Efesus 5 - Aria New Testament

Itedidi elio oku ina

¹ Umopolou Ida Tapolngon titno ka iye lana iye ke umu omba kodong. Deka umakana elio itau ka aling aling Ida Tapolngon due.

² Krais lana iye ke ite omba deka iye mana ke ina akai e mete ine. Iye pli tarna e polou langka sipsip gesa ka osep tidue elio opmu ina ine deka iye mete. Deka ina metengen e ina marau bakop Ida Tapolngon aitno e aitno itau ine. Deka umu lana umu ke osep eriar langka Krais lana iye ke umu. Ma lumu elio tonari langka amnangan itau lokono ka Ida Tapolngon aitno itau ine.

³ Ida Tapolngon ila osep umu deka umedidi ila elio itau e umodue elio soulu bitna bitna sakam. Umoklou lumu sasap e lumu soboget sakam. Umeisu ulik ulik sakam. Umangale osep leklou urok wan sakam. Lama osep tiwai umodue elio epmes ina gesa ka langane.

⁴ Umabasik pulu ke elio soulu bitna bitna sakam. Umabasik pulu ulik ulik sakam. Umawai apok ke elio soulu bitna bitna sakam. E umu ka Yesus ila osep umodue elio langane. Umawai tenkyu ke Ida Tapolngon ke wan ka iye due. Kesua iye due elio itau lokono ke umu.

⁵ E umeile kodong osep ka tiklou sasarak e urok soboget ma tidong ke omur ka Ida Tapolngon e Krais tiplaue kovok. E osep ka tidue elio soulu bitna bitna e tingale osep leklou urok wan ma tidong ke omur ka Ida Tapolngon e Krais tiplaue kovok. Osep ka tingale wan bitna bitna urok elio eriar langka aitno lisak la ke sapingen gesa ka tiwaiki isak inarak tapolngon.

⁶ Umeile umu itau lama osep leklou tipagolgol aitno lumu ke pelengon yakngan. Lama tipagolgol aitno lumu e umodue elio epmes ina bitna bitna. Kesua Ida Tapolngon aitno engil lokono ke osep ka tidue elio epmes ina bitna bitna e tiklingen ila pelengon kovok.

⁷ E umeneklep ke osep tonari ka tidue elio soulu bitna bitna sakam. Umapaur pulu ke isak vala.

⁸ Oglou umodong ke aivoro. E eknikane langane kovok. Kesua umopolou Ida Puda ila osep deka umodong langka Ida Tapolngon ila esluk. Deka umodue elio itau bitna bitna eriar langka osep ka tidong ke bublongon tidue.

⁹ Osep ka tidong ke bublongon tidue elio ka itau e urok pelengon keniye lokono vala.

¹⁰ Umotoke ma umekrim ilengen ke elio ka Ida Puda aitno itau ine.

¹¹ Umeneklep ke osep ka tidue elio epmes ina bitna bitna sakam. Kesua elio epmes ina bitna bitna tipolou ke aivoro. E umenis osep ke elio itau vala ma osep tile omur elio epmes ina tonari wan ka soulu lokono vala.

¹² Kesua urok elio epmes ina bitna bitna ka tikukwop isak e tidue dau mnak isak ine. E ite mnak ite blang langka itawai ine.

¹³ Lama langane langka itawai malak ke osep ke urok elio epmes ina bitna bitna ma tile urok elio isuk isuk soulu lokono. Ma tile omur urok elio epmes ina bitna bitna soulu lokono kesua itawai malak ke isak ine.

¹⁴ Deka alo ka umapalongo osep ke urok elio epmes ina urok elio tonari polou malak ke osep. Oglou gute gesa wai pelengon ano langane. “Wom ka omdong langka ommunu kudung emtipa. Wom ka omdong langka emmete emtito e Krais ma due wom omdong ke bublo-ngon.”

¹⁵ Deka umeile umu itau lama lumu elio isuk isuk eriar langka osep ka aitno lisak kaka. Umodue elio isuk isuk eriar langka osep ka tile omur ine tidue.

¹⁶ Aling aling umodue elio itau vala e aling kene gesa umodue elio soulu kovok lama umodong adai. Oku ane taim soulu kesua osep ka pula isak osep soulu bitna.

¹⁷ Deka umodue elio ulik ulik langka osep ka isak manga manga tidue sakam. Umekrim ekreng ke elio ka Ida Puda waiki umedidie.

¹⁸ E umeinim aki galou wain pula sakam lama omtomu balilu. Langka umodue elio langane ma paiavu umu. E umosongon Ano Itau ma plau umu vala.

¹⁹ Alo ka umu ka Yesus ila osep umoduni pulu umodue sakul ka didi Ida Tapolngon ila pelengon ka dong ke Buk Song. Umodue sakul ka kakai Ida Tapolngon angaine tito la egim. Umodue sakul ka la ke Ida Tapolngon ka due aitno lumu dagar ine. Umodue sakul ke aitno lumu e umakakai Ida Puda angaine tito la egim ine.

²⁰ E aling aling umawai tenkyu ke Ida Tapolngon ka Pmada kesua batne ke wan bitna bitna ka iye lua umu ine. Umawai tenkyu ke Ida Tapolngon kesua batne ke Ida Puda Yesus Krais dong.

Pelengon ane la ke osep pasinga

²¹ Umu kenmu kenmu ume-didi aitno lumu ke lumu elio bitna bitna kovok. Aurou. Umodue anit ke Yesus ila osep keniye e umodue elio ka itau vala ma isak keniye aitno lisak itau ine. Umodue elio langane kesua umodue anit ke Krais.

²² E umu apmang ka pasinga umodue anit ke lumu soboget e umedidi urok pelengon eriar langka umedidi Upu Puda ila pelengon.

²³ Umodue elio langane kesua gute arang mgo plau esna eriar langka Krais mgo plau ila osep. Krais tona Ida Tapolngon ila osep Inarak Luangan deka ite ka Yesus ila osep ite Krais pampamu ine.

²⁴ Deka umu apmang ka pasinga umedidi lumu soboget urok pelengon eriar langka Yesus ila osep tididi Krais ila pelengon.

²⁵ E umu arang ka pasinga umu lana umu ke lumu sasap eriar langka Krais lana iye ke ila osep. Krais lana iye ke ite omba. Deka iye pli tarna e mete ma iye lua ite.

²⁶ Krais pli tarna e kasip amunte. Deka eriar langka iteris pampamu lite ma tipolou eip Krais waiki ris aitno lite ke ila pelengon ma aitno lite tipolou itau lokono. Krais ris ite ka ila osep ke ila pelengon kesua iye waiki due ite itopolou itau lokono ke iye tona bitna.

²⁷ Krais due langane kesua iye waiki ila osep urok elio gesa munu pes isak kovok. Iye waiki ila osep tidong itau lokono. Iye waiki elio gesa ka soulu dong kap isak kovok.

²⁸ Krais lana iye ke umu omba. Deka umu arang ka pasinga umu lana umu ke lumu sasap eriar langka umu lana umu ke pampamu lumu. Kesua gute ka lana iye ke esna iye lana iye ke iye tona pampamu ine.

²⁹ E umeile omur langane. Itosep itapaiavu pampamu lite kovok. Aurou. Itekere pampamu lite itau e itangen ngangon itau ma pampamu lite tidong itau vala. Elio ka itekere pampamu lite itau eriar langka elio ka Krais kere ila osep itau.

³⁰ Krais kere ila osep itau kesua ite keniye ka ila osep ite Krais pampamu ine.

³¹ Osep ka tisogo Ida Tapolngon ila pelengon tisogo langane. “Ma gute songon timla e tna e ma iye orwo esna tiblet pulu. Ma isak orwo tidong langka gute kene.”

³² Pelengon tonari omba lokono deka ngawai langane. Aitno lungong langka pelengon tonari pelengon ano ka lana ine la ke Krais e ke ila osep.

³³ E pelengon tonari ina pelengon silang blang langane. Osep arang ka pasinga ma isak lana isak ke sasarak eriar langka isak lana isak ke isak kensak kensak. E umu apmang ka pasinga umodue anit ke lumu soboget.