3 Jon 1 - Aria New Testament

¹ Ngong gute kene ka ngaplau Ida Tapolngon ila osep e ngasogo pas ane uti ke wom Gaius. Wom lou aten e silang blang wom langka erigu e ngong lana ngong ke wom lokono.

² Ate. Ngong lana ngong ke wom e ngawai itau ke Ida Tapol-ngon ma wan ka pula keniye tipolou itau ke wom e ma pampamu lugom dong itau blang. E ngaile lem mosongon e aitno lugom tidong itau kodong.

³ Oglou udo osua leklou tipolou ke ngong e tipalongo lou ke lem elio. E tiwai emdidi pelengon lokono. Ngaklingen pelengon are deka aitno lungong neser omba ine.

⁴ Kesua alo ka ngaklingen omon ke osep ka isak langka dirgu tididi pelengon lokono ka kene vala deka aitno lungong neser omba ine. E wan gesa due aitno lungong neser ka mole wan tonari kovok.

Gaius due bokongon itau

⁵ Lou aten. Ngong lana ngong ke wom e ngawai ke wom langane. Omdong dagar e omdue lem bokongon itau alo ka omlua Ida Tapolngon ila osep leklou lama emile isak koke emile isak kovok.

⁶ Osep tonari tipalongo sios ane ke elio ka wom lana wom ke isak. E oku ane ngawaiki omlua isak ma isak kla ke urok langan blang. Omlua isak ke wan bitna bitna ka Ida Tapolngon aitno itau ine.

⁷ Omlua osep tonari kesua isak kla ke urok langan ma tidue Yesus ila bokongon. E tidue wan ka karanga lua isak kovok ke osep ka tile Ida Tapolngon kovok.

⁸ Deka ite ma itolua osep ka tiboko langane. Kesua alo ka itolua isak are langka itoboko pulu kap isak ke urok bokongon ka tinapapra Ida Tapolngon ila pelengon lo-kono.

Diotrefes due elio soulu

⁹ Oglou ngasogo pas ke Ida Tapolngon ila osep. E dau gute Diotrefes waiki klingen lou pele-ngon kovok kesua iye waiki iye vala mgo ke sios.

¹⁰ Deka mase langka ngapolou ke umu ma ngawai malak ke ila elio ka iye due. Iye wai adis ke imi ke pelengon soulu. E iye due elio soulu silang blang langane. Alo ka osep ke udo osua tipolou ke iye deka iye lua isak ma tidong ke ila ninu kovok. E iye dangdang osep leklou ka tiwaiki tidue osep tisep ke urok ninu. E iye sapir osep tonari ke sios.

Demitrius due elio itau

¹¹ Lou aten ka ngong lana ngong ke wom. Amkana elio soulu kovok. Aurou. Amkana elio itau vala. Kesua gute ka due elio itau vala iye Ida Tapolngon ila gute e gute ka due elio soulu iye ile Ida Tapolngon kovok.

¹² Osep pula tiwai gute Demitrius iye gute ka due elio itau vala e iye didi Ida Tapolngon ila pelengon ka lokono. Imi blang imawai iye gute itau. E umeile limem pelengon lokono vala.

Jon waiki vati Gaius

¹³ Ngawaiki ngawai pelengon pula leklou ke wom e dau nga-waiki ngasogoe ke pas kovok.

¹⁴ Ngawaiki isuk boto ngauti ke wom deka ma itakaranga itawai pulu.

¹⁵ Ngawaiki elio ka Ida Tapolngon due aitno lugom epen dong kap wom. Lem saten ka tidong ane tiwai “oklou itau” ke wom. E amwai “oklou itau” ke limem saten kene kene ka tidong are.