Galesia 1 - Aria New Testament

¹ Ngong Pol ka aposel gesa. Osep tipagei ngong koke tidue ngong ma ngaboko ke osep aposel urok bokongon kovok. Aurou. Ngaboko langane kesua Ida Puda Yesus Krais kap Ida Tapolngon ka Pmada tirere ngong aposel. Ida Tapolngon tona iye gute ka due Krais mole ina denga.

² Ngong imogosok osep ka tididi Ida Tapolngon ila pelengon imosogo pas ane uti ke umu osep ka umodong ke sios kene kene ke omur Galesia.

³ Ida Tapolngon ka Pmada kap Ida Puda Yesus Krais timakai umu e tidue aitno lumu epen.

⁴ Krais didi Ida Tapolngon ka Pmada aitno e soro pampamu ine ma lua ite ke udo elio epmes ina. Iye due langane ma lua ite ke elio soulu ka dong ke taklak ane.

⁵ Deka aling aling itakakai Ida Tapolngon angaine tito la egim. Lokono.

Omon itau kene vala dong

⁶ E oku ane ngadigrik lokono ke elio ka umodue. Krais ila bokongon lua umu e Ida Tapolngon due umu umopolou ila osep ine. Deka tauni kovok umosongon iye e umedidi omon silang ka umesire omon itau.

⁷ E omon itau silang dong kovok. Aurou lokono. Osep leklou tinak aitno lumu e tiwaiki tipalele Krais ila omon itau.

⁸ E langka imanapapra omon silang koke ensel gesa wai ine e omon tonari eriar langka omon ka oglou imanapapra ke umu kovok deka umoklingen ine kovok. E ngawaiki gute ka wai ke omon tonari iye ma kluk ke omur hel dong vala dong.

⁹ Oglou imawai ke pelengon tonari kodong e eknikane ngawai ke pelengon tonari blang. Langka gute gesa napapra omon ke umu e omon tonari eriar langka omon ka oglou umodue kovok deka ma gute tonari la ke omur hel.

¹⁰ E aitno lumu lange? Pele-ngon ka eknikane ngawai ine ma lange? Ngawaiki ma osep aitno lisak itau ke ngong koke ngawaiki ma Ida Tapolngon aitno itau ke ngong? Koke lange? Ngawai dikngen ke umu vala? Umoklingen. Langka ngawai dikngen ke osep ngong Krais ila gute bokongon ina kovok.

Ida Tapolngon rere Pol aposel gesa

¹¹ Sipmi. Ngawai osuk ke umu langane. Omon itau ka oglou ngawai ke umu ine iye pelengon ka polou ke gute gesa aitno kovok.

¹² Kesua ngadue pelengon ane ke gute gesa kovok. E osep tiparere ngong ine kovok. Aurou lokono. Yesus Krais vala nis ngong ke pelengon ane.

¹³ Umoklingen pelengon ko-dong ke elio ka oglou ngadue. Umeile ngadidi osep Yuda ina inarak apu lokono e ngadue agegeng ke Ida Tapolngon ila osep. E ngadue agegeng omba ke sios.

¹⁴ E ngong arit ngong lokono e ngadidi lou seia urok elio bitna bitna lokono e ngamole osep auram ke osep Yuda ina pula ka inarak tobor eriar ke ngau tobor.

¹⁵ Alo ka nina dau divir ngong kovok Ida Tapolngon rere ngong kodong e ke ila makaingan iye rere ngong ila gute bokongon ina.

¹⁶ Deka iye didi aitno e nis ngong ke Otno Arang ma ngadue ila bokongon ka nganapapra ila omon itau ke osep ka isak osep Yuda ina kovok. E alo ka Ida Tapolngon rere ngong io ngala ngapmi gute gesa ine kovok.

¹⁷ E ngala ke Jerusalem ma ngawai ke osep ka tipolou aposel mgo ke ngong kovok. Aurou. Ngala ngadong ke omur Arebia e mase ngaiding ke Damaskus.

¹⁸ Deka tobor eklu mela yagos e ngala ke Jerusalem ma ngawai kap Pita. E ngadong kap iye la lama iding ke oklou songotno elme.

¹⁹ Ke alo ari ngavati osep aposel gesa blang kovok. Ngavati Jems ka Ida Puda ina aiver vala.

²⁰ Ke pelengon ka ngasogoe ke umu ngawai lokono ke Ida Tapolngon bitna e ngayak umu kovok.

²¹ Mase ngala ngalila ke provins Siria e provins Silisia.

²² E osep ka tidong ke Krais ila osua ka tidong ke omur Judia tivati ngong dau kovok.

²³ E tiklingen omon ke ngong vala ka langane. Oglou gute tonari due agegeng ke ite e eknikane iye napapra omon itau ka oglou iye waiki due agegeng ine.

²⁴ Tiklingen omon ke elio ka Ida Tapolngon makai ngong e tikakai Ida Tapolngon angaine ine.