Efesus 3 - Aria New Testament

Pol napapra Ida Tapolngon ila pelengon ke osep pula

¹ Ngong Pol nganapapra Ida Tapolngon ila omon itau ke umu ka osep Yuda ina kovok. Deka osep Yuda ina leklou aitno lisak engil lokono ke ngong ine e tidue ngong ngadong ke kalabus ane. Ngadong ine e ngawai itau ke Ida Tapolngon ma iye lua umu.

² Umeile omur kodong Ida Tapolngon didi ila makaingan e rere ngong e kar bokongon ane ke ngong ma ngadue. Iye rere ngong ine kesua ma lou bokongon lua umu.

³ Deka iye due aitno lungong ma ngaile omur ke wan ka iye laloe ke oglou e iye palongo osep ine kovok. Ngasogo ke wan ka iye laloe tonari sasi boto ke pas ane.

⁴ Langka umedidi pelengon ka dong ke pas ane ma umeile omur ke wan ka iye laloe ka langane. Ma umeile omur Ida Tapolngon due aitno lungong mgo. E ngaile omur ke pelengon lokono ka oglou osep tile ine kovok. E Krais due polou lokono kodong.

⁵ Oglou Ida Tapolngon palongo osep ke pelengon lokono tonari kovok. E osep dau tile ine kovok. E alo ane Ida Tapolngon Ano Itau due ila aposel e osep napaprangan ina ka iye rere isak e palongo urok ine.

⁶ Deka langane. Pelengon lokono ka Ida Tapolngon aitno mter ine e palongo osep ine kovok la ke Krais. Ida Tapolngon ila omon itau ka la ke Krais due osua ka isak osep Yuda ina kovok tineklep ke osua ka isak osep Yuda ina. Deka osua kene vala dong. E iye lua osua ka kene ke ila promis ka oglou iye wai promis ke osua ka isak osep Yuda ina ine. Ida Tapolngon wai promis kodong e Krais Yesus due promis tonari polou lokono.

⁷ Ida Tapolngon kere ngong itau ke ila makaingan. E iye rere ngong Krais ila gute bokongon ina gesa ma nganapapra ila omon itau. Deka ila arit due aitno lungong dagar ine.

⁸ E angain ngong omba kovok. Aurou. Ida Tapolngon ila osep keniye angainsak timole angain ngong. Lama langane Ida Tapolngon kere ngong ke ila makaingan. E ngapaur Ida Tapolngon ila omon itau ke umu ka osep Yuda ina kovok. Omon tonari palongo udo ke wan keniye ka itau lokono ka Krais kare ke ite e itakaranga iteile aikovoli ine kovok.

⁹ Oglou ari Ida Tapolngon due wan bitna bitna keniye ka tidong. Alo ari pelengon leklou polou malak kovok. Iye bisi ine ke aitno vala e osep tile ine kovok. E pelengon tonari dong ke iye vala. E eknikane langane. Ida Tapolngon rere ngong ma nganapapra ila pelengon tonari. Kesua iye waiki osep tile omur ke elio ka iye due kodong e waiki pelengon tonari polou malak ke osep.

¹⁰ Ida Tapolngon due ila pelengon ka oglou iye kukwope polou malak ke ila osep kodong. Iye due langane kesua iye waiki ensel keniye ka tivri mgo e tiplau wan ke omur heven ma tivati Yesus ila osep urok mosongon. Deka ma tile omur Ida Tapolngon ila ilengen ombatno lokono e iye ile wan bitna bitna keniye.

¹¹ Oglou oglou ari alo ka Ida Tapolngon dau due wan bitna bitna keniye kovok iye rere elio keniye ka mase ma tipolou. Deka alo ka Ida Puda Krais Yesus me duru ke taklak elio ka oglou oglou ari Ida Tapolngon aitno mter ine tipolou lokono.

¹² Iteneklep ke Krais kesua aitno lite dagar ke iye. Deka itakaranga itawai itau ke Ida Tapolngon e itoulou tarna lite ine kovok. E iteile omur iye klingen udo pelengon kesua batne aitno lite dagar ke Krais.

¹³ E langane. Umeile omur osep tidue elio soulu bitna bitna ke ngong kesua batne ngaboko ke Ida Puda ila bokongon ma lou bokongon lua umu. E ngawai ke umu ma aitno lumu kro ine kovok. Kesua elio bitna bitna ka opru ngong karanga lua umu e aitno lungong itau ine.

Krais lana iye omba ke ite

¹⁴ E langane. Ida Tapolngon due elio itau lokono tipolou ke umu. Deka ke batne langane ngagrum kongu buno duru ke taklak e ngawai itau ke Pmada ine.

¹⁵ Ngawai itau ke Ida Tapolngon ka Pmada lokono. Kesua ila osua keniye ka tidong ke omur heven e ka tidong ke taklak Pmarak lokono Ida Tapolngon. E iye kar isak angainsak.

¹⁶ Ida Tapolngon ila arit ka ombatno dong ke omur heven. Deka ngapmi iye ma Ano Itau lua umu ke ila arit. Ngapmi iye ma ila arit due aitno lumu ma aitno lumu tidong dagar.

¹⁷ Ngapmi Ida Tapolngon ma Krais dong vala dong ke aitno lumu. Ngapmi Ida Tapolngon ma aitno lumu ila dagar dong dagar ke iye. Ngapmi Ida Tapolngon ma iye lua umu ma umeile omur iye lana iye omba ke umu. Deka umu langka akai ka vri ke taklak e gigitno kis dagar ke taklak.

¹⁸ Ngapmi Ida Tapolngon langane kesua ngawaiki ma umeile omur ke elio ka Krais lana iye ke ite e ila osep leklou keniye. Kesua elio ka Krais lana iye ke ite wan ka ombatno ombatno lokono. E la mawa lokono. E tito la egim e duru ke moli. Kesua iye lana iye ke ite ombatno lokono.

¹⁹ Ngawaiki ma umeile omur ke elio ka Krais lana iye ke umu. Elio ka Krais lana iye ke ite mole itosep udo ilengen e itakaranga iteile omur ine kovok. E dau ngawaiki Ida Tapolngon lua umu ke ila elio ka keniye itau lokono ma ila elio bon ke aitno lumu. Deka ngawaiki ma lumu elio isuk isuk tididi ila elio ka itau lokono.

²⁰ E langane. Ida Tapolngon ka ila arit ombatno lokono dong e due aitno lite deka aitno lite tidong dagar ke iye. Alo ka aitno lite timter ke elio gesa e alo ka itepmi Ida Tapolngon ke elio gesa iye karanga lua ite ine. E langane. Aitno lite karanga timter kovok ke elio gesa ka Ida Tapolngon karanga lua ite ine kovok. E itakaranga itepmi Ida Tapolngon kovok ke elio gesa ka iye karanga lua ite ine kovok.

²¹ Deka ite ka Yesus ila osep itakakai Ida Tapolngon angaine tito la egim lokono. Kesua ite ka Yesus ila osep iteneklep ke Krais Yesus kodong. E itakakai Ida Tapolngon angaine tito la egim lokono dong vala dong. Lokono.