Aposel 14 - Aria New Testament

Pol orwo Barnabas tiboko ke Aikoniam

¹ Pol orwo Barnabas tidong ke Aikoniam e tisep ke osep Yuda ina urok duningen ina ninu e tiwai pula kap osep ka tidong ine. Deka urok pelengon mter osep tonari aitno lisak. E osep Yuda ina pula e osep pula ka tiwai pelengon Grik aitno lisak la dagar ke urok pelengon.

² E osep Yuda ina ka aitno lisak dagar kovok tisruk osep leklou ka isak osep Yuda ina kovok aitno lisak deka aitno lisak soulu ke Ida Tapolngon ila osep.

³ ­Pol orwo Barnabas tidong tauni ke Aikoniam e tiwai dagar pula ke osep ari. Alo ari Ida Puda lua isak ke ila arit deka tilua osep pula ke elio arit ina. Deka osep pula tivati elio arit ina tonari e tile omur ine e tiwai langane. “Urok pelengon ka la ke Ida Tapolngon ila makaingan pelengon lokono.”

⁴ E osep pula ka tidong ke armok aitno lisak orwo ke isak. Osep leklou aitno lisak kene ke osep aposel e osep leklou aitno lisak kene ke osep Yuda ina.

⁵ Deka osep Yuda ina e osep leklou blang ka isak osep Yuda ina kovok tigosok urok ngongle tiwaiki tidue asmel ke Pol e Barnabas. Tiwaiki tidue opmu ma timluk isak ine.

⁶ Pol orwo Barnabas tile omur ke osep tonari aitno lisak deka tiulou kla ke omur Likonia. Deka tidong ke Listra e Derbe e ke omur ka lelei armok orwo tonari.

⁷ ­Deka tinapapra Yesus ila omon itau ke osep ka tidong ke omur tonari.

Pol boko ke Listra

⁸ Alo ka tidong ke Listra tivati gute gesa ka kamla soulu e iye karanga lila kovok. Oglou alo ka tna divir iye deka kamla soulu kodong e iye lila kovok.

⁹ Iye dong e klingen Pol ila pelengon deka Pol bitna nekek dagar ke gute tonari. Deka iye ile omur gute aitno dagar ma iye karanga lua iye ma kamla polou itau.

¹⁰ Deka Pol wai dagar langane. “Emtito emvri ke kevep.” Deka gute ka kamla soulu kopiuk tito vri deka lila.

¹¹ Osep pula tivati elio ane deka tiwai omba ke pelengon Likonia langane. “Ida tapolngon tinapak langka osep deka tiduru ke ite.”

¹² Deka tiwai Barnabas inarak tapolngon ka angaine Sus e tiwai Pol inarak tapolngon ka angaine Hermes kesua Pol gute meriang ina.

¹³ Ari inarak tapolngon Sus ina ninu dong ke armok ina boul. Deka Sus ina gute loulou ina gesa pou plaua lelei ke bulmakau bole agunsak deka paur isak ke Sus ila ninu ina ekreng bitna. Deka gute loulou ina gosok osep pula tiwaiki tidue elio opmu ina ke Pol orwo Barnabas.

¹⁴ ­Barnabas e Pol tiklingen pelengon ke elio tonari e tile omur ine. Deka tidigrik ine e titutrum urok molo e tisuong kla tipolou ke osep pula amtarsak e tiwai omba langane.

¹⁵ “Osep umoklingen. Umodue elio ane batne lange? Imi ane imi osep eriar langka umu. Eknikane imapaur omon itau ke umu ma umopul dogur ke lumu wan adai ane e aitno lumu la dagar ke Ida Tapolngon ka Tapolngon ka ila mosongon dong ke iye. Oglou ari kodong iye due omur ka egim e omur ka pula keniye e misuon. Iye due wan bitna bitna keniye ka tidong ine.

¹⁶ Oglou osep ka pula keniye tididi Ida Tapolngon ila elio kovok e tididi aitno lisak vala deka iye songon isak ine.

¹⁷ Lama iye songon isak ine iye kukwop iye kovok ke osep ka pula keniye ka tile ine kovok. Oklou aling aling iye due nisngen ke ila elio itau deka lua osep ka pula keniye ine. Tobor aling aling iye due aragu duru e lua osep ke inarak ngangon ka polou ke taklak ka karanga ke isak. Deka upu ngangon pula e aitno lumu itau ine.”

¹⁸ Lama Pol wai pula langane osep tonari dau tiwaiki tidue elio opmu ina ke isak.

Osep Listra ina tiwaiki tidue burwa ke Pol

¹⁹ Alo ari osep Yuda ina leklou ka tidong ke Antiok e Aikoniam tipolou ke Listra. E tisruk osep pula aitno lisak deka osep tonari tidue opmu e timluk Pol ine. Deka tiriri iye la munu ke armok ina boul kesua aitno lisak mter iye mete kodong.

²⁰ Deka Yesus ila disaipel tiduni pulu lelei iye deka iye poga tito e la ke armok blang. Iye dong ine la lama oklou silang deka iye orwo Barnabas tisongon Listra e isak kla ke Derbe.

²¹ Tipolou ke Derbe deka tinapapra Yesus ila omon itau ke osep ka tidong are. Deka ari osep pula tipolou Yesus ila disaipel. Mase tisongon Derbe deka tibauluk kla ke Listra e ke Aikoniam e ke Antiok blang.

²² E tilua Yesus ila disaipel ke armok armok tonari ma aitno lisak dong dagar lokono ke iye. Tiwai ke isak langane. “Aitno lumu dong dagar lokono ke Yesus. Umopul dogur ke iye sakam. Ma agegeng polou ke umu mgo deka mase ma umodong ke omur ka Ida Tapolngon plaue.”

²³ Deka ari tirere osep leklou ke armok kene kene ma tiplau Ida Tapolngon ila osep. Deka tiwai itau pula ke Ida Tapolngon ine e tipli inarak ngangon kesua tiwaiki aitno lisak la ke Ida Tapolngon vala. Deka ari tiwai ke osep ka tirere isak Ida Tapolngon ila osep inarak plaungan langane. “Ida Puda ka aitno lumu dagar ke iye kodong ma plau umu e kere umu itau ke lumu elio isuk isuk.”

Pol e Barnabas tibauluk kla ke Antiok ke omur Siria

²⁴ Pol orwo Barnabas tidue elio ane yagos deka tilila ke omur Pisidia deka tipolou ke omur Pamfilia.

²⁵ Deka ke omur tonari tinapapra Ida Tapolngon ila pele-ngon ke osep ka tidong ke Perga. Tinapapra ke isak yagos deka tisongon armok tonari e tiduru kla ke Atalia.

²⁶ Mase tidue sip e tisongon Atalia e isak kla tipolou ke Antiok. Oglou alo ka isak dau tidong ke Antiok ari Ida Tapolngon rere isak ma tiboko ke ila bokongon. Ari osep Kristen tipmi Ida Tapol-ngon ma iye lua isak ke urok bokongon ka oku ane tidue kodong.

²⁷ Tipolou ke Antiok kodong deka tiduni pulu kap Ida Tapolngon ila osep e tipalongo urok ke bokongon ka Ida Tapolngon lua isak ine. Tiwai langane. “Ida Tapolngon due elio itau ke osep ka isak osep Yuda ina kovok deka aitno lisak la dagar ke iye blang.”

²⁸ Deka ari tidong dau tauni kap Yesus ila disaipel ka tidong ke Antiok.