2 Timoti 2 - Aria New Testament

Pol waiki Timoti boko dagar ke Ida Tapolngon ila bokongon

¹ Timoti wom langka erigu e ngawai ke wom langane. Emneklep ke Krais Yesus kodong deka ngawaiki ila makaingan due wom ma omdong dagar.

² Emklingen pelengon ka ngawai ke osep pula kodong. Deka ngawaiki amwai pelengon tonari ke osep ka tikis dagar ke Ida Tapolngon ila pele-ngon ma tikaranga tiparere osep leklou ine blang.

³ Emvri dagar langka gute ola ina ke Krais Yesus ila bokongon. Kesua elio ma polou ka opru wom eriar langka polou ka opru imi.

⁴ Emile omur langane. Alo ka gute ola ina dong ke ami iye due bokongon silang kovok. Kesua batne iye waiki gute ka plau iye aitno itau ke ila bokongon.

⁵ E silang blang osep ka tisuong ke resis tididi elio ka resis tonari ina. Langka tidar elio tonari tikaranga tidue prais ka gute ka mole resis due kovok.

⁶ E gute ka yage bitna boko engil lokono ma ngangon polou itau. Deka alo ka ngangon anino ma iye due ngangon mgo ke osep leklou.

⁷ Aitno lugom mter itau ke lou pelengon ane. Kesua Ida Puda ma lua wom ma emile omur ke wan ka pula keniye.

⁸ Aitno lugom mter itau ke Yesus Krais. Iye gute Devit ila napakngan gesa e iye mete deka poga tito ke ina denga. Ane omon itau ka nganapapra osep ine.

⁹ Nganapapra Ida Tapolngon ila omon itau e ke batne ane osep tidue agegeng ke ngong. Tidue sen e tipou lungu e kongu ine e tidue ngong ngasep ke kalabus langka ngong gute soulu bitna. E osep tikaranga tidangdang omon itau kovok.

¹⁰ Osep tidue agegeng ke ngong e dau ngadong dagar ine kesua ngawaiki ngalua osep ka Ida Tapolngon rere isak ila osep. Ma Krais Yesus lua isak ke urok elio epmes ina e tidue mosongon ka dong vala dong kap iye.

¹¹ Ida Tapolngon ila pelengon ane lokono. Langka itemete kap Krais mase ma itodong kap iye blang.

¹² Langka itodong dagar ke elio ka opru ite mase ma itaplau osep kap Krais. E langka itopul dogur ke Krais mase ma iye pul dogur ke ite.

¹³ Langka itawai ma itedidi Krais e mase itabauluk aitno lite e itedidi udo pelengon tonari kovok iye dau didi ila pelengon. Kesua iye karanga bauluk e dar ila pelengon kovok.

Ma osep tiboko dagar ke Ida Tapolngon ila bokongon

¹⁴ Aling aling omsruk osep ma aitno lisak mter ke lou pelengon ane e amwai dagar ine ke Ida Tapolngon bitna. Amwai ke isak ma orsak mluk pulu ke pelengon adai sakam. Kesua elio tonari karanga lua osep kovok e due pogle ke aitno lisak ila dagar.

¹⁵ Omboko dagar ma Ida Tapolngon aitno itau ke lem bokongon. Ma amkaranga amwai osuk ke Ida Tapolngon ila pelengon ka lokono. E ma wom mnak wom ke lem bokongon kovok.

¹⁶ E ompul dogur ke pelengon ulik ulik ka didi Ida Tapolngon aitno kovok. Kesua pelengon tonari nak osep aitno lisak ma tipul dogur ke Ida Tapolngon.

¹⁷ Pelengon ulik ulik tonari bitna langka egle ka soulu ka res polou omba e okus. Gute Himeneus e gute Filetus tiwai pelengon tonari.

¹⁸ Isak orwo tisongon pelengon ka lokono e tiwai langane. “Ante vala timete kap Krais deka tipoga kodong. E mase ma pampamu lite tibauluk titito e tidong blang kovok.” E urok pelengon tonari due pogle ke osep leklou aitno lisak ila dagar.

¹⁹ E Ida Tapolngon ila pelengon dong langka kadanga ka due ninu dong dagar. E sogongon dong ke kadanga tonari ka langane. “Ida Puda ile itau ke osep ka tidong ke ila osua.” E sogongon silang langane. “Osep ka isak Ida Puda ila osep ma tipul dogur ke elio epmes ina.”

²⁰ Ke ninu omba dis bitna bitna dong ine. Dis leklou tidue ke wan itau langka gol e silva e dis silang tidue ke wan langka akai e taklak. Ninu ina gute due wan itau langka ngangon sep ke dis ka gol e silva ina. E iye due wan langka tokonkon sep ke dis ka akai e taklak ina.

²¹ Are langka pelengon ano ke Ida Tapolngon ila osep ite. Langka gute gesa pul dogur ke elio soulu iye ma polou Ida Puda ila gute ka itau lokono langka dis ka itau. E iye karanga due bokongon bitna bitna ka Ida Puda waiki iye due.

²² Osep auram aitno leklou urok elio bitna bitna soulu. E ngawaiki ompul dogur ke elio soulu tonari. E emdidi Ida Puda ila elio ka langane vala. Aitno lugom dong dagar ke Ida Puda e wom lana wom ke osep e omgosok isak aitno lumu epen pulu. Omdue langane kap Ida Puda ila osep ka aitno lisak itau lokono e tiwai itau ke Ida Puda.

²³ Langka osep orsak mluk pulu ke pelengon ka adai vala deka omdong mawa ke isak. Kesua emile pelengon ka langane due osep aitno lisak nevlik deka tiwai engil pulu.

²⁴ Gute ka due Ida Puda ila bokongon ma wai engil kap osep kovok. E ma iye due mada ke osep e iye karanga parere osep itau. E silang blang alo ka osep tidue elio soulu ke iye io aitno epen ine.

²⁵ Iye wai molil e mosi osep ka tipara pulu ke ila pelengon. Iye due langane kesua aitno mter Ida Tapolngon karanga due isak tibauluk aitno lisak e tile omur ke pelengon ka lokono.

²⁶ Eknikane tidong langka tisep ke Satan ila aure e tididi Satan aitno vala. E langka tiklingen pelengon lokono deka aitno lisak karanga polou malak e tikaranga tikos ke Satan ila mangai.