Efesus 2 - Aria New Testament

Ida Tapolngon due ite iteneklep ke Krais

¹ Oglou umeini Ida Tapolngon ila pelengon kovok e umodue elio epmes ina bitna bitna vala. Deka elio epmes ina tek umu ke Ida Tapolngon. E umodong langka osep ka angainsak timete kodong.

² Deka ari umodue elio epmes ina bitna bitna eriar langka osep epmes ina ka tidong ke taklak ane tidue. Alo ari Satan ka plau angelo soulu plau umu blang. Iye plau umu kesua iye plau osep ka talsak klingen Ida Tapolngon ila pelengon kovok.

³ Oglou ite blang itodong kap osep tonari e itodong soulu eriar langka isak tidong soulu. E itedidi aitno lite oglou ina e itodue elio epmes ina bitna bitna ka aitno lite mter ine e pampamu lite waiki itodue. Deka itanamani ine kesua Ida Tapolngon aitno engil lite eriar langka aitno engil ke osep epmes ina keniye.

⁴ Lama itodong soulu langane Ida Tapolngon ka aitno due ite lana iye omba ke ite.

⁵ Iye lana iye omba ke ite e alo ari talda klingen Ida Tapolngon ila pelengon kovok e udo elio epmes ina tek ite ke Ida Tapolngon. Deka itodong langka osep ka angainsak timete kodong. E dau Ida Tapolngon makai ite e lua ite ke udo elio epmes ina. Deka iye due ite itopoga itetito e itodong blang e iteneklep ke Krais.

⁶ Iteneklep ke Krais Yesus kodong. Deka eriar langka Ida Tapolngon due Krais Yesus poga tito e dong blang iye blang due ite itopoga itetito e itodong blang. Iye due langane ke ite e ma itodong kap Yesus ke omur heven.

⁷ Deka Ida Tapolngon due ila makaingan polou lite ma dong nisngen ke osep ka pula keniye ka mase tipolou tidong ma tile omur ke ila makaingan ka ombatno lokono batne ke Krais Yesus dong.

^8-9 Ida Tapolngon lua umu ke lumu elio epmes ina kesua batne ke ila makaingan ka dong ke iye tona. Iye lua umu ke lumu elio epmes ina kesua aitno lumu la dagar ke Krais. E iye lua umu kesua batne ke elio kene gesa ka umodue kovok. Aurou. Iye didi aitno e lua umu adai vala. Deka umakaranga umakakai angainmu ine kovok.

¹⁰ Ida Tapolngon due ite itopolou itau e due ite iteneklep ke Krais Yesus. Iye due langane kesua iye waiki ma itodue elio isuk isuk ka itau vala. Oglou iye rere elio ka itau vala ka iye waiki itodue.

Osep Yuda ina e osep ka isak osep Yuda ina kovok urok osua kene vala batne ke Yesus

¹¹ E omtomu sisir langane. Oglou umodong ke osep Yuda ina urok osua kovok. E osep Yuda ina ka tisir isak osep ka tididi elio ulangngan ina ka osep tidue ke tarna lisak tisir umu osep ka umedidi elio ulangngan ina kovok.

¹² Alo ari umu dau umeneklep ke Krais kovok. E ari umodong ke osep Israel ina urok osua kovok e umeneklep ke osep Israel ina kovok. Ari Ida Tapolngon ila kontrak ka iye wai promis ka la ke osep Israel ina ine me ke umu kovok. Umu tona umodong adai vala e umeile Ida Tapolngon kovok. E umapara ke wan gesa ka itau ka mase ma polou kovok.

¹³ Oglou umodong mawa ke Ida Tapolngon. E eknikane umeneklep ke Krais Yesus e umodong olwo boto ke iye. Kesua batne ke Yesus ina marau ka baser la ka lua umu ke lumu elio epmes ina.

¹⁴ Oglou imi osep Yuda ina e umu ka osep Yuda ina kovok aitno lite soulu pulu. Deka elio ka aitno lite soulu pulu langka dangdang ite pulu. E Krais lua ite keniye ke pampamu ine deka aitno lite epen pulu batne ke iye. Krais ina marau e ina metengen dar parangan ka oglou dong airavu ke ite deka due aitno lite epen pulu.

¹⁵ Krais due Moses ila sogongon ka oglou plau imi osep Yuda ina ma pelengon dagar tonari plau imi kovok. Deka pelengon dagar tonari e sogongon bitna bitna ka oglou imawaiki tiplau imi tiplau imi kovok. Krais Yesus due osua ka osep Yuda ina e osua ka osep ka isak osep Yuda ina kovok tineklep ke iye. Deka tipolou osua oku ina ka kene deka osua kene vala dong. Iye due langane deka osep tonari aitno lisak epen pulu.

¹⁶ Krais mana ke ina akai e mete ine. Deka elio ka iye mete ke ina akai due osua orwo tiduni pulu ma elio ka aitno lisak engil pulu polou yagos. E iye due osep ka oglou isak osua orwo tineklep pulu e tipolou osua kene vala eriar langka isak Krais pampamu ine. Deka parangan ka oglou dangdang ite ke Ida Tapolngon dong kovok.

¹⁷ E langane. Alo ka Krais me polou ke ite iye napapra Ida Tapolngon ila omon itau e iye napapra ke elio ka aitno lite epen pulu. Iye due langane ke osep Yuda ina ka tidong olwo boto ke iye. E ke osep ka isak osep Yuda ina kovok ka tidong mawa ke iye blang.

¹⁸ Deka imi osep Yuda ina e umu ka osep Yuda ina kovok ite keniye itodong ke Krais ila osua ka kene vala. E Ano Itau dong ke ite keniye aitno lite langka ekreng gesa ma itakaranga itawai itau ke Pmada e itakakai angaine tito ine.

Ida Tapolngon ila ninu ite ka ila osep

¹⁹ E Ida Tapolngon vati umu langka osep kaulei e langka osua silang kovok. Aurou. Lumu osua Ida Tapolngon ila osua vala e umeneklep ke Ida Tapolngon ila osep kodong.

²⁰ Deka itodong langka Ida Tapolngon ila ninu e osep aposel e osep napaprangan ina tidong langka opmu ka Ida Tapolngon ila ninu dong dagar ine. E Yesus iye tona opmu ka due Ida Tapolngon ila ninu nepir pulu e dong dagar lokono.

²¹ Deka langane. Eriar langka opmu due ninu gesa dong dagar lokono deka Yesus due ila osep tipolou tidong dagar blang. Ma tirim tipolou dagar lokono eriar langka ninu itau lokono ka Ida Puda ila wan.

²² E umeneklep ke Krais kodong. Deka umogosok Yesus ila osep keniye umopolou Ida Tapolngon ila ninu ka itau. E Ida Tapolngon Ano Itau dong ine.