2 Korin 9 - Aria New Testament

Osep Korin ina tituktuk urok mani la ke omur Judia

¹ Umeile kodong ke mani ka la ke Ida Tapolngon ila osep ka tidong ke omur Judia. E ma ngasogo ine blang kovok.

² Ngaile umawaiki umolua osep e ngakakai angainmu ine. Ngawai ke osep Masedonia ina ine langane. Ke tobor kene la kodong osep Akaia ina tidong redi ma tilua osep. E lumu elio sruk osep Masedonia ina aitno lisak ma tiwaiki tikana lumu elio.

³ E ngawaiki lou pelengon ka ngakakai angainmu polou adai kovok. Deka ngapagei Taitus isak ma umekere lumu mani langka ngawai umodue.

⁴ Ngadue langane lama osep Masedonia ina leklou time kap ngong e tivati umu dau umekere lumu mani kovok. Langka langane e imi mnak imi ine kesua oglou aitno limi dagar ma umekere lumu mani e dau umekere kovok. E umu mnak umu ine blang.

⁵ E aitno lungong mter langka itau ma Taitus isak kla ke umu mgo e tikere lumu mani ka umawai dagar ine. Ma lumu mani dong para e osep tile umedidi aitno lumu ine e ngapagei umu kovok.

⁶ Aitno lumu mter itau ke pelengon ano ane. Gute ka usak yage daudeng ma due ngangon sasi boto vala ine. E gute ka usak yage omba ma due ngangon pula ine.

⁷ Deka gute kene kene aitno mter itau ke wan ka iye waiki kare ke osep leklou. Lama gute aitno soulu ke wan ka iye kare koke osep tipagei iye ke wan ka iye kare. Kesua Ida Tapolngon aitno itau ke osep ka aitno lisak neser alo ka tikar urok mani ke osep leklou.

⁸ E Ida Tapolngon karanga kar wan pula ke umu ka mole wan ka karanga ke umu. Deka wan dong ka karanga ke umu e silang umakaranga umakar wan pula leklou ke osep ka urok wan isuk boto vala.

⁹ Ida Tapolngon ila pelengon wai langane. “Gute ka tovro bitna tongo ila wan ke osep ka urok wan isuk boto vala e ila elio itau tonari dong vala dong.”

¹⁰ Ida Tapolngon kar wan bitna bitna londo ke osep ma tiusak isak e iye kar osep inarak ngangon blang. Iye kar umu wan ka karanga ke umu e due wan tonari polou pula lokono ma umakaranga umolua osep leklou ine.

¹¹ Ida Tapolngon ma due lumu wan bitna bitna tipolou pula ma aling aling umakaranga umotongo wan ke osep leklou. E osep ka tidue lumu mani ka imakare ke isak ma aitno lisak itau ine e tikakai Ida Tapolngon angaine tito la egim ine.

¹² E lumu bokongon ane ma lua Ida Tapolngon ila osep ka urok wan isuk boto vala. E silang blang lumu bokongon ane due isak tikakai Ida Tapolngon angaine tito la egim.

¹³ E osep pula tivati lumu bokongon itau deka tile umedidi Krais ila omon itau ka umawai ine lokono e tikakai Ida Tapolngon angaine ine. E silang blang tikakai angaine kesua umotuktuk lumu wan pula e umolua isak e osep leklou blang ine.

¹⁴ Deka osep Judia ina ma isak lana isak ke umu omba e tiwai itau ke Ida Tapolngon ke umu. Tidue langane kesua tile Ida Tapolngon makai umu omba.

¹⁵ Ida Tapolngon ila makaingan ke ite itau lokono e udo pelengon karanga wai ine kovok. Ma itawai tenkyu ke Ida Tapolngon e itakakai angaine tito la egim ine.