Aposel 19 - Aria New Testament

Pol polou ke Efesus deka boko ine

¹ Alo ka Apolos dau dong ke Korin Pol didi ekreng ka munu airavu ke provins Esia e la polou ke Efesus e soson Yesus ila disaipel leklou.

² Deka iye pmi isak langane. “Oglou alo ka aitno lumu la dagar ke Yesus Ano Itau duru sep ke aitno lumu koke aurou?” Deka tikoli tiwai langane. “Aurou. Oglou imeklingen ke Ano Itau kovok e imeile ine kovok.”

³ Deka Pol wai langane. “Oglou umodue elio paunimngen ina ka didi sei ila pelengon?” E tikoli tiwai langane. “Imi ane imedidi elio paunimngen ina ka oglou Jon napapra osep ine.”

⁴ Deka Pol wai ke isak lang-ane. “Oglou alo ka Jon paunim osep iye wai langane. ‘Osep eknikane umabauluk aitno lumu ke lumu elio epmes ina e umodue elio paunimngen ina. Mase gute silang ma me ke ngong e aitno lumu la dagar ke iye vala.’ Gute are iye Yesus.”

⁵ Alo ari osep ari tiklingen Pol ila pelengon deka tidue elio paunimngen ina ke Ida Puda Yesus angaine.

⁶ E Pol limla duru kai isak e Ano Itau duru sep ke aitno lisak. Deka tiwai tokples bitna bitna ka oglou tile ine kovok e tiwai pelengon langka osep napaprangan ina.

⁷ Osep tonari keniye inarak sasa songotno orwo.

⁸ Ari Pol la sep ke osep Yuda ina urok duningen ina ninu e napapra ke isak dagar ke Ida Tapolngon ila pelengon e ulou tarna kovok. Iye due elio langane iding ke taiko eklu. Ari iye waiki sruk aitno lisak ke elio ka Ida Tapolngon plau osep.

⁹ Osep pula tiklingen Pol ila pelengon e osep leklou tiwai apok ke iye ke osep pula amtarsak. Tipono aitno lisak e tiwai soulu lokono ke elio oku ina ka Pol napapra ke isak. Pol vati urok elio soulu deka iye gosok Yesus ila disaipel tisongon osep tonari. E isak kla ke gute Tiranus ila ninu ka iye nasi osep ine. E ke oklou kene kene tiwai Ida Tapolngon ila pelengon ke osep ari.

¹⁰ Pol due elio langane ke ninu tonari iding ke tobor orwo. E alo ari osep Yuda ina ka pula keniye e osep Grik ina ka pula keniye ka tidong ke provins Esia tiklingen Ida Puda ila pelengon.

¹¹ Ari Ida Tapolngon lua Pol e iye due elio arit ina bitna bitna pula langka oglou osep tivati kovok.

¹² E osep pula tidue urok hankisip e molo daudeng tikai Pol tarna deka tikalke ke osep ka tipaia e ke osep ka angelo soulu dong ke aitno lisak. Deka hankisip e molo daudeng due osep ka tipaia inarak paiangan yagos e angelo soulu tisongon osep kla.

¹³ Alo ari osep Yuda ina leklou tisapir angelo soulu ke osep. E osep tonari tilila e tiwai Yesus angaine ke osep ka angelo soulu due isak kesua tiwaiki tisapir angelo soulu ine. Tiwai ke angelo soulu langane. “Yesus ka Pol napapra ine sapir umu e umopolou umala.”

¹⁴ Ari gute loulou ina ka omba ke osep Yuda ina dong ka angaine Skeva. Titno arang lumorwo tidong e tidue elio ka tisapir angelo soulu ke Yesus angaine.

¹⁵ Aling kene tidue langane ke angelo soulu gesa deka iye koli wai ke isak langane. “Ua. Ngaile Yesus e ngaile Pol e umu osep sei? Kesua ngaile umu kovok.”

¹⁶ Deka gute ka angelo soulu dong ke iye due evlei e mluk osep lumorwo tonari. Iye mluk isak pula e mole isak deka tiulou kla e isak albus isak e tarna lisak marau.

¹⁷ Elio ane polou deka osep Yuda ina keniye e osep Grik ina keniye ka tidong ke Efesus tiklingen ila omon e tilim pula ine. Deka tikakai Ida Puda Yesus angaine tito la egim.

¹⁸ E osep pula ka aitno lisak dagar ke Yesus tipolou ke osep pula amtarsak e tiwai malak ke urok elio epmes ina bitna bitna e tibisi ine kovok.

¹⁹ E osep leklou ka oglou isak borou timla tipaur urok buk ka borou ina ke osep pula amtarsak e tibik isak e eiou ngen isak. E titik urok buk keniye tonari inarak klingen ke mani silva e ina sasa polou langka 50,000.

²⁰ Ke elio ane ­Ida Puda ila pelengon pakes lila pula. E osep pula aitno lisak mter Ida Puda ila arit ombatno lokono e aitno lisak la dagar ke iye.

²¹ Elio tonari yagos deka Ano Itau due Pol aitno e aitno mter ke ila langan. Aitno mter langane. “Ma ngalila ke provins Masedonia e provins Akaia deka ma ngapolou ke Jerusalem e mase ma ngala ke armok Rom blang.”

²² Pol aitno mter langane deka iye pagei osep orwo ka Timoti e Erastus ka tilua iye ma isak kla tipolou ke Masedonia mgo. E Pol dau dong ke provins Esia isuk boto.

Osep Efesus ina aitno lisak soulu ke Pol

²³ Alo ari osep pula ka tidong ke Efesus aitno lisak soulu e amnga kesua osep pula tididi elio oku ina.

²⁴ Ari gute kene dong ka angaine Demitrius. Iye gute ka boko ke opmu silva e due ninu ka daudeng boto langka inarak tapolngon ka angaine Artemis ila ninu. Ari iye plau osep leklou ka tiboko eriar langka iye boko. E urok mani polou pula batne ke urok bokongon.

²⁵ Demitrius gom osep pula ka tiboko ke ila bokongon gosok osep leklou blang ka tiboko ke opmu silva deka iye palongo urok langane. “Osep umoklingen lou pelengon. Umeile omur udo mani pula ina poloungon batne ke udo bokongon ka silva ina.

²⁶ E eknikane gute Pol wai pula ke udo bokongon langane. ‘Tapolngon ka osep tiboko ine isak tapolngon yakngan vala.’ E osep pula ka tidong ke Efesus e ka tidong ke provins Esia aitno lisak la dagar ke Pol ila pelengon kodong eriar langka umoklingen ine e umavati.

²⁷ Deka dau tauni kovok Pol ila pelengon karanga due udo bokongon polou yagos. Oglou osep ka provins Esia ina keniye tilotuim ida tapolngon Artemis. E osep pula ka tidong ke omur pula leklou tilotuim iye blang. E eknikane isuk boto ma tidue anit ke Artemis ila ninu angaine kovok. E iye tona angaine duru blang kesua Pol ila pelengon pese.”

²⁸ Osep ka tiduni pulu kap Demitrius tiklingen ila pelengon e aitno lisak nevlik amnga lokono deka tiwai dagar lokono langane. “Ite Efesus ina ida tapolngon Artemis angaine dong egim lokono.”

²⁹ Tiwai dagar langane deka dau tauni kovok osep pula aitno lisak nevlik e tidaiku omba ine. E osep pula tikis dagar gute Gaius orwo gute Aristarkus ka isak kla kap Pol ke ila langan. Isak osep Masedonia ina. E osep pula tigosok osep ka tikis osep orwo kamsak kene tisuong tipolou ke omur ka osep Efesus ina tiduni pulu ine.

³⁰ Ari Pol waiki la sep ma iye polou ke osep amtarsak e Yesus ila disaipel tidangdang iye ine.

³¹ Osep leklou ka isak osep gavman ina ke omur ari isak Pol sisrok e tipagei omon gesa la ke Pol e tiwai ke iye langane. “Pol amla emsep ke duningen tonari e ompolou ke osep amtarsak sakam.”

³² Osep ka tiduni pulu aitno lisak kaka e osep leklou tidaiku pelengon kene e osep leklou tidaiku pelengon silang. Osep pula ka tiduni pulu ari tile urok elio batne kovok e tidue vala.

³³ Deka osep Yuda ina tisodung gute Aleksander polou ke osep amtarsak e iye kamadu isak e waiki kar pelengon gesa ke isak.

³⁴ E osep ari tivati iye gute Yuda ina deka isak keniye tidaiku langka kre lisak kene vala langane. “Ite Efesus ina ida tapolngon Artemis angaine dong egim lokono.” Tidue elio langane iding ke aua orwo.

³⁵ E gute kene ke osep ka tiplau armok tonari polou ke osep amtarsak e taka isak ma tiwai kovok. Deka iye wai ke isak langane. “Umu osep Efesus ina umoklingen. Osep ka pula keniye tile omur ite osep Efesus ina itaplau ida tapolngon Artemis ila ninu e ila opmu ka oglou duru ke omur ka egim koke aurou?

³⁶ Umoklingen. Umeile kodong gute gesa dong ka karanga para pulu pelengon ane kovok. Deka aitno lumu epen e umodue elio ulik ulik sakam.

³⁷ Umapaur osep ane time e tipanako wan ke ida tapolngon Artemis ila ninu kovok e tiwai soulu ine kovok.

³⁸ Langka gute Demitrius gosok sisrok aitno lisak mter elio gesa vri ke isak orwo tikaranga tiwai urok sinngen elio ke imi ka imaplau armok ane emtemi. Kesua taim ke armok ane ina kot dong.

³⁹ Eknikane langka pelengon gesa dong ma iye dong para alo ka imi ka imaplau armok ane imoduni pulu ma imeklingen ine.

⁴⁰ Eknikane elio soulu ka umodue batne dong kovok deka umeile umu itau lama osep tikar agegeng ke umu ine. Kesua langka osep Rom ina ka tiplau armok ane tipmi umu ke elio ane batne lange ma umousine? Kesua elio ane ina poloungon batne dong kovok.”

⁴¹ Gute tonari wai langane yagos deka iye pagei osep keniye ma tidardar kla.