2 Pita 2 - Aria New Testament

Osep napaprangan yakngan ina

¹ E oglou osep napaprangan yakngan ina tidong kap osep Israel ina. E eriar langane osep parerengen yakngan ina ma tipolou ke umu blang e tibisi urok pelengon yakngan e tiwaiki tinak umu ma umedidi urok pelengon. Tiwaiki urok pelengon yakngan due pogle ke aitno lumu ila dagar. E tipul dogur ke Ida Puda ka kli urok elio epmes ina deka suong ma Ida Tapolngon koli urok elio soulu e due agegeng ke isak.

² Tidue elio soulu aling aling deka osep pula leklou ma tididi urok elio soulu deka osep ka tivati urok elio soulu ma tiwai soulu ke Ida Tapolngon ila ekreng ka lokono.

³ Osep parerengen yakngan ina tiwaiki tidue mani pula e tiwai basikngen adai ma tidue lumu mani ine. E ke oglou lila me Ida Tapolngon dong para e isuk boto ma iye wade isak e due agegeng ke isak.

⁴ Oglou oglou ari Ida Tapol-ngon ila ensel leklou tidue elio epmes ina deka iye songon isak tidong vala kovok. Aurou. Iye uri isak kla ke omur hel e tidong ke omur ka aivoro langka tidong ke kalabus e tipara ke oklou ka Ida Tapolngon ma wade isak ke urok elio epmes ina.

⁵ Mase osep ka tidong oglou ari tipul dogur ke Ida Tapolngon e tidue elio soulu deka iye ules isak ine. E iye lua gute Noa ka napapra Ida Tapolngon ila elio itau e osuk ke isak. Iye lua Noa kap ila osua lumorwo blang vala ma tidong itau alo ka ongon ombatno kading taklak ka pula keniye.

⁶ E mase blang iye mulu armok Sodom e armok Gomora e iye due eiou duru ngen armok orwo tonari ma isak yagos. E isak nisngen ke osep ka tipul dogur ke Ida Tapolngon.

⁷ Gute Lot iye gute ka ila elio itau e osuk. Iye dong ke Sodom e aitno soulu lokono ke elio soulu ka osep Sodom ina tidue. Deka alo ka Ida Tapolngon due eiou duru ngen Sodom iye lua Lot ma iye mete ine kovok.

⁸ Kesua Lot gute itau e osuk e iye dong airavu ke osep epmes ina. Ke oklou kene kene iye vati urok elio soulu e iye klingen urok pelengon soulu deka aitno soulu lokono ine.

⁹ Deka iteile omur langane. Ida Puda karanga lua osep ka tidue elio isuk isuk ka itau ma tikos ke elio ka opru isak. E silang blang iye karanga ules osep epmes ina la lama iding ke oklou ka Ida Tapolngon ma wade osep ka pula keniye ine.

¹⁰ E lokono iye ules osep ka tididi pampamu lisak e tidue elio isungon ka soulu lokono e osep ka tiwaiki tini Ida Tapolngon ila pelengon kovok. Osep parerengen yakngan ina ane tiwaiki tikakai isak tona angainsak e tiwaiki tididi aitno lisak vala. Tiwai soulu ke ensel ka omur heven ina e tiulou tarna lisak ine kovok.

¹¹ E dau ensel ka urok arit omba e timole osep tonari tiwai soulu ke isak ke Ida Puda bitna kovok.

¹² Osep tonari tidong langka ongwa vala e aitno lisak karanga mter ke wan gesa kovok e tididi pampamu lisak vala. E tidong langka ongwa kevena ma osep tidue isak e timter isak ma timete. Tiwai soulu ke elio bitna bitna ka tile ine kovok e ma timete langka ongwa kevena.

¹³ Tidue elio soulu ke osep e Ida Tapolngon koli urok elio soulu ke isak. Aitno lisak mter itau ke elio langka tingen pula e tinim pula alo ka oklou bublo. E tingen kap umu e tidue umu mnak umu ine e tidue umu umopolou langka amum. E aitno lisak neser ke urok yakngan.

¹⁴ Osep tonari tikrim apmang ka ekreng palma ina ma tidue elio kap isak e aling aling tiwaiki tidue elio epmes ina. Tiyak osep ka aitno lisak ila dagar dau dagar kovok ma tidue elio soulu. Tile omur ke elio ka tingale e tidue osep urok wan. Aisudo. Ida Tapolngon ma ules isak ke urok elio soulu ka tidue.

¹⁵ Tisongon ekreng ka tididi elio itau e isak kla ulik ulik e tidue elio soulu vala. Tididi gute Balam ka iye gute Beor otno arang ila elio. Oglou iye due elio soulu deka osep tikar iye mani ine e aitno mter ke mani tonari vala.

¹⁶ E Ida Tapolngon due donki wai dagar ke iye ke ila elio soulu. Iteile donki karanga wai kovok e dau Ida Tapolngon due donki tonari wai langka itosep. Donki wai deka dangdang Balam ka iye gute napaprangan ina ke ila elio manga manga ka iye waiki due.

¹⁷ Osep parerengen yakgan ina isak langka ovuk ka aki polou adai ke taklak ine ka aki dong ine kovok koke isak langka gaup ka engen dagar ipu isak kla. Ida Tapolngon rere omur ka aivoro lokono ke isak.

¹⁸ Tiwai omba e tiwai ulik ulik ma tikaranga tinak osep leklou ma tididi pampamu lisak e tidue elio soulu ka nak osep ka oku ane vala tikos ke osep ka tididi aitno lisak vala.

¹⁹ Osep parerengen yakngan ina tiwai ke osep tonari ma tidong fri e dau isak tona tidong langka wokboi nating ke urok elio soulu ka plau isak. Kesua wan ka mole gute gesa karanga plau iye blang.

²⁰ Langka osep aitno lisak la dagar ke Yesus Krais ka iye Ida Puda e Ida Luangan deka tikos ke wan bitna bitna ka soulu ka taklak ina. E langka mase tiding tidue elio soulu blang e elio soulu plau isak deka urok mosongon polou soulu blang. Oglou urok mosongon soulu e eknikane urok mosongon soulu lokono.

²¹ Tile omur ke elio ka tikaranga tipolou itau e osuk ke Ida Tapolngon bitna kodong. E mase tipul dogur ine deka tidong soulu lokono. Langka tile elio itau tonari kovok are itau. Tiklingen Ida Tapolngon ila pelengon e dau tipul dogur ine deka tidong soulu lokono.

²² Are langka pelengon ano ka kene ka langane. “Gemle mteke deka iding e ngen ila mtekngen.” E pelengon ano silang langane. “Osep tiris ovar deka suong iye la sabur ke taklak digor.”