Aposel 5 - Aria New Testament

Gute Ananaias e esna Safaira

¹ Alo ari gute Ananaias orwo esna Safaira tidong e tidue burong ke inarak taklak leklou deka tidue ina mani.

² Mase iye tuk urok mani tonari orwo ma leklou urok e leklou la ke osep aposel ma titongo ine e esna ile ine. E tibisi ke mani ka dau dong kap isak. Deka Ananaias paur mani leklou la ke osep aposel langka mani tonari taklak ina mani keniye.

³ Deka Pita wai langane. “Ananaias ina lange Satan due aitno lugom deka amwaiki amyak Ano Itau ke mani ane? Ina lange omtuk taklak ina mani leklou deka embisi ine?

⁴ Oglou taklak ina gute wom. Mase omdue burong ine deka omdue ina mani kesua wom taklak ina gute e mani tonari dong lem wan. Ina lange aitno lugom mter ma embisi ke mani leklou e amwaiki amyak imi ine? E amyak imi ine vala kovok. Aurou. Amwaiki amyak Ida Tapolngon ine blang.”

^5-6 Ananaias klingen Pita ila pelengon deka lokono iye gene e mete. Iye mete kodong deka osep auram leklou tipolou ke iye e tidue pampamu ine e tidugume deka tikalke la ke dogur e tiyase. Alo ari osep ka tiklingen ke elio ka polou ke Ananaias ansak nesik omba ine.

⁷ Safaira dau dong ke ila ninu e ile ke elio ka polou ke ila boget kovok. Iye dong ke ila ninu langka aua eklu mela yagos deka iye la polou ke Pita bitna.

⁸ Deka Pita pmi iye langane. “Upu taklak ina mani keniye polou eriar langka Ananaias paure me koke aurou?” Deka Safaira wai langane. “Lokono ipem taklak ina mani keniye langare.”

⁹ Deka Pita wai ke iye langane. “Ina lange umorwo aitno lumu mter ke elio ane e umawaiki umayak Ida Puda Ano Itau ine? Emklingen osep ka tiyas lem boget tipolou ke ninu ane ina ekreng bitna kodong deka ma tikalke pampamu lugom ari blang.”

¹⁰ Safaira klingen Pita ila pelengon deka lokono iye gene e mete ke Pita bitna. Deka osep auram tonari tipolou e tivati iye mete blang deka tidue tikalke la ari e tiyas iye ke ila boget ina denga galna.

¹¹ Deka osep keniye ka tiklingen ke elio ane ansak nesik omba.

Osep aposel tidue elio arit ina pula

¹² Alo ari osep ka aitno lisak dagar ke Yesus tiduni pulu ke opos ka osep tisire Solomon ila opos. Deka ari osep aposel tidue elio arit ina ka nisngen pula ke osep amtarsak.

^13-14 Osep ka pula keniye tidue anit ke Ida Tapolngon ila osep dau osep epmes ina leklou tiulou tarna lisak e tineklep ke osep ka oglou aitno lisak dagar ke Yesus kodong kovok. Ari osep arang e apmang pula tisongon urok elio epmes ina deka aitno lisak la dagar ke Yesus e tineklep ke osep ka oglou aitno lisak dagar ke Yesus e inarak sasa res polou pula.

¹⁵ Osep pula tivati osep aposel tidue elio arit ina pula deka tikakluk osep ka tipaia ke ekreng galna ka Pita la didie. E osep ka tipaia timunu ke urok kova e urok omoi ke ekreng galna. Timunu ine kesua aitno lisak mter langka Pita polou ke isak e kai isak koke ano klou isak vala ma inarak paiangan polou yagos.

¹⁶ Osep pula ka urok armok tidong lelei Jerusalem tipaur osep ka tipaia e osep ka angelo soulu due isak ke osep aposel deka tilua osep tonari e tipolou itau blang.

Osep leklou tidue agegeng ke osep aposel

¹⁷ Alo ari gute loulou ina ka mgo gosok sisrok ka osep Sadyusi ina aitno lisak rim ke osep aposel deka aitno lisak soulu ke isak.

¹⁸ Deka tikis osep aposel dagar e tipaur isak kla tisep ke kalabus e tidong kap osep sosoulu.

¹⁹ Tidong ine la lama epmes deka Ida Puda pagei ila ensel gesa polou ke isak. E ensel polou ke kalabus e klok kalabus ina ekreng bitna e paur isak tipolou ke dogur. Tipolou ke dogur kodong deka ensel wai ke isak langane.

²⁰ “Umala ke omur ka lelei Ida Tapolngon ila ninu e umanapapra osep pula pula ke pelengon keniye ke elio oku ina.”

²¹ Kotkotu lokono polou deka osep aposel kla ke Ida Tapolngon ila ninu e tisep ke omur ka lelei ninu deka tinapapra osep ka tidong ine ke Yesus ila omon itau eriar langka ensel wai ke isak ine. Alo ari gute loulou ina ka mgo gosok sisrok tiduni pulu kap osep kaunsil ina e osep Yuda ina urok osep ngongle. Deka tipagei osep ka tiplau Ida Tapolngon ila ninu ke kalabus ma tidue osep aposel e tipaur isak tipolou ke amtarsak.

²² Deka osep ka tiplau Ida Tapolngon ila ninu isak kla tipolou ke kalabus. Tipolou ine e tikrim osep aposel e tidong ine kovok. Deka ari tibauluk tipolou ke osep kaunsil ina e tipalongo urok ine langane.

²³ “Imopolou ke kalabus e ina ekreng bitna keniye tidong dagar lokono e osep ola ina ka tiplau kalabus ina ekreng bitna tivri ine e tiplaue. Deka imoklok kalabus ina ekreng bitna e imesepe deka imekrim ke osep aposel e imavati isak kovok.”

²⁴ Osep tonari tipalongo gute ka vri mgo ke osep ka tiplau Ida Tapolngon ila ninu gosok osep loulou ina ka omba ine deka aitno lisak mter pula ine e aitno lisak kro ine. E aitno lisak mter langane. “Ai elio lange polou ke isak?”

²⁵ Deka gute silang me polou ke isak e wai langane. “Osep ka umodue isak tisep ke kalabus tivri ke omur ka lelei Ida Tapolngon ila ninu e tiparere osep ka tidong are.”

²⁶ Tiklingen gute tonari ila omon deka osep ka tiplau Ida Tapolngon ila ninu tigosok inarak puda isak kla tipolou ke osep aposel. Deka tidue isak e tibauluk e tidue agegeng ke isak kovok kesua tiulou tarna lisak ke osep pula lama tidue opmu e timluk isak ine.

²⁷ Tipaur osep aposel tipolou ke osep kaunsil ina amtarsak ma tipmi isak. Deka gute loulou ina ka mgo wai ke isak langane.

²⁸ “Oglou imadangdang umu ma umanapapra osep ke Yesus kovok e eknikane talapmu klingen limem pelengon kovok. Umanapapra pula ine deka osep Jerusalem ina pula tiklingen ine. Ina lange umodue elio langane? Umawaiki osep pula aitno lisak mter gute tonari ina metengen batne dong ke imi? Aitno lumu langane i?”

²⁹ Deka Pita gosok osep aposel tiwai langane. “Eknikane lumu pelengon para pulu ke Ida Tapol-ngon ila pelengon deka imedidi Ida Tapolngon ila pelengon vala e imedidi osep aitno lisak kovok.

³⁰ Oglou umodue agegeng ke Yesus e umenilim kamla e limla ke ina akai deka iye mana ine e mete. Iye mete deka udo seia Inarak Tapolngon ila arit due Yesus poga tito ke ina denga.

³¹ Deka Ida Tapolngon kakai iye dong ke limla odung. Iye due Yesus mgo ke ite e due polou Ida Luangan ka karanga lua itosep Israel ina ma itabauluk aitno lite ke udo elio epmes ina e due udo elio epmes ina vri ke ite kovok.

³² Imi ane e Ano Itau imapalongo osep ke elio tonari. Oglou imavati Yesus ila elio bitna bitna deka eknikane imapalongo osep ine. E eknikane Ano Itau ka Ida Tapolngon kar iye ke osep keniye ka tididi ila pelengon pa-longo osep ine blang.”

³³ Tiklingen osep aposel urok pelengon deka aitno lisak nevlik omba e aitno lisak amnga ke isak. Deka tiwaiki tidue burwa ke isak.

³⁴ Osep tonari aitno lisak engil lokono ke osep aposel e tiwaiki timete. Deka gute Farisi ina gesa ka angaine Gamaliel tito wai ke isak. Iye gute parerengen ina ke Moses ila sogongon e osep pula tidue anit ke iye. Iye vri deka wai ke osep aposel langane. “Umopolou umala ke dogur.” Deka isak kla ke dogur e tipara are.

³⁵ Isak kla ke dogur deka Gamaliel wai ke iye sisrok langane. “Umu osep Israel ina umeile umu itau lama umodue elio soulu ke osep are.

³⁶ Aitno lumu mter ke wan ka polou oglou kodong. Oglou gute Teudas polou deka waiki mgo ke osep eriar langka iye gute ngongle gesa. Deka osep langka inarak sasa 400 aitno lisak dagar ke ila pelengon deka tineklep ke iye. Mase evlei polou deka osep timke iye e iye mete deka osep ka tididi iye tiulou kla. Deka ila pelengon polou adai vala.

³⁷ Mase gute gesa ka omur Galili ina polou ka angaine Judas. Iye polou alo ka osep gavman ina tidue sensis. Deka osep leklou ka aitno lisak dagar ke iye tididi iye. Mase iye mete e osep ka tididi iye tiulou kla. Deka ila pelengon polou adai vala blang.

³⁸ Eknikane ngawai ke umu langane. Umodue elio soulu ke osep are kovok. Langka tididi aitno lisak vala urok elio ma polou adai vala.

³⁹ E langka tididi Ida Tapolngon aitno itakaranga itadangdang isak ine kovok. Lama itapara pulu kap Ida Tapolngon.”

⁴⁰ Osep tiklingen Gamaliel ila pelengon e tididie. Deka tigi osep aposel ma tipolou ke amtarsak blang. Deka tiules isak e tidangdang isak lama tinapapra osep ke Yesus ila omon itau blang deka tisongon isak kla.

⁴¹ Deka osep aposel tisongon osep kaunsil ina amtarsak e kla ke dogur. E aitno lisak itau ke Ida Tapolngon kesua iye rere isak e tinamani agegeng ka polou ke isak batne aitno lisak dagar ke Yesus.

⁴² Alo ari oklou aling aling tinapapra ke Yesus ka Ida Tapolngon rere Krais ka iye lua osep ila omon itau. Tiparere osep ka tidong ke omur ka lelei Ida Tapolngon ila ninu e osep ka tidong ke urok ninu ninu blang.