Efesus 6 - Aria New Testament

Pelengon ane la ke agau keniye e sipmarak e titnarak

¹ Umu agau umedidi sipmomu e titnomu urok pelengon eriar langka Ida Puda waiki umedidie. Umodue elio langane kesua elio ane itau lokono.

^2-3 Ida Tapolngon ila pelengon wai langane. “Umodue anit ke sipmomu e titnomu. Kesua langka umodue anit ke isak ma elio itau polou ke umu e ma lumu maglakngan dong tauni ke taklak ane.” Pelengon palma ane pelengon dagar mgongon ina ka Ida Tapolngon wai ila promis kape.

⁴ E umu arang ka titopmu tidong umodue elio gesa ka soulu ke titopmu ka due aitno lisak engil ke umu kovok. Umekere isak itau ke elio ka didi Yesus ila elio. Langka tini lumu pelengon kovok deka umenis isak ine. Umaparere titopmu ke Ida Puda ila pelengon itau e ke ila elio itau.

Umoboko ke gute ka plau umu ila bokongon itau

⁵ Umu ka wokboi nating umoboko lumu bokongon ke elio langane. Umeini upu gute ka plau umu ila pelengon. Umodue anit ke iye e umedidi ila pelengon lokono. Aitno lumu mter ke wan langka upu gute aitno mter ine e umoboko ke ila bokongon eriar langka umoboko ke Krais ila bokongon.

⁶ Umoboko engil ke upu gute ila bokongon aling ka pula keniye. Umoboko engil lama iye karanga vati umu koke iye karanga vati umu kovok. Umodue elio langane kesua umu Krais ila osep bokongon ina. Deka umoboko engil ke upu gute ila bokongon eriar langka Ida Tapolngon waiki umodue.

⁷ Alo ka umoboko ke upu gute ila bokongon aitno lumu itau ine. Kesua bokongon tonari eriar langka itodue Ida Puda Krais ila bokongon. E bokongon tonari langka itosep udo bokongon vala kovok.

⁸ E umeile langane. Osep ka tidue urok bokongon itau ma Ida Puda lua isak itau ke ila kerengen. Kesua batne tiboko itau ke urok bokongon tonari. Ma iye due elio langane ke osep ka isak wokboi nating e ke osep ka tidong fri blang.

⁹ Umu ka osep leklou inarak plaungan umodue elio itau ke osep ka tidue lumu bokongon eriar langka tidue elio itau ke umu. Umeiluk isak soulu sakam lama tilim ke umu. Kesua umu ka osep leklou inarak plaungan e umu ka umodue upu gute ila bokongon Upu Puda ka dong ke omur heven iye kene. E iye didi elio kene deka wade osep keniye urok elio ine.

Yesus ila osep tikere isak ke evlei

¹⁰ E umoklingen pelengon ane ka neklep ke lou pelengon tonari ka langane. Umeneklep ke Ida Puda ka ila arit ombatno lokono kodong. Deka umodong dagar lokono ine.

¹¹ E umekere umu itau eriar langka osep ola ina tikere isak itau. Osep ka tidue ola titnei klos pait ka osep ola ina urok klos pait. Deka umu ka Yesus ila osep umekere umu itau ma umadangdang Satan ila elio yakngan ina bitna bitna ke umu ma umodong dagar vala.

¹² Itekere ite itau lokono kesua itodong itodue evlei ke ida oul ka isak osep kovok. Aurou. Oku ane langka aivoro lokono e itodong itodue evlei ke Satan e angelo soulu. Itodue evlei ke angelo soulu leklou ka tivri mgo e angelo soulu leklou ka tiplau angelo soulu ka pula e angelo soulu leklou ka urok arit ombatno.

¹³ Deka umekere umu itau ke klos pait ka Ida Tapolngon kar isak ke umu ma umodue ola ine ke upu oul. Umekere umu itau ma alo ka taim soulu polou e Satan due ola ke umu deka umakaranga umadangdang ila ola e umevri dagar vala.

¹⁴ Umodong umekere umu itau. Eriar langka gute ola ina pou let ke palma umopou pelengon lokono ke palma lumu. Eriar langka gute ola ina pou wan langka siot kapa ke omun ine umopou elio ka itau lokono ke omun lumu.

¹⁵ Eriar langka gute ola ina sep ke ila su ma iye lila itau ine umekere kopmu ma umapaur Ida Tapolngon ila omon itau ke osep leklou. Deka osep ka aitno lisak dagar ke omon itau e Ida Tapolngon ma aitno lisak epen pulu.

¹⁶ E gute ola ina kalke osua ma iye dangdang ola ka ina oul urie la ine. E ke umu lumu osua aitno lumu ila dagar ka la dagar ke Ida Tapolngon. Deka umekis dagar ke aitno lumu ila dagar. Kesua ma dangdang Satan ila ola ka tinevlikvlik ka iye uri isak ke umu.

¹⁷ E gute ola ina sin hat kapa ma dangdang ina oul ila elil e ila ola. Deka elio ka Ida Tapolngon lua umu ke lumu elio epmes ina iye eriar langka lumu hat kapa ka lua umu. E gute ola ina uri elil ma iye mole ina oul. E lumu elil Ida Tapolngon ila pelengon. Kesua ila pelengon dong eriar langka lumu elil ka Ano Itau lua umu ine.

¹⁸ Alo ka Ano Itau due aitno lumu e waiki umawai itau ke Ida Tapolngon ma iye lua umu ke lumu elio isuk isuk deka umawai itau ke iye. E oklou aling aling umeile umu itau e umawai itau ke Ida Tapolngon e umosongon elio ane kovok. E silang blang langane. Umawai itau ke Ida Tapolngon ma iye lua ila osep ke urok mosongon.

¹⁹ E silang blang langane. Umawai itau ke Ida Tapolngon ma iye lua ngong ma ngaulou tarna lungong kovok. E ma ngawai malak ke ila omon itau vala. Umolua ngong ma ngawai malak ke osep ke Ida Tapolngon ila omon itau ka oglou osep tile ine kovok.

²⁰ Ngong langka Krais ila gute meriang ina e ngadong ke kalabus ane kesua nganapapra Ida Tapolngon ila omon itau ka iye rere ma ngadue. E umawai itau ke Ida Tapolngon ma ngaulou tarna lungong kovok. Kesua ngawaiki ma ngawai Ida Tapolngon ila omon itau ke osep eriar langka iye waiki ngadue.

Pol babrum ila pelengon

²¹ Ite lana ite ke gute Tikikus e iye boko dagar ke Ida Puda ila bokongon. Ma iye uti polou ke umu deka ma iye palongo lumu ke lou mosongon. Ma umeile ke lou elio isuk isuk e ke elio bitna bitna ka polou ke ngong.

²² Ngavai iye ma iye uti polou ke umu ma umeile omur ke imi. Ngawaiki iye palongo lumu ke limem mosongon ma ila pelengon due aitno lumu tipolou dagar lokono.

²³ Sipmi. Aitno lungong lang-ane. Ngawaiki Ida Tapolngon ka Pmada e Ida Puda Yesus Krais tidue aitno lumu epen pulu. Ngawaiki tidue aitno lumu ila dagar dong dagar e ma umu lana umu pulu.

²⁴ Ngawaiki Ida Tapol-ngon ila makaingan dong kap umu ka aling aling umu lana umu ke Ida Puda Yesus Krais. E oku ane lou pelengon yagos.