2 Timoti 4 - Aria New Testament

Pol waiki Timoti napapra Ida Tapolngon ila omon itau

¹ Mase ma Krais Yesus duru ke taklak blang e plaue e iye ma wade osep ka dau tidong e osep ka timete kodong urok elio. E ngawai dagar ke wom ke iye e Ida Tapolngon amtarsak langane.

² Aling aling amnapapra Ida Tapolngon ila pelengon ke osep. Langka tiwaiki amnapapra ke isak koke tiwaiki amnapapra ke isak kovok io amnapapra ine vala. Ommosi aitno lisak ma aitno lisak mter itau e amwai dagar ke isak ma tibauluk aitno lisak ke urok elio soulu. E amwai pelengon itau ke isak ma due aitno lisak itau. Amwai molil molil ke isak e aling aling amparere isak.

³ Kesua mase osep ma tiwaiki tiklingen pelengon ka lokono kovok. Aurou. Ma tiwaiki tiklingen pelengon bitna bitna ka didi aitno lisak vala. E tidue osep parerengen ina ka tiparere isak ke pelengon ka tiwaiki tiklingen ine.

⁴ E ma tipul dogur ke pelengon lokono e aitno lisak la ke basikngen bitna bitna ka adai.

⁵ E wom Timoti aitno lugom mter itau ke pelengon itau e emvri dagar alo ka elio polou ka opru wom. Aling aling amnapapra omon itau ke osep e ambabrum bokongon ka Ida Tapolngon kare ke wom.

Isuk boto Pol mete

⁶ Emile isuk boto ma ngamete e ngasongon umu. Osep ma timluk ngong e ngau marau baser langka aki wain ka osep tibasere ke wan ka tidue elio opmu ina ine.

⁷ Ngaboko dagar ke Ida Tapolngon ila bokongon e ngong langka gute ka arit iye ma iye suong ke resis e isuk boto lou resis yagos. E aitno lungong ila dagar dau dong dagar.

⁸ Mase Ida Puda ma wade osep ka pula keniye ke ila elio ka itau e osuk. E iye ma kar kerengen ke ngong ka iye rere ke osep ka timole resis tonari. Ma iye kar kerengen ke ngong ka iye kare blang ke osep ka urok elio itau e osuk. Ma iye kare ke ngong ke oklou ka iye ma wade osep ka pula keniye urok elio isuk isuk ine. E ma iye kar kerengen ke ngong vala kovok. Aurou. Ma iye kar kerengen ke osep ka pula keniye ka isak lana isak ke iye e tipara ke alo ka iye iding me ma tivati iye.

Pol babrum ila pelengon

⁹ Ngawaiki omsuong ompolou ke ngong.

¹⁰ Kesua gute Demas aitno la ke wan bitna bitna ka taklak ina e iye songon ngong kodong e la ke armok Tesalonaika. E gute Kresens la ke provins Galesia e gute Taitus la ke omur Dalmesia.

¹¹ Gute Luk vala dau dong kap ngong. Omdue gute Mak deka umorwo umomo ke ngong kesua Mak boko itau e iye karanga lua ngong ke lou bokongon.

¹² E ngapagei gute Tikikus la ke armok Efesus kodong.

¹³ Alo ka omo ngawaiki am-kalke lou molo ka botom ka ngasongone dong ke armok Troas ke gute Karpus ila ninu. Silang blang ngawaiki amkalke lou buk blang e emtem uli ke lou buk ka tidue ke ongwa tarna kovok.

¹⁴ Ke oglou gute Aleksander ka due wan bitna bitna ke bras due elio soulu lokono ke ngong. Ma Ida Puda koli batne ke ila elio soulu ka iye due.

¹⁵ Wom blang amplau wom itau ke gute tonari. Kesua iye arit iye ma iye wai soulu ke omon itau ka itanapapra ine.

¹⁶ Mgongon alo ka ngavri ke kot osep ka pula keniye tisongon ngong e gute gesa vri kap ngong e lua ngong ke lou pelengon kovok. E ngawaiki Ida Puda koli batne ke osep tonari urok elio kovok.

¹⁷ Alo ari Ida Puda dong kap ngong e kar ila arit ke ngong. E nganapapra Ida Tapolngon ila omon itau ke osep ka pula keniye ka isak osep Yuda ina kovok. E osep tiwaiki timluk ngong ma ngamete e Ida Puda lua ngong ine.

¹⁸ E Ida Puda ma lua ngong ke elio soulu ka osep tiwaiki tidue ke ngong. E mase ma iye paur ngong ke omur heven ka iye plaue. Ma itakakai Ida Puda angaine tito la egim dong vala dong.

¹⁹ Ngawaiki amwai “oklou itau” ke Prisila orwo Akwila e ke gute Onesiforus ila osua.

²⁰ Gute Erastus dau dong ke armok Korin e ngasongon gute Trofimus ke armok Miletus kesua iye paia.

²¹ Wom arit wom ma omsuong ompolou ke ngong paide. Lama omdong e taim ka omur epen e engen omba polou e amkaranga omo kovok. Yubulus e Pudens e Linus e Klodia e Ida Tapolngon ila osep ka pula keniye leklou tiwai “oklou itau” ke wom.

²² Ngawaiki ma Ida Puda dong kap anwom e ngawaiki ila makai-ngan dong kap wom.