2 Pita 1 - Aria New Testament

¹ Ngong Saimon Pita ngong Yesus Krais ila wokboi nating e ila aposel gesa. Iye Ida Tapolngon e Ida Luangan blang. Iye due elio itau e osuk e kar ila elio tonari ke ite ma aitno lite la dagar ine. Ngasogo pas ane uti ke umu ka aitno lumu ila dagar eriar langka aitno limi ila dagar.

² Ngawaiki Ida Tapolngon ila makaingan e elio ka iye due aitno lumu dong epen dong kap umu. E ngawaiki umeile omur itau ke Ida Tapolngon e Ida Puda Yesus.

Ida Tapolngon rere ite ila osep

³ Yesus iye Ida Tapolngon blang e iye didi ila arit e kar ite wan pula ka lua ite ma udo mosongon dong itau e itodue elio bitna bitna ka itau. Iye lua ite ma iteile itau ke iye ka gi ite ma itodong kap iye ke ila bublongon e ila elio ka itau lokono.

⁴ Iye due langane deka kar ila kerengen ka omba lokono e ka ina klingen ombatno ka iye wai promis ine kodong ke ite. Iye kar ila kerengen ke ite ma itokos ke elio soulu bitna bitna ka taklak ane ina ka waiki pagolgol aitno lite. E ma itodong kap iye e itodong itau lokono langka iye dong itau lokono.

⁵ Ida Tapolngon lua umu itau deka aitno lumu mter omba ine. Aitno lumu ila dagar la ke Ida Tapolngon kodong deka umodue elio isuk isuk ka itau vala. Umodue elio langane deka umu arit umu ma umodue ilengen itau ka la ke Ida Tapolngon.

⁶ Deka umaplau pampamu lumu itau e umodong dagar alo ka wan polou ka opru umu e umodue elio isuk isuk ka Ida Tapolngon aitno itau ine.

⁷ Umodue mada ke lumu osua e umu lana umu ke osep.

⁸ Langka elio tonari dong kap umu e res polou omba ke aitno lumu deka lumu ilengen ka la ke Ida Puda Yesus Krais due umu deka umodue elio itau pula. Lumu ilengen lua umu ma umodue ila bokongon itau.

⁹ E langka elio tonari dong ke gute kene kovok deka ane langka bitna evin e iye karanga vati itau kovok. E bitna uli ke elio ka Ida Tapolngon klok ila elio epmes ina ka oglou iye due kodong.

¹⁰ Sipmi. Ida Tapolngon gi umu e rere umu ila osep kodong. Deka umu arit umu ma umodue elio isuk isuk ka itau ma umeile omur Ida Tapolngon rere umu ila osep umu. Langka umodue langane ma umopul dogur ke iye kovok.

¹¹ Umodue langane deka alo ka umemete kodong e umetito ke omur heven Ida Tapolngon ma klok ekreng bitna ke umu. Ma umesep ke omur ka Ida Puda e Ida Luangan Yesus Krais tiplaue ka dong vala dong.

¹² Umeile pelengon tonari e umodong dagar ine kodong. Lama langane dau ngawaiki ngasruk aitno lumu ke pelengon ane ma omtomu sisir ke pelengon lokono ka umodue kodong.

¹³ Aitno lungong mter langka are itau ma ngasruk aitno lumu ke pelengon ane la lama iding ke alo ka ngamete.

¹⁴ E ngaile isuk boto ma ngamete. Ida Puda nis ngong ine kodong.

¹⁵ E oku ane ngaboko e ngong arit ngong ma ngasruk aitno lumu. Deka ke batne ke alo ka ngamete kodong aling aling omtomu karanga sisir lou pelengon ane.

Osep aposel tivati Ida Tapolngon ila bublongon dong ke Krais

¹⁶ Alo ka imawai ke umu ke Ida Puda Yesus Krais ila arit e elio ka mase iye ma iding me imedidi basikngen adai koke alemge kovok. Aurou. Imavati ila elio ka itau lokono e ila arit.

¹⁷ E imodong kap iye e imeklingen Ida Tapolngon ka Pmada ila pelengon alo ka iye kakai Yesus angaine tito la egim. Alo ari imeklingen Ida Tapolngon ka dong egim lokono wai langane. “Gute ane Erigu Arang ka ngong lana ngong omba ke iye e aitno lungong itau lokono ke iye.”

¹⁸ Imeklingen kreine tonari wai ke omur heven kesua imodong kap Yesus ke Ida Tapolngon ila gigri ka iye dong ine.

¹⁹ Imeklingen pelengon tonari e aitno limi dagar ke osep napaprangan ina urok pelengon e imeile omur urok pelengon lokono. E umu blang aitno lumu dagar ke urok pelengon ka langka lam ka bublo ke aivoro. Lam bublo ke aivoro la lama iding ke alo ka gaga tito. Bitna langka langane alo ka Krais dong ke aitno lumu langka gigimo marupo bublo.

²⁰ Mgo ngawaiki umeile omur ke pelengon ane. Itakaranga itedidi ite tona aitno lite ma itawade Ida Tapolngon ila pelengon ka osep napaprangan ina tisogoe kovok.

²¹ Kesua osep napaprangan ina tididi aitno lisak deka tisogo pelengon kovok. Aurou. Ano Itau due aitno lisak deka tiwai Ida Tapolngon ila pelengon.