Filipai 1 - Aria New Testament

¹ Ngong Pol imorwo Timoti imi Krais Yesus ila osep bokongon ina. E imosogo pas ane uti la ke umu ka Krais Yesus ila osep ka umodong ke armok Filipai kap osep plaungan ina e osep luangan ina ka tilua Ida Tapolngon ila osep.

² Ngawaiki Ida Tapolngon ka Pmada kap Ida Puda Yesus Krais timakai umu e tidue aitno lumu dong epen.

Pol wai itau ke Ida Tapolngon ke osep Filipai ina

³ Alo ka aitno lungong mter ke umu deka ngawai tenkyu ke Ngau Tapolngon ke umu.

⁴ E aling aling alo ka ngawai itau aitno lungong neser ke umu e ngawai itau ke umu.

⁵ Aitno lungong neser ke umu batne langane. Ke mgongon lila me ke eknikane umoboko kap ngong ke omon itau ila napaprangan.

⁶ E ngaile langane. Oglou Ida Tapolngon nogrum ila bokongon ke aitno lumu e eknikane iye dau boko ke aitno lumu la lama iding ke alo ka Krais Yesus ma iding me.

⁷ Ngong lana ngong omba ke umu deka elio ka aitno lungong mter pula ke umu iye osuk lokono. Ngadue langane lama ngadong ke kalabus koke ngapalongo osep ke elio ka omon itau iye lokono koke ngadue aitno lisak la dagar ine. E umu keniye umoboko kap ngong ke bokongon ka Ida Tapolngon kare ke ngong ke ila makaingan.

⁸ Ida Tapolngon ile ngawaiki ngavati umu lokono e ngong lana ngong omba ke umu langka Krais Yesus lana iye ke umu.

⁹ Aling aling ngawai itau langane. Ngawaiki elio ka umu lana umu ke osep res polou omba e ngawaiki umeile omur ke wan bitna bitna itau e aitno lumu mter ke wan malak lokono.

¹⁰ Ma umakaranga umawade elio bitna bitna e umedidi elio ka itau vala. Deka lumu mosongon dong itau e elio gesa vri ke umu kovok la lama iding ke alo ka Krais iding me.

¹¹ Deka Yesus Krais due elio ka itau e osuk polou ke umu e osep tivati lumu elio itau e tikakai Ida Tapolngon angaine tito la egim ine.

Elio ka Pol dong ke kalabus

¹² Sipmi. Ngawaiki umeile omur wan ka polou ke ngong dangdang omon itau kovok. Aurou. Wan tonari due omon itau la ke osep pula pula.

¹³ Osep ola ina ka tiplau Sisar ila ninu e osep pula leklou tile ngadong ke kalabus ane batne ngadue Krais ila bokongon.

¹⁴ E sudo leklou pula aitno lisak tipolou dagar lokono ke Ida Puda batne ke lou elio alo ka ngadong ke kalabus. Deka tinapapra Ida Tapolngon ila pelengon e tiulou tarna lisak ine kovok.

¹⁵ Iteile osep leklou tinapapra Krais ila omon itau batne aitno lisak rim ke ngong e tiwaiki tituk pelengon kap ngong. E dau osep leklou blang aitno lisak mter itau e tinapapra Krais ila omon itau.

¹⁶ Osep ka aitno lisak mter itau tinapapra kesua isak lana isak ke ngong e tile ngadong ke kalabus kesua ngapalongo osep langane. Omon itau iye pelengon ka lokono lokono.

¹⁷ E osep leklou tonari tinapapra Krais ila omon itau kesua batne tiwaiki tikakai isak tona angainsak e aitno lisak mter itau kovok. E tiwaiki tidue wan ka opru ngong alo ka ngadong ke kalabus.

¹⁸ Deka lange? Langka osep tinapapra Krais ila omon itau kesua aitno lisak mter ke wan lokono koke aitno lisak mter ke wan ka lokono kovok are wan gesa kovok. Wan ka omba tinapapra Krais ila omon itau. E aitno lungong neser omba ine e mase ma aitno lungong neser ine blang.

Pol aitno mter langka iye ma dong lua osep

¹⁹ Aitno lungong neser kesua ngaile lumu pmingen itau e Yesus Krais Ano ila luangan ma lua ngong ma ngasongon kalabus ane.

²⁰ Deka lana lungong omba ma ngadue wan ka osuk vala e ngadue wan gesa ka mnak ngong ine kovok. Aurou. Aitno lungong mter langane. Eknikane e mase blang ngadong dagar e ngadue elio itau vala. Deka langka ngadong koke ngamete kodong ngawaiki wan keniye ka ngadue kakai Krais angaine tito la egim.

²¹ Aitno lungong langane. Langka ngadong ke mosongon ane ngadong kap Krais e langka ngamete kodong ma ngadue wan ka itau lokono.

²² Ngaile langka ngadong ma ngakaranga ngadue bokongon ka lua osep pula e dau ngaile ekreng lange ma ngadidie kovok.

²³ Aitno lungong orwo ine. Ngawaiki ngala ngadong kap Krais. Are itau.

²⁴ E dau wan ka itau lokono ngadong ma ngalua umu.

²⁵ Aitno lungong dagar ma ngadong kap umu ma ngakaranga ngalua umu ma aitno lumu ila dagar res polou omba e aitno lumu neser ine.

²⁶ Deka alo ka ngapolou ke umu blang ma umakaranga umakakai Krais Yesus angaine tito la egim batne ke elio ka ngadue.

Osep Filipai ina tinamani elio soulu kesua tidue Ida Tapolngon ila bokongon

²⁷ Wan ka omba langane. Ngawaiki lumu mosongon didi pelengon ka Krais ila omon itau wai ine. Ngawaiki langka ngauti ke umu koke ngauti kovok ma ngaklingen pelengon langane. Umevri dagar e aitno lumu kene pulu e lana lumu kene vala. E umoboko dagar pulu ma umosruk osep ma aitno lisak la dagar ke omon itau.

²⁸ E ngaile upu oul tikaranga tidue umu ma umoulou tarna lumu ke wan bitna bitna kovok. Aurou. Alo ka tivati lumu elio langare tile ma tikluk ke omur hel e dau Ida Tapolngon due umu umodong itau.

²⁹ Ida Tapolngon due elio itau ke umu kodong e aitno lumu la dagar ine. E silang blang Ida Tapolngon songon umu ma umanamani elio ka opru umu batne ke Krais.

³⁰ Oglou umavati elio ka polou ka opru ngong e eknikane umoklingen ine blang. Elio ka polou ka opru umu isak eriar langka elio ka polou ka opru ngong blang.