Filipai 2 - Aria New Testament

Ma aitno lite kene e itodue elio itau ke osep

¹ Krais due aitno lumu tidong dagar e iye lana iye ke umu i? Umodong kene pulu kap Ano Itau i? Aitno lumu itau ke osep leklou e aitno lumu due isak e aitno lumu kro ke osep ka wan polou ka opru isak i?

² Langka langare deka ngawaiki aitno lumu mter kene pulu e umu lana umu pulu e lana lumu kene vala. Langka umodue elio langane aitno lungong itau lokono ine.

³ Umu kenmu kenmu aitno lumu mter ke umu tona vala e umawaiki umakakai angainmu kovok. Aurou. Umodong moli ke osep leklou e aitno lumu mter langka urok elio mole lumu elio.

⁴ E aitno lumu mter ke wan ka lua umu tona vala kovok. Aurou. Aitno lumu mter ke wan ka lua osep leklou blang.

Krais pes iye tona deka Ida Tapolngon kakai iye

⁵ Ngawaiki ma aitno lumu mter langka Krais Yesus aitno mter.

⁶ Yesus tona iye Ida Tapolngon e dau aitno mter langka iye kis dagar ke elio ka iye dong eriar langka Ida Tapolngon ka Pmada kovok. Aurou.

⁷ Iye songon elio langane e iye polou langka wokboi nating. Deka iye me ke taklak e polou langka itosep.

⁸ Iye polou langka itosep e osep tivati iye langka tivati osep leklou. Deka iye pes iye e meit ke Ida Tapolngon lama iye mete ke ina akai.

⁹ Iye mete kodong ke ina akai deka Ida Tapolngon due iye mole osep ka pula keniye e due angaine omba lokono e gute silang angaine omba langane kovok.

¹⁰ Ida Tapolngon due langane ma osep tidue anit ke Yesus. Deka osep ka tidong ke omur heven e osep ka tidong ke taklak e osep ka tidong ke taklak aitno ma tigrum kamsak ke bitna.

¹¹ E ma tipalongo urok malak langane. Yesus Krais iye osep Inarak Puda. E elio langane kakai Ida Tapolngon ka Pmada angaine tito la egim.

Itodong langka bublongon ke osep

¹² Sipmi. Ngong lana ngong ke umu. E langka oglou umedidi lou pelengon alo ka ngadong kap umu deka eknikane alo ka ngadong kap umu kovok ma umedidi lou pelengon lokono. Ida Tapolngon lua umu ke lumu elio epmes ina kodong deka eknikane umodong dagar ke aitno lumu ila dagar e umodue anit ke Ida Tapolngon e umoboko ma lumu mosongon ke taklak ane dong itau.

¹³ Kesua iteile Ida Tapolngon boko ke aitno lumu ma umawaiki umodue elio ka aitno itau ine e iye kar arit ke umu ma umodue elio langare.

¹⁴ Ke wan bitna bitna ka umodue ma umongurngur e opmu mluk pulu sakam.

¹⁵ Umodue langare kovok ma umu ka Ida Tapolngon titno umu lumu moso-ngon itau e osep tikaranga tisin elio soulu gesa vri ke umu kovok. Umeile umodong airavu ke osep epmes ina e aling aling tidue elio soulu. E umopolou langka bublo-ngon ka nis isak ke elio itau.

¹⁶ Umodue langane ma uma-karanga umakar isak pelengon ka karanga lua isak ke mosongon ka dong vala dong. Deka alo ka oklou ka Krais iding me ma aitno lungong neser omba ke lumu elio itau ka umodue. Deka ma ngaile lou bokongon airavu ke umu polou adai kovok.

¹⁷ Aitno lumu ila dagar iye langka elio opmu ina ka umodue ke Ida Tapolngon. E langka osep timluk ngong ngamete e ngau marau baser langka oglou osep tibaser aki wain ke wan ka tidue elio opmu ina ine are wan gesa kovok. Ma aitno lungong neser e ngawaiki aitno lumu neser ine blang.

¹⁸ E ke elio langare umu blang aitno lumu neser kap ngong.

Pol waiki pagei Timoti ke Filipai

¹⁹ Langka Ida Puda Yesus aitno itau ine isuk boto ma ngapagei Timoti uti ke umu. Deka alo ka ngaklingen omon ke lumu mosongon ma aitno lungong kro ke umu kovok.

²⁰ Kesua gute gesa dong kap ngong ka dong langka Timoti kovok. Timoti aitno kene kap ngong e iye waiki kere umu langka ngawaiki ngakere umu.

²¹ Osep leklou aitno lisak vri ke isak kensak kensak e aitno lisak mter langka tidue Yesus Krais ila bokongon kovok.

²² E umeile Timoti ila elio itau. Umeile iye boko kap ngong alo ka imanapapra omon itau. Iye boko kap ngong langka gute otno arang boko kap iye ke ila bokongon.

²³ Ngawaiki ngaile wansua ma polou ke ngong paide deka ma ngapagei iye uti ke umu.

²⁴ Deka aitno lungong dagar langka isuk boto Ida Puda ma lua ngong ma ngakaranga ngauti ngapolou ke umu blang.

Pol waiki pagei Epafroditus iding ke Filipai

²⁵ E aitno lungong mter langka ma ngapagei udo aten Epafroditus iding ke umu blang. Iye sudo gesa e iye boko kap ngong e imogosok imoboko pulu langka osep ola ina ke Ida Tapolngon ila bokongon. Oglou umapagei iye me ma iye lua ngong.

²⁶ E eknikane aitno kro ke umu e iye waiki vati umu blang kesua umoklingen omon iye paia e aitno kro ke omon ka umoklingen ine.

²⁷ E lokono iye paia omba e isuk boto iye mete kodong ine. E Ida Tapolngon aitno due iye e due polou itau blang e silang Ida Tapolngon makai ngong blang lama iye mete kodong deka aitno lungong kro lokono ine.

²⁸ Deka ngawaiki ngapagei iye iding ke umu ma alo ka umavati iye blang aitno lumu neser ke iye. E ma elio ka aitno lungong kro ine yagos.

²⁹ Alo ka iye polou ke umu deka aitno lumu neser ke iye batne ke Ida Puda. Ngawaiki umodue anit ke osep ka tidue elio eriar langka iye due.

³⁰ Oglou umakaranga umolua ngong ke lou bokongon kovok e umapagei iye ma iye me lua ngong. Iye pli tarna e lua ngong ke Krais ila bokongon e isuk boto iye mete kodong ine. E umodue anit ke iye batne ke ila elio tonari.