Galesia 2 - Aria New Testament

Pol e osep aposel leklou aitno lisak kene pulu

¹ Ngadong la lama tobor songotno apanal mela yagos deka ngong imorwo Barnabas imala ke Jerusalem blang. E ngadue Taitus e iye la kap imi.

² Ngala kesua Ida Tapolngon nis ngong ma ngala are. E alo ka ngadong ke Jerusalem ngawai ke osep namormor ka tiplau sios vala. E ngapalongo urok ke omon itau ka oglou nganapapra ine ke osep ka isak osep Yuda ina kovok. Ngadue langane kesua aitno lungong kro lama bokongon ka eknikane ngadue e ke oglou blang ngadue polou adai.

³ Taitus dong kap ngong e iye gute Grik ina. E tiwai limi langane kovok. “Imawaiki ma iye didi elio ulangngan ina.” Aurou.

⁴ Osep leklou ka isak sudo yakngan ina time tisep ke limem duningen e tidong langka esim. Ma tivati wansua ka Krais due ke ite alo ka iye lua ite ke udo elio epmes ina e iye pi ite ma itodong moli ke Moses ila sogongon kovok. Osep tonari tiwaiki tidue ite ma itodong ke kalabus ke Moses ila songongon.

⁵ E imakaranga imodong moli ke urok pelengon kovok. Imawaiki pelengon lokono ka omon itau segesege kovok. Ma aling aling umakaranga umedidie osuk.

⁶ Osep leklou tidong langka sios ina plaungan. E langka angainsak omba koke angainsak omba kovok are wan gesa kovok ke ngong. Ida Tapolngon aitno mter ke gute angaine kovok. E osep ka angainsak omba tidue pelengon gesa nepir ke lou pelengon kovok.

⁷ Aurou lokono. Aitno lisak langka Ida Tapolngon kar bokongon ke ngong ka nganapapra omon itau ke osep ka isak osep Yuda ina kovok. Langka iye kar bokongon ke Pita ma iye napapra omon itau ke osep Yuda ina.

⁸ Ida Tapolngon kar arit ke Pita ma iye boko langka gute aposel airavu ke osep Yuda ina e iye kar arit ke ngong blang ma ngaboko langka gute aposel airavu ke osep ka isak osep Yuda ina kovok.

⁹ Osep ka pula keniye tivati Jems e Pita e Jon langka isak osep namormor ke sios. Deka osep tonari tile omur langka Ida Tapolngon makai ngong e kar bokongon ke ngong deka tisekan ke ngong kap Barnabas e tile omur imorwo imodue bokongon eriar langka tidue. E aitno limi kene pulu e aitno limi itau pulu e imalalo limem pelengon langane. Imorwo ma imodue bokongon ke osep ka isak osep Yuda ina kovok e isak ma tidue bokongon ke osep Yuda ina.

¹⁰ Tiwai pelengon kene vala ke imorwo. Tiwaiki ma aitno limi mter ke osep ka urok wan isuk boto vala ka tidong ke urok sios. E ke oglou ngawaiki ngadue langane deka ngaboko dagar ma ngadue.

Pol wai osuk ke Pita ke ila elio

¹¹ Mase Pita me ke armok Antiok e ngawai osuk ke bitna kesua iye due elio ka itau kovok.

¹² Alo ka Jems ila osua time dau kovok Pita ngen kap osep ka isak osep Yuda ina kovok. E alo ka osep tonari time deka Pita lim ke osep Kristen ka aitno lisak dau dagar ke elio ulangngan ina. Deka iye dong mawa ke osep ka isak osep Yuda ina kovok e dong kap isak kovok.

¹³ Osep Yuda ina blang ka isak osep Kristen tidue elio tonari kap iye. E urok elio tonari nak Barnabas aitno ma iye due elio langane blang.

¹⁴ Alo ka ngavati isak tididi pelengon lokono ka omon itau kovok ngawai ke Pita ke osep amtarsak langane. “Wom gute Yuda ina e dau emdidi elio langka osep ka isak osep Yuda ina kovok e wom tona emdidi osep Yuda ina inarak apu kovok. E ina lange amwaiki ampagei osep ka isak osep Yuda ina kovok ma tididi osep Yuda ina inarak apu?”

Osep ka aitno lisak dagar ke Yesus tipolou itau ke Ida Tapolngon bitna

¹⁵ Lokono udo seia isak osep Yuda ina. E itopolou ke osep leklou ka tidue elio epmes ina kovok.

¹⁶ Iteile Ida Tapolngon aitno mter ke gute ka didi Moses ila sogongon e ke batne langane iye sir iye gute itau kovok. Aurou. Gute ka aitno dagar ke Krais Yesus vala Ida Tapolngon sir iye gute itau. Ite blang aitno lite dagar ke Krais Yesus kesua iteile ekreng ane ekreng kene vala ma Ida Tapolngon sir ite osep itau. E ke ekreng ka itedidi Moses ila sogongon kovok. Kesua gute gesa karanga didi Moses ila sogongon e Ida Tapolngon sir iye gute itau kovok. Aurou.

¹⁷ Alo ka aitno lite dagar ke Krais itopolou itau ke Ida Tapolngon bitna. Langka langane e dau ite blang itodue elio epmes ina langka osep ka isak osep Yuda ina kovok deka lange? Ane langka Krais iye gute ka due elio epmes ina polou dagar i? Aurou lokono.

¹⁸ Langka ngasongon Moses ila sogongon mase ngabauluk ngadidie blang ngapolou langka gute ka ngadue elio epmes ina vala.

¹⁹ E Moses ila sogongon paur ngong ke ekreng ka la ke metengen e Moses ila sogongon nis ngong ngadong langka gute ka mete kodong.

²⁰ E ke elio ka eknikane ngadong itau kap Ida Tapolngon ngamana kap Ida Puda Yesus Krais ke ina akai kodong e ngamete kap iye. Deka ngadue mosongon oku. E mosongon tonari lou mosongon kovok. Aurou. Krais dong ke aitno lungong deka lou elio isuk isuk e lou bokongon ka ngadue ke taklak ngadue ke aitno lungong ila dagar vala. Aitno lungong dagar ke Ida Tapolngon Otno Arang e aitno itau lokono ke ngong e iye soro pampamu ine ma lua ngong.

²¹ Ngawaiki ngadue Ida Tapolngon ila makaingan polou langka wan adai kovok. Aurou. Langka Moses ila sogongon ka-ranga due ite itopolou itau ke Ida Tapolngon bitna deka Krais mete adai vala.