawai lumu kodong deka eknikane ngawaiki ngawai ke pelengon tonari blang. Osep ka pula keniye ka tidue elio langane ma tikaranga tisep ke omur ka Ida Tapolngon plaue kovok.

²² E Ano Itau sruk aitno lite ma itodue elio itau langane. Ite lana ite ke sudo lelkou e aitno lite neser kap sudo e aitno lite epen pulu e aitno lite epis alo ka wan polou ka opru ite. E itodue mada ke osep leklou e itodue elio itau ke isak e itawai deka itedidi udo pelengon.

²³ E itodue wan bitna bitna molil e itaplau ite itau. E wan gesa karanga dangdang elio itau bitna bitna tonari kovok.

²⁴ Osep ka tidong ke Krais ila osua tidue aitno lisak oglou ina kap elio soulu ka pampamu lisak waiki due e tinilim isak nepek mana ke Ida Puda ina akai e timete kodong.

²⁵ Ano Itau iye kar mosongon itau ke ite kodong deka ma itosongon Ano Itau ma iye nis ite ke udo langan.

²⁶ Ma itakakai ite tona angainte adai kovok. E ma itosruk osep leklou aitno lisak ma itodue evlei pulu kovok. E aitno lite rim ke osep leklou kovok.