Efesus 4 - Aria New Testament

Yesus ila osep tineklep ke Krais langka isak Krais pampamu ine

¹ Osep leklou tidue ngong ngadong ke kalabus ane kesua ngaboko ke Ida Puda ila bokongon. E Ida Tapolngon rere umu ila osep umu deka ngawai dagar ke umu langane. Umodue elio itau ka iye waiki umodue ma lumu elio isuk isuk keniye itau.

² E umakakai angainmu kovok. Umodue elio molil molil e aitno lumu epen. Langka osep leklou tidue elio soulu ka sruk aitno lumu io aitno lumu nevlik ine kovok. Aitno lumu tidong epen vala ma lumu elio itau nis osep langane. Umu lana umu ke isak.

³ Ida Tapolngon tuk Ano Itau me dong ke aitno lumu e due aitno lumu kene pulu. Deka umoboko dagar ke elio ka aitno lumu kene pulu. Kesua elio ka Ano Itau due aitno lumu epen pulu eriar langka akai ka apmang tigrume e tidue galou e tigilgile batne kene.

⁴ Yesus ila osep keniye isak eriar langka Krais pampamu ine ka kene vala. E Ida Tapolngon Ano Itau ka dong ke aitno lite iye kene vala. Deka Ida Tapolngon wai ke ite ke wan kene vala ka itapara ine.

⁵ E Ida Puda iye kene vala. E pelengon kene vala dong ka aitno lite ila dagar dong dagar ine. Deka itodue elio paunimngen ina kesua batne ke gute kene vala.

⁶ Ida Tapolngon kene vala dong ka ite ka pula keniye Pmada. Iye tona osep ka pula keniye Inarak Puda deka iye plau isak. Deka ila osep keniye tidue elio ka iye waiki tidue e iye dong kap isak ke aitno lisak.

⁷ E Krais didi aitno e kar ila makaingan ke ite kente kente ka iye waiki lua ite ine.

⁸ Osep ka tisogo Ida Tapolngon ila pelengon ka la ke Krais tisogo langane. “Alo ka iye tito la ke omur ka egim iye due osep ka tidong ke kalabus tigosok iye kla. Iye due isak tigosok iye kla deka ari iye kere osep ke ila kerengen ka iye waiki kere isak ine.”

⁹ Pelengon ka osep tisogo “iye tito la ke omur ka egim” batne langane. Iye duru ke taklak aitno mgo deka mase iye tito la ke omur heven blang.

¹⁰ E langane. Gute ka duru dong ke taklak iye tona gute ka mase bauluk tito ke omur ka dong egim. Deka iye dong ke omur ka pula keniye ka tidong ke taklak e ka tidong egim.

¹¹ Krais tona lua osep ke ila kerengen. Iye rere osep leklou ma isak osep aposel. E iye rere osep leklou ma isak osep napaprangan ina. E iye rere osep leklou ma tinapapra Ida Tapolngon ila omon itau ke omur omur. E iye rere osep leklou ma tiplau Yesus ila osep e ma tiparere isak ke ila pelengon.

¹² Krais rere osep tonari ma tiboko langane. Iye waiki urok bokongon lua Yesus ila osep keniye ma isak kensak kensak tiboko itau ke Ida Tapolngon ila bokongon. Ma urok bokongon due Yesus ila osep keniye ka isak Krais pampamu ine tipolou dagar ke Ida Tapolngon ila elio itau.

¹³ Ma Yesus ila osep tiboko langane deka ite keniye ka ila osep ma aitno lite ila dagar kene pulu ke Ida Tapolngon ila pelengon. E ma iteile omur ke Ida Tapolngon Otno Arang. Ma itodong langka osep ngongle ka aitno lisak ila dagar polou dagar lokono ke Krais kodong. Ma aitno lite dagar ke Ida Tapolngon eriar langka Krais aitno dagar ke iye.

¹⁴ Deka ite ka aitno lite dagar langane ma itodong langka agau sondia ka aitno lisak ila dagar dau polou dagar kovok? Aurou. E langka osep soulu bitna tiwaiki urok pelengon yakngan pagolgol aitno lite ma itedidie ma urok pelengon bure vala. Ma aitno lite segesege ke pelengon yakngan langka sip ka misuon ina boitini bakulkule kovok. Ma aitno lite dong dagar vala.

¹⁵ Deka ma ite lana ite ke osep e itawai pelengon lokono ke osep keniye. Langka itodue elio langane ma itopolou dagar lokono ke Krais ila elio keniye. Itodong langka Krais pampamu ine e iye dong langka otuk lite ka mgo ke ite.

¹⁶ E iye plau ite keniye e kis ite keniye dagar. Deka eriar langka gute gesa pampamu ine ongwa ine bitna bitna tiblet pulu dagar deka Krais blang kis ite ma itodong dagar pulu. E langka ite ka Krais pampamu ine itolua ite pulu itau e ite lana ite pulu ma ite keniye itopolou dagar lokono. Deka itodong dagar lokono.

Ite ka Yesus ila osep itedidi elio oku ina

¹⁷ E ngawai dagar ke umu ke pelengon ane kesua batne Ida Puda dong. Umodue elio epmes ina bitna bitna eriar langka osep ka isak osep Yuda ina kovok tidue sakam. Kesua tididi aitno lisak ka kaka lokono vala.

¹⁸ Osep tonari aitno lisak langka aivoro lokono. E Ida Tapolngon lua isak ke elio oku ina kovok. E tipono aitno lisak ke Ida Tapolngon deka aitno lisak kaka.

¹⁹ E tidue elio epmes ina bitna bitna ka osep pula mnak isak ine e osep tonari mnak isak ine kovok. Tipul dogur ke elio itau e tidue elio soulu lokono vala. Tidangdang pampamu lisak ke elio ka due aitno lisak amum kovok e tidue vala.

²⁰ E alo ka umoklingen ke Krais umoklingen ke elio soulu bitna bitna tonari kovok.

²¹ Osep ka tiparere umu ke Yesus ila elio tiwai ke umu ke pelengon lokono. Deka umoklingen ine e umedidie.

²² Deka umosongon lumu elio epmes ina bitna bitna ka oglou tiplau umu. Umosongon elio tonari kesua elio epmes ina bitna bitna tonari due aitno lumu soulu lokono e paiavu umu.

²³ E umosongon elio oglou ina ka oglou aitno lumu mter ine e eknikane aitno lumu mter ke elio oku ina vala.

²⁴ Umedidi elio oku ina kesua Ida Tapolngon due elio oku ina polou ka itau lokono eriar langka iye tona ka itau lokono. Iye due elio oku ina polou ma umedidie ma osep keniye tivati lumu elio isuk isuk itau lokono. Umodue langane e ma Ida Tapolngon aitno itau ine.

²⁵ E umayakyak umu pulu sakam. Umu keniye umawai pele-ngon lokono pulu vala. Kesua ite keniye pampamu lite Krais pampamu ine ka kene. Deka ma itawai lokono pulu.

²⁶ Langka aitno lumu engil ke gute gesa umeile umu itau lama umodue elio epmes ina blang. E umosongon aitno lumu dau dong engil ke iye alo ka oklou duru kovok.

²⁷ Umeile umu itau lama umoklok ekreng bitna ke Satan ma iye tok umu.

²⁸ Umu ka oglou umapanako wan bitna bitna umodue elio langane sakam. Umoboko vala ma lumu wan bitna bitna tipolou e tidong. Kesua gute ka boko deka ila wan polou ma karanga tuk ila wan ma leklou la ke osep ka urok wan isuk boto vala.

²⁹ Umawai pelengon ka soulu kovok e umawai pelengon ka itau vala. Kesua pelengon ka itau ma lua osep ke urok mosongon e ma due aitno lisak itau e tile omur itau. Deka ma lumu pelengon lua osep ka tiklingen ine.

³⁰ Umodue elio soulu ka due Ida Tapolngon Ano Itau kro ine kovok. Kesua Ida Tapolngon due Ano Itau sep ke aitno lumu deka iye rere umu ila osep umu. E Ano Itau ka dong ke aitno lumu iye nisngen umu Yesus ila osep. Deka mase ma Ida Tapolngon due umu ka Ano Itau dong ke aitno lumu ma lumu elio epmes ina munu pes umu kovok e umodong kap iye.

³¹ Umosongon elio ka amnga umu ke osep leklou. Umosongon elio ka aitno lumu nevlik amnga ke osep. Umosongon elio ka aitno lumu engil ke osep. Umosongon elio ka umawai omba e opmu tuk pulu kap osep e ke elio ka umoblou osep dogursak. Umosongon elio ka aitno lumu soulu ke osep. Umodue elio gesa ka soulu sakam.

³² Umodue elio itau vala ke osep e umodue mada ke isak ma aitno lumu itau pulu. Umasak elio soulu ka osep tidue ke umu eriar langka Ida Tapolngon sak lumu elio soulu e klok lumu elio epmes ina. Kesua Krais dong.