Galesia 4 - Aria New Testament

¹ E ngawai langane. Langka gute otno kene vala dong mase mimi tonari due timla ila wan ka pula keniye. Lama wan tonari langka mimi ila wan kodong dau alo ka mimi dau dong daudeng iye dong eriar langka wokboi nating.

² Iye dong moli ke osep plaungan ina e osep ka timgo ke iye la lama iding ke alo ka timla rere.

³ E ite blang langane. Alo ka itodong langka mimi daudeng itodong langka wokboi nating. Itodong langane ke ansak ka tiplau wan ke sirva e wan ke taklak.

⁴ E alo ka Ida Tapolngon rere iye pagei Otno Arang me. Apmang divir iye e iye polou gute e dong moli ke Moses ila sogongon.

⁵ Ma iye kli ite ka itodong moli ke Moses ila sogongon udo elio epmes ina e ma iye due ite itopolou Ida Tapolngon titno.

⁶ Eknikane umodong Ida Tapolngon titno. E Ida Tapolngon pagei Otno Arang Ano Itau me dong ke aitno lite deka Ano Itau due ite ma itegi langane. “Abo. Livou.”

⁷ E eknikane itodong langka wokboi nating kovok. Aurou. Ida Tapolngon due ite itopolou titno. Itodong Ida Tapolngon titno deka iteile ma itodue Pmada ila wan ka pula keniye.

Pol aitno kro ke osep Galesia ina

⁸ Oglou umeile Ida Tapolngon kovok e umodong langka wokboi nating ke wan ka isak tapolngon kovok.

⁹ E eknikane umeile Ida Tapolngon kodong. Koke wan ka itau Ida Tapolngon ile umu kodong. Deka umawaiki umeiding ke wan ka tapolngon yakngan ka urok arit kovok blang i? E umawaiki umodong langka wokboi nating ke isak blang?

¹⁰ Aling aling aitno lumu langka umawaiki umedidi elio langka aitno lumu mter ke apu ke oklou kene kene koke taiko kene kene koke tobor kene kene e langka alo ka tobor oku polou e ma umedidi elio langane.

¹¹ Aitno lungong mter ke lumu elio langane e aitno lungong kro langka bokongon ka ngadue airavu ke umu polou adai vala.

¹² Sipmi. Ngawaiki ma umo-polou eriar langka ngong. Ngasongon Moses ila sogongon e ngapolou eriar langka umu. E umodue elio soulu gesa ke ngong kovok.

¹³ E umeile langane. Dangon due ngong alo ka ngame nganapapra omon itau ke umu aling mgongon ina.

¹⁴ Pampamu lungong ila arit kovok e elio ane due elio ka opru umu. E umopul dogur ke ngong kovok e umoulou ma umodong kap ngong kovok. Aurou. Umodue ngong langka ngong Ida Tapolngon ila ensel gesa koke langka umodue Krais Yesus.

¹⁵ Alo ari aitno lumu neser e aitno lumu itau ke ngong. E eknikane ina lange aitno lumu neser kovok? Ngawai lokono. Alo ari aitno lumu omba lokono ke ngong ma umawaiki umolua ngong. Langka umakaranga umepi omtomu deka umepie e umakar isak ke ngong.

¹⁶ Ina lange? Ngawai pelengon lokono ke umu e pelengon tonari due ngong ngapolou langka upu oul?

¹⁷ Umoklingen. Osep ka tiwai dikngen ke umu aitno lisak mter langka tilua umu kovok. Aurou. Tiwaiki tidue ngong e umu itadar pulu ma aitno lumu la ke isak ma umolua isak.

¹⁸ Langka aitno lite omba ma itodue elio itau ke osep are itau. Aling aling umodue elio langane lama ngadong kap umu koke ngadong kap umu kovok.

¹⁹ Dirgu. Eknikane blang nganamani omba lokono langka apmang ka namani mimi ngen iye. Umu Ida Tapolngon titno kodong e dau ngawaiki umopolou eriar langka Krais.

²⁰ Aisudo. Eknikane ngadong kap umu kovok. Langka ngadong kap umu ma ngawai pelengon itau ke umu. Aitno lungong kro lokono ke umu e ngaile kovok ma ngalua umu ke elio lange.

Hagar e Sara

²¹ Umu ka umawaiki umodong moli ke Moses ila sogongon eknikane ngapmi umu langane. Umoklingen Moses ila sogongon ila pelengon koke aurou?

²² Ida Tapolngon ila pelengon wai lite ke Abraham titno orwo. Apmang ka dong wokmeri nating divir mimi kene. E apmang ka dong fri divir mimi kene silang.

²³ Mimi ke apmang ka dong wokmeri nating ila poloungon langka mimi ka pula keniye leklou tipolou. E mimi ke apmang ka dong fri ila poloungon batne ke Ida Tapolngon ila promis dagar.

²⁴ Deka pelengon ano kene dong ke basikngen tonari. Apmang orwo tonari isak nisngen ke pelengon orwo. Hagar iye langka pelengon ke gigri Sainai deka titno tipolou langka osep ka wokboi nating.

²⁵ Hagar iye langka gigri Sainai ka dong ke omur Arebia e silang iye langka armok Jerusalem ka dong ke eknikane. Jerusalem tonari iye langka apmang ka wokmeri nating kap titno ka pula keniye.

²⁶ E Jerusalem silang dong ke omur heven e iye dong fri. Iye langka tnada.

²⁷ Ida Tapolngon ila pelengon wai langane. “Aisudo. Apmang ka opon ka divir mimi kovok ma aitno lugom neser. E wom apmang ka amnamani mi-mi ngen wom dau kovok ma omdue sakul e amdaiku omba. Kesua ma emdivir mimi pula e ommole ap-mang ka ila boget dong tauni kap iye.”

²⁸ Sipmi. Umu eriar langka Aisak. Ke Ida Tapolngon ila pelengon dagar umopolou titno.

²⁹ E mimi tonari ka polou ke elio ka mimi ka pula keniye tipolou ine iye waiki due agegeng ke mimi ka polou ke Ida Tapolngon ila arit. Deka eknikane elio langane dau dong.

³⁰ Ida Tapolngon ila pelengon wai lange? Iye wai langane. “Amsapir apmang ka wokmeri nating kap otno kla. Mimi ke apmang ka wokmeri nating ma due wan ke timla kovok. E mimi ke apmang ka dong fri vala ma due.”

³¹ Sipmi. Iteile ite apmang ka wokmeri nating titno ite kovok. Aurou. Ite apmang ka dong fri titno ite.