Filemon 1 - Aria New Testament

¹ Ngong Pol e ngadong ke kalabus ane kesua batne ngaboko ke Krais Yesus ila bokongon. Ngong imorwo Timoti imosogo pas ane uti ke wom Filemon. Wom limem aten lokono e omdue bokongon eriar langka imi.

² E imosogo pas ane ke apmang Apia e ke gute Arkipus blang. Imogosok Arkipus imo-boko dagar ke Ida Tapolngon ila bokongon. E silang blang imo-sogo pas ane ke sios ka duni pulu ke lem ninu.

³ Ngawaiki Ida Tapolngon ka Pmada kap Ida Puda Yesus Krais timakai umu e tidue aitno lumu epen.

Pol aitno itau ke Filemon ila elio

⁴ Lou aten Filemon. Aling aling alo ka ngawai itau ke Ida Tapolngon aitno lungong mter ke wom deka ngawai tenkyu ke iye batne ke wom e ngawai itau ke wom.

⁵ Aitno lungong itau kesua ngaklingen omon langane. Aitno lugom la dagar ke Ida Puda Yesus e wom lana wom ke Ida Tapolngon ila osep keniye.

⁶ Aitno lite ila dagar eriar e itogosok iteneklep ke Krais. E ngawai itau ke Ida Tapolngon ma iteile omur ke kerengen ka pula keniye ka itodue ke Krais.

⁷ Lou aten aitno lungong itau ke wom. Ngaklingen wom lana wom ke Ida Tapolngon ila osep e ke elio ane omdue aitno lisak ila dagar dong dagar. Deka lem elio tonari due aitno lungong neser omba e ngadong itau ine.

Pol waiki Filemon due elio itau ke Onesimus

⁸ Omdue elio tonari kodong e ngawaiki ngawai ke wom ke elio silang. E ke Krais ngakaranga ngawai dagar ma emdidi lou pele-ngon.

⁹ E dau ma ngadue langane kovok. Ngapmi wom ine vala kesua ngong lana ngong ke wom. Ngong Pol ngong gute namor e ngong Krais Yesus ila gute meriang ina e ke batne ane osep tidue ngong ngasep ke kalabus.

¹⁰ Ngapmi wom ke gute Onesimus. Alo ka ngadong ke kala-bus ngawai ke iye ke Ida Tapolngon ila pelengon deka aitno la dagar ke Krais. Deka iye polou langka erigu.

¹¹ Ke oglou ila bokongon lua wom kovok kesua iye boko ulik ulik e boko itau kovok. E oku ane iye boko itau e ila bokongon lua ngong e iye karanga lua wom blang.

¹² Ngong lana ngong ke iye e ngapagei iye bauluk iding ke wom.

¹³ Ngadong ke kalabus ane batne nganapapra Yesus Krais ila omon itau. E ngawaiki iye dong kap ngong e lua ngong e ke elio ane iye langka kasip amun wom alo ka ngadong ke kalabus ane.

¹⁴ E ngawaiki ngaplau wom ine kovok. Aurou. Ngawaiki iye dong e lua ngong e dau ngawaiki emdidi aitno lugom langka amwaiki iye lua ngong koke aurou.

¹⁵ Aitno lungong mter langka Onesimus songon wom batne langane. Iye songon wom sasi boto vala ma mase iye iding ke wom e dong kap wom aling aling.

¹⁶ E oku ane aitno lugom mter iye lem wokboi nating vala kovok. Aurou. Aitno lugom mter iye wom supmu gesa ka aitno lugom itau ke iye. Ngong lana ngong ke iye e dau wom lana wom omba ke iye. Kesua iye lem wokboi nating e silang blang iye wom supmu gesa ke Krais ila osua.

¹⁷ Ate Filemon. Itorwo itodue Ida Puda ila bokongon deka ma omdue Onesimus e aitno lugom itau ke iye langka aitno lugom itau ke ngong.

¹⁸ E langka iye due elio soulu gesa ke wom koke wan gesa ina klingen munu pes iye ma ngakoli batne.

¹⁹ Ngong Pol ngasogo pas ane. Ma ngakoli batne ke wan tonari. Ngawai langane lama emtem uli ke lem aglunga omba ke ngong kesua ompolou Krais ila gute batne ke lou bokongon.

²⁰ Lou aten. Ngawaiki omdue elio itau ke ngong kesua itorwo iteneklep ke Ida Puda. Ngawaiki omdue elio itau ka due aitno lungong dong itau.

²¹ Ngasogo pas ane e aitno lungong dagar ma emdidi lou pelengon e silang blang aitno lungong dagar ma omdue elio itau ka mole wan ka ngasogoe kodong.

²² E lou pelengon silang blang langane. Aling aling umawai itau ke Ida Tapolngon ke ngong kodong e ke batne langane aitno lungong mter langka isuk boto ma ngasongon kalabus e ngapolou ke umu. Deka emkere eliang ke lem ninu ma ngamunu ine.

Osep tiwai “oklou itau” ke Filemon

²³ Ngong imorwo Epafras imodong ke kalabus ane kesua imodue Krais ila bokongon. E Epafras wai “oklou itau” ke wom.

²⁴ E Mak e Aristarkus e Demas e Luk ka imogosok imoboko tiwai “oklou itau” ke wom blang.

²⁵ Ngawaiki Ida Puda Yesus Krais ila makaingan dong kap wom.