2 Timoti 3 - Aria New Testament

Ma osep tidue elio soulu pula alo ka isuk boto taklak yagos

¹ Ngawaiki emile omur lang-ane. Wan ka soulu lokono ma polou alo ka isuk boto wan ka pula keniye yagos.

² Ma osep tidue elio langane. Osep ma isak lana isak ke isak kensak kensak vala e aitno lisak mter ke mani vala. Ma tikakai isak tona angainsak e aitno lisak mter timole osep leklou. Ma tiwai soulu ke osep leklou e tipul dogur ke sipmarak e titnarak urok pelengon. Ma tiwai tenkyu ke wan ka osep tikare ke isak kovok e tipul dogur ke Ida Tapolngon ila elio itau.

³ Ma isak lana isak ke osep leklou kovok e ma amtarsak sisir e aitno lisak kis dagar ke wan soulu ka osep tidue ke isak. Ma tiwai pelengon e tiblou osep dogursak ine e ma tiplau isak itau kovok. Ma aitno lisak nevlik amnga ke osep e ma aitno lisak engil ke elio itau.

⁴ Ma tilai osep inarak e ma tisuong tididi aitno lisak ke wan ka kaka e ma aitno lisak mter ke isak kensak kensak vala. Ma aitno lisak mter ke elio bitna bitna ke taklak ka due aitno lisak itau e ma aitno lisak mter ke Ida Tapolngon kovok.

⁵ Ma tiwai aitno lisak dagar ke Ida Tapolngon e tiyakyak vala. E urok mosongon ma nis ite Ida Tapolngon ila arit dong ke isak kovok. E Timoti ngawaiki omdong mawa ke osep ka tidue elio langare.

⁶ Osep tonari leklou tikrim ke apmang ka aitno lisak ila dagar dau dagar kovok kesua tiwaiki tiplau isak. Tikrim e tipado isak deka tisep ke urok ninu. Apmang tonari tidue elio epmes ina pula e urok elio epmes ina dau pes isak deka elio epmes ina plau isak.

⁷ Aling aling tiwaiki tile omur ke wan oku e dau tile omur ke Ida Tapolngon ila pelengon ka lokono kovok.

⁸ Osep tonari tiwaiki tidangdang pelengon lokono eriar langka oglou gute Janes e gute Jambres tiwaiki tidangdang Moses ila pelengon. Osep tonari kaka lokono e tiyakyak alo ka tiwai aitno lisak la dagar ke Ida Tapolngon.

⁹ E urok elio soulu ma pagolgol osep pula aitno lisak kovok. Kesua osep ma tivati urok elio ka kaka lokono e tile omur ine deka ma tipul dogur ine. Langka oglou osep tivati Janes e Jambres urok elio ka kaka deka tipul dogur ke isak.

Pol waiki Timoti kis Ida Tapolngon ila pelengon dagar

¹⁰ Oglou itodong pulu e amvati lou elio isuk isuk. Emklingen lou pelengon ka ngaparere osep ine e emile batne ke lou elio bitna bitna ka ngadue. Emile aitno lungong dagar ke Ida Tapolngon e ngadong dagar ke wan bitna bitna ka polou ke ngong. Emile ngong lana ngong ke osep pula e ngavri dagar alo ka elio polou ka opru ngong.

¹¹ Emile osep tidue agegeng e tidue elio soulu ke ngong ke Antiok e Aikoniam e Listra. Tidue agegeng ke ngong e Ida Puda lua ngong ma ngadong itau ine.

¹² Pelengon ane lokono. Osep ka tineklep ke Krais Yesus e tiwaiki tididi Ida Tapolngon ila elio keniye ma osep tidue agegeng ke isak.

¹³ E osep soulu bitna e osep yakngan ina ma urok elio soulu res polou omba. E tiyak osep leklou e Satan yak isak.

¹⁴ Ngawaiki omdong dagar ke Ida Tapolngon ila pelengon ka osep tiparere wom ine e emkise dagar. Kesua emile osep ka tiparere wom ine.

¹⁵ E alo ka wom dau agau osep tiparere wom ke Ida Tapolngon ila pelengon ka oglou osep napaprangan ina tisogoe. Pelengon tonari parere wom ke elio ka Ida Tapolngon ma lua wom ke lem elio epmes ina. Ida Tapolngon lua wom alo ka aitno lugom la dagar ke Krais Yesus.

¹⁶ Ida Tapolngon Ano Itau due osep aitno lisak deka tisogo Ida Tapolngon ila pelengon. E pelengon tonari parere ite ke wan ka lokono e nis ite ke udo elio isuk isuk ka dau itau kovok e mosi udo elio isuk isuk tonari e parere ite ma itodue elio isuk isuk ka itau vala.

¹⁷ Deka pelengon tonari lua ite ka Ida Tapolngon titno ite ma itevri dagar ke bokongon itau. Ma itakaranga itodue ila bokongon bitna bitna itau.