Filipai 4 - Aria New Testament

Aitno lite neser ke elio itau

¹ Sipmi. Ngong lana ngong ke umu e ngawaiki ngavati umu kesua aitno lumu la dagar ke Yesus batne ke lou bokongon. Alo ka aitno lungong mter ke umu aitno lungong itau ke umu e aitno lungong neser ke umu. Sipmi. Ngawaiki umevri dagar ke Ida Puda vala.

² Ngawai dagar ke apmang orwo Yuodia e Sintike langane. Oglou aitno lumu kene pulu kovok e eknikane ngawaiki aitno lumu kene pulu kesua umorwo umeneklep ke Ida Puda.

³ E lou aten ngawai ke wom ka omlua ngong ke lou bokongon ma omlua apmang orwo tonari blang. Kesua tilua ngong itau ke lou bokongon ka nganapapra Ida Tapolngon ila omon itau ke osep. Isak tigosok gute Klemen e osep leklou ka angainsak dong ke buk ka mosongon ka dong vala dong ina tilua ngong ke omon itau ila napaprangan.

⁴ Aling aling aitno lumu neser kesua umeneklep ke Ida Puda. E ngawai lumu blang langane. Aitno lumu neser ke Ida Puda.

⁵ Umodue elio molil molil ke osep ka pula keniye ma tivati lumu elio itau kesua isuk boto Ida Puda ma iding me.

⁶ Aitno lumu kro ke wan gesa kovok. Aurou. Aling aling umepmi Ida Tapolngon ke wan bitna bitna ka ma lua umu. E silang blang umawai tenkyu ke wan ka pula keniye ka iye due.

⁷ Alo ka Ida Tapolngon due aitno lumu dong epen elio are wan ka itau lokono e itosep itakaranga iteile ine kovok. Ida Tapolngon due aitno lumu dong epen e elio ane plau aitno lumu.

⁸ Sipmi. Ngawaiki ngawai ke umu sasi boto blang deka lou pelengon yagos. Ngawaiki aitno lumu mter ke elio ka lokono vala e elio ka osep tidue anit ine e elio ka osuk ke osep amtarsak. E elio ka Ida Tapolngon aitno itau ine e elio ka due osep lana isak pulu e elio ka osep aitno lisak itau ine. Aitno lumu mter ke elio ka itau lokono e elio ka due osep aitno lisak itau ine.

⁹ Ngaparere umu ke pelengon pula e umekis dagar ine kodong. Deka ngawaiki umedidi pelengon ka oglou umoklingen ine ke ngong e ka umavati ngong ngadue. Umodue langane deka Ida Tapolngon ka due aitno lite epen ma dong kap umu.

Pol aitno itau ke osep Filipai ina kesua tilua iye

¹⁰ Oglou aitno lumu vri ke ngong e umolua ngong ke lou bokongon deka mase umakaranga umolua ngong kovok. E eknikane lumu ekreng dong ma umakaranga umolua ngong blang. Ngadong kap Ida Puda e aitno lungong neser ke lumu luangan tonari.

¹¹ Ngawai lumu langane batne ke lou wan isuk boto kovok. Aurou. Ngawai lumu kesua ngawaiki umeile omur aitno lungong itau ke wan bitna bitna ka polou ke ngong lama isak elio itau koke elio soulu.

¹² Oglou aling kene lou wan isuk boto vala e aling silang lou wan pula dong. Ngaile kodong ke elio ka aitno lungong itau ke elio bitna bitna ka polou ke ngong. Lama ngau ngangon pula dong koke sapanga due ngong e langka lou wan pula dong koke lou wan isuk boto vala. Lama langane ngadong itau ine.

¹³ Krais lua ngong ke ila arit deka ngakaranga ngadong itau ke elio bitna bitna ka tipolou ke ngong.

¹⁴ Ngadong itau e dau aitno lungong itau ke elio ka umolua ngong ke elio ka polou ka opru ngong.

¹⁵ E umu osep Filipai ina umeile oglou alo ka ngasongon provins Masedonia e nganapapra Ida Tapolngon ila omon itau mgo sios kene silang lua ngong kovok. Aurou. Umu vala umolua ngong.

¹⁶ Deka alo ka ngadong ke armok Tesalonaika e lou mani isuk boto umapagei mani ke ngong aling orwo eklu langare.

¹⁷ E ngawaiki umeile langane. Ngawaiki ngadue wan silang ke umu kovok. Aurou. Ngawaiki lumu elio itau ka umotuktuk lumu mani e umakare ke osep leklou res polou omba ma Ida Tapolngon kar ila kerengen ke umu ine.

¹⁸ Deka langane. Gute Epafroditus kar ngong wan ka pula keniye ka umapagei ke ngong kodong. E wan tonari mole wan ka karanga ke ngong. Wan ka umapagei ke ngong iye langka wan ka osep tidue elio opmu ina ine deka ina amnangan itau tito la ke Ida Tapolngon e aitno itau lokono ine.

¹⁹ Deka langane. Langka lumu wan isuk boto ma Ngau Tapolngon due Krais Yesus ila wan ka pula lokono e lua umu ine.

²⁰ E ma itakakai Ida Tapolngon ka Pmada angaine tito la egim dong vala dong. Lokono.

Pol wai aitno itau ke osep Filipai ina

²¹ Deka ngawai “oklou itau” ke umu ka Krais Yesus ila osep e sipmi ka tidong kap ngong tiwai “oklou itau” ke umu blang.

²² Deka Ida Tapolngon ila osep ka pula ka tidong ane tiwai “oklou itau” ke umu. E lokono osep ka tidue Sisar ila bokongon tiwaiki tiwai “oklou itau” ke umu blang.

²³ Deka ngawaiki Ida Puda Yesus Krais ila makaingan dong kap umu kenmu kenmu anmu. Lokono.