2 Pita 3 - Aria New Testament

Ida Puda ma iding me blang

¹ Sipmi ka ngong lana ngong ke umu. Pas ane pas orwo ina ka ngasogoe uti ke umu ma omtomu sisir lou pelengon. Ngasogo lou pas ane kesua ngawaiki ngasruk umu ma aitno lumu mter ke pelengon ka oglou umoklingen ine.

² E ngawaiki omtomu sisir pelengon ka oglou Ida Tapolngon ila osep napaprangan ina tiwai ine. E ngawaiki omtomu sisir pelengon dagar ka Ida Puda ka Ida Luangan kare ke ila osep aposel deka tiwai ine ke umu.

³ Pelengon omba ka ngawaiki aitno lumu mter ine langane. Alo ka isuk boto wan keniye yagos osep ma time e tidue apok ke umu e tididi aitno lisak ke elio epmes ina bitna bitna ka tiwaiki tidue.

⁴ Ma tiwai langane. “Yesus wai ke umu ma iye iding me i? E iye iding me dau kovok. Oglou oglou ari Ida Tapolngon tapol wan ka pula keniye oku deka mase nogrum ke alo ka udo seia ka oglou timete la lama iding ke eknikane wan ka pula keniye tidong eriar langare.”

⁵ E osep ka tiwai langane amtarsak uli ke wan ane. Oglou oglou ari Ida Tapolngon wai deka sirva e taklak tipolou. E Ida Tapolngon due taklak polou airavu ke aki.

⁶ Mase Ida Tapolngon wai vala e due ongon ombatno polou deka taklak ka pula keniye ka dong alo ari polou yagos.

⁷ E eknikane Ida Tapolngon para ma iye due taklak e sirva ka dau dong tipolou yagos. Mase ma iye wade osep ka pula keniye e due agegeng ke osep ka tipul dogur ke iye. Deka alo ari iye ma wai e eiou ma ngen taklak e sirva yagos la.

⁸ Sipmi. Ngong lana ngong ke umu e ngawaiki aitno lumu mter langane. Ida Puda vati oklou kene vala eriar langka iye vati tobor 1000 e iye vati tobor 1000 eriar langka iye vati oklou kene vala.

⁹ E osep leklou tiwai langane. “Ida Puda dong tauni e didi ila promis molil molil vala.” E langane kovok. Aitno omba ke umu e dong para ma osep tibauluk aitno lisak ke urok elio epmes ina. Kesua iye waiki gute kene gesa mete ke ila elio epmes ina kovok.

Taklak e sirva ma tipolou yagos

¹⁰ E Ida Puda ila oklou ma polou suong e polou alo ka osep aitno lisak mter ine kovok eriar langka gute panakongon ina me suong. Ke oklou tonari ngus omba ma polou e sirva la yagos. E eiou ka engil lokono ma ngen wan ka pula keniye ka dong ke taklak ma isak e taklak yagos.

¹¹ Ngawaiki aitno lumu mter itau. Mase wan tonari ma polou yagos e oku ane umu kenmu kenmu umodue elio isuk isuk ka lange? Ma umodue elio isuk isuk ka itau ka Ida Tapolngon aitno itau ine.

¹² Deka umapara ke oklou ka Ida Tapolngon ma iding me ine e umoboko dagar ma oklou tonari suong polou. Ke oklou tonari ma iye due eiou ka engil lokono ngen sirva e ngen wan ka pula keniye ka iye tapol taklak ine ma isak yagos la.

¹³ E itapara ke wan ka Ida Tapolngon wai promis ine kodong. Iye wai promis ma sirva oku e taklak oku ma tipolou e tidong. Alo ka iye due isak tipolou osep ma tidong ine e tidue elio isuk isuk ka itau vala.

Itaplau ite itau e itapara ke Ida Puda

¹⁴ Sipmi. Ngong lana ngong ke umu e ngawai langane. Umapara ke alo ka wan tonari polou deka umu arit umu ma umodue elio itau vala ma umodong itau ke Ida Tapolngon bitna. E aitno lumu dong epen kap iye.

¹⁵ E aitno lumu mter ke elio ka Ida Puda aitno omba ke umu e iye dong para ke umu. Iye due langane ma osep aitno lisak la dagar ke iye e iye lua isak ke urok elio epmes ina. E Ida Tapolngon kar ilengen ke ida tovro Pol ka ngong lana ngong ke iye deka iye sogo ine ke umu blang.

¹⁶ Iye sogo ke elio tonari ke ila pas keniye. E alo ka itedidi ila sogongon leklou ite opru ite ma iteile omur ke ila pas lana ine. E osep leklou aitno lisak kaka e aitno lisak orwo ke Ida Tapolngon deka tipagolgol sogongon tonari lana ine. Eriar langka tipagolgol Ida Tapolngon ila pelengon keniye lana ine. E agegeng ma polou ke isak ine.

¹⁷ Sipmi. Ngong lana ngong ke umu e ngawai langane. Umeile elio tonari kodong deka umaplau umu itau lama umedidi osep ka tidar Ida Tapolngon ila pelengon e tipagolgol aitno lumu ke urok pelengon yakngan. E lama umodong dagar ke aitno lumu ila dagar kovok.

¹⁸ Ngawaiki Ida Puda ka Ida Luangan Yesus Krais ila makaingan res polou omba ke aitno lumu e umeile iye itau. Eknikane itakakai angaine tito la egim e mase ma itakakai angaine tito la egim dong vala dong. Lokono.