Filipai 3 - Aria New Testament

Osep ka aitno lisak dagar ke Krais tidong itau ke Ida Tapolngon bitna

¹ Sipmi. Ngawaiki ngababrum lou pelengon ke pelengon ane. Aitno lumu neser ke elio ka umeneklep ke Ida Puda. Pelengon ane ka ngasogoe uti ke umu pelengon oku ina kovok. E ngong opru ngong ma ngasogo pelengon tonari blang kovok. Kesua pelengon ane karanga lua umu langka elio soulu polou ke umu.

² E umeile umu itau. Kesua osep leklou tidong langka gemle kevena e tidue elio soulu. Osep tonari tiwaiki umebisik tarna lumu.

³ Ite vala Ida Tapolngon titno lokono e itolotuim Ida Tapolngon batne ke Ano Itau ka iye kar iye ke ite. Aitno lite neser kesua iteneklep ke Krais Yesus. E aitno lite mter ke elio bitna bitna ka itakaranga itodue kovok. Aurou.

⁴ Langka osep tiwaiki aitno lisak mter ke elio ka tikaranga tidue deka ngamole isak kesua oglou ngadidi Moses ila sogongon itau lokono.

⁵ Nina divir ngong sep ke gute Benjamin ila osua airavu ke osep Israel ina. Nina divir ngong deka mase ke oklou lumeklu ina tidue elio ulangngan ina ke ngong. E ngawai pelengon Hibru langka lou seia tiwai ine e ngadidi imi osep Yuda ina limem elio itau lokono e ngong gute Farasi ina.

⁶ Ngaboko engil ma ngawaiki ngadue Ida Tapolngon ila bokongon deka ngadue agegeng ke Yesus ila osep. Deka langka osep tididi Moses ila sogongon e tiwade lou elio isuk isuk ma tile lou elio vri ke ngong kovok.

⁷ E lou elio isuk isuk ka oglou ngawaiki tilua ngong eknikane aitno lungong mter isak wan adai vala. Aitno lungong mter langare kesua aitno lungong dagar ke Krais kodong.

⁸ E silang blang langane. Aitno lungong mter wan ka pula keniye ka oglou ngadue isak yagos la kodong. E elio ka ngaile Krais Yesus iye Ngau Puda are wan ka omba e mole wan ka pula keniye. Deka aitno lungong mter elio ka oglou ngadue isak wan adai e langka tokonkon. Kesua ngawaiki ma ngadong kap Krais.

⁹ Ngadong kap Krais e ngadong itau e osuk ke Ida Tapolngon bitna batne ke elio ka ngadidi Moses ila sogongon kovok. Aurou. Eknikane ngadong itau e osuk batne aitno lungong la dagar ke Krais. Elio ka Ida Tapolngon due ngong ngadong itau ke bitna batne aitno lungong la dagar ke Krais.

¹⁰ Ngong lana lungong langane. Ma ngadong kap Krais e ngadue Ida Tapolngon ila arit ka due Krais poga tito ke ina denga. E nganamani elio ka opru ngong langka Krais namani elio ka opru iye. E ngawaiki aitno lungong oglou ina mete langka iye mete.

¹¹ Aitno lungong langane kesua aitno lungong dagar langka alo ka ngamete Krais ma due ngong ngapoga ngatito ke ngau denga blang.

Pol arit iye ma iye babrum ila bokongon

¹² Ida Tapolngon waiki ito-polou itau lokono. E ngapolou langane dau kovok. Aurou. E ngong arit ngong ma ngadue prais eriar langka Krais Yesus due ngong ngapolou ila gute.

¹³ Sipmi. Aitno lungong mter langka ngadong itau langare dau kovok. E aitno lungong kene vala langane. Aitno lungong mter ke wan ka oglou ngadue kovok e ngong arit ngong ma ngadue wan itau ka mase ma polou.

¹⁴ E ngong arit ngong ma ngadue wan ka Ida Tapolngon rere ke ngong langka gute ka suong dagar ke resis ma iye due prais. Prais tonari udo mosongon ka dong vala dong ka Ida Tapolngon rere ke ite ke Krais Yesus.

¹⁵ Deka ite ka itopolou langka osep ngongle ke aitno lite ila dagar kodong ma aitno lite kene ke lou pelengon tonari. E langka umu leklou aitno lumu mter ke elio silang Ida Tapolngon ma due aitno lumu ma umeile omur ine.

¹⁶ E ma aling aling itodong itodue elio itau ka itekise kodong.

¹⁷ Sipmi. Ma umakana lou elio bitna bitna ka umavati ngong ngadue. E umavati elio ke osep ka tididi limem elio e umakana isak blang.

¹⁸ Deka ngawai ke umu blang ke pelengon ka oglou ngawai ine aling pula. E aitno lungong kro ine e ngakngis omba. Lou pelengon tonari langane. Osep leklou aitno lisak engil ke elio ka Krais mana ke ina akai e mete ine. Urok elio nis ite isak Krais ina oul.

¹⁹ Osep tonari tidue wan ka pampamu lisak waiki tidue vala. Aitno lisak neser ke wan ka osep pula mnak isak ine e aitno lisak mter ke wan bitna bitna ka taklak ina vala. Osep ka tidue elio langane ma tikluk ke omur hel.

²⁰ E ite osep ka omur heven ina e itodong itapara ke alo ka Ida Luangan ka Ida Puda Yesus Krais songon omur heven e duru me due ite.

²¹ Alo ari iye ma due pampamu lite ka tikaranga timete tilumus tipolou itau lokono langka pampamu ine ka itau lokono. Iye karanga due langane kesua iye didi ila arit ka iye karanga plau wan ka pula keniye ine.