2 Korin 8 - Aria New Testament

Osep Kristen tigom urok mani ma tilua osep Judia ina ine

¹ Sipmi. Imawaiki imapalongo lumu ke Ida Tapolngon ila makai-ngan ka polou ke sios kene kene ke provins Masedonia.

² Wan pula tipolou ka opru isak e dau aitno lisak neser omba. E lama urok wan bitna bitna isuk boto vala dau aitno lisak mter ke osep Kristen leklou e tituktuk urok mani e tikare ke isak e aitno lisak mter ke isak tona vala kovok.

³ Ngawaiki ngawai malak langane. Tituktuk urok mani ka tikaranga ine e silang blang ti-tuktuk urok mani leklou blang. E gute gesa pagei isak ine kovok. Aurou. Tididi aitno lisak ine vala.

⁴ Tiwai ke imi dagar ma tikaranga tilua osep leklou deka tituktuk urok mani la ke Ida Tapolngon ila osep ka tidong ke omur Judia.

⁵ E aitno limi mter tikar mani vala. E aurou. Paide tikar aitno lisak ke Ida Puda e tididi Ida Tapolngon aitno e tikar aitno lisak ke imi blang.

⁶ Oglou Taitus sruk aitno lumu ma umonogrum ke elio ka umotuktuk lumu mani blang. E oku ane imawai ke iye ma iye lua umu ma umababrum bokongon tonari.

⁷ E umodue elio itau ke elio isuk isuk ka umodue. Elio langka aitno lumu dagar ke Ida Tapolngon e umawai Ida Tapolngon ila pelengon itau lokono. E umeile omur ke Ida Tapolngon ila pelengon e umawaiki umodue Ida Tapolngon ila boko-ngon lokono e umu lana umu ke imi. Deka imawaiki umu ma umodue elio itau ke bokongon ka umolua osep leklou.

⁸ Ngawaiki ngawai pelengon dagar ke umu langka ngaplau umu kovok. Ngawaiki ngapalongo lumu ke osep Masedonia ina urok elio itau ka tikar urok mani ke osep Judia ina. Ma umakana urok elio. Ke elio langane ma umenis osep langka elio ka umu lana umu ke osep iye wan lokono.

⁹ E umeile Ida Puda Yesus Krais ila makaingan. Iye dong ke omur heven e wan ka pula keniye tidong ila wan. E dau iye songon wan tonari e polou langka ila wan isuk boto vala ma iye lua umu. Iye due langane ma lumu wan pula tidong ke Ida Tapolngon bitna.

¹⁰ Aitno lungong langane ke mani tonari. Tobor kene la kodong umonogrum ke bokongon ka umogom mani deka oku ane are itau ma umababrum bokongon ane. Umomgo ke osep ka tiwaiki tituktuk urok mani.

¹¹ Deka eknikane are itau langka umababrum bokongon ka oglou umawaiki umodue. Ngawaiki umotuktuk lumu mani iding ke wan ka umakaranga ine.

¹² Kesua langka gute waiki tuk mani la ke osep leklou Ida Tapolngon aitno itau ke iye. Langka gute karanga lua osep ke mani isuk boto vala kesua ila wan isuk boto Ida Tapolngon aitno itau ke iye. Kesua Ida Tapolngon aitno itau ke gute ka tuk ila mani ka dong ke iye e lua osep leklou ine.

¹³ Ngawaiki lumu elio ka umotuktuk mani opru umu vala e osep leklou tidong adai vala kovok. Aurou. Ngawaiki umu keniye umodong eriar.

¹⁴ E oku ane lumu mani pula ma lua osep leklou e mase langka lumu wan isuk boto deka tikaranga tilua umu. Ma umu pula umodong eriar.

¹⁵ Ane langka Ida Tapolngon ila pelengon ka wai langane. “Osep ka tigom inarak nga-ngon pula are mole inarak sasa kovok e osep ka tigom inarak ngangon sasi boto are karanga ke isak.”

Pol pagei osep leklou isak kla ke Korin

¹⁶ Aitno limi itau e imawai itau ke Ida Tapolngon kesua iye due Taitus aitno kene kap aitno limi. E iye waiki lua umu eriar langka imawaiki imolua umu.

¹⁷ E aitno itau ine alo ka imepmi iye ma iye lua umu e silang blang aitno omba ma iye lua umu. E iye didi aitno e uti ke umu.

¹⁸ E imapagei limem aten kene kap iye. Sios pula tidue anit ke gute tonari kesua iye boko engil e napapra omon itau.

¹⁹ E silang blang sios tonari tirere iye ma iye la kap imi e lua imi alo ka imogom mani e imakalke la ke Jerusalem. Imodue bokongon tonari ma osep tikakai Ida Puda angaine tito la egim e silang blang ma imenis osep imawaiki imolua isak.

²⁰ E imawaiki osep aitno lisak itau ke limem elio ka imogom deka imotongo mani ane. Kesua mani omba e imawaiki imaplaue itau lama osep tidue adis ke imi.

²¹ Kesua imawaiki imodue wan ka itau e osuk ke Ida Puda bitna e ke osep amtarsak blang.

²² E imapagei limem aten silang kap Taitus e osep ka tidong kap iye. Oglou imakar bokongon ke gute tonari e aitno dagar ma iye boko itau ine. E oku ane iye ile umawaiki umodue elio itau deka iye waiki boko dagar lokono.

²³ Ngong imorwo lou aten Taitus imoboko pulu ke bokongon ka imolua umu. E limem saten orwo ka tigosok Taitus isak sios tonari ila osep bokongon ina e urok bokongon kakai Ida Puda angaine tito la egim.

²⁴ Deka ngawaiki umenis sios pula ke elio ka umu lana umu ke Taitus e ke osep ka tidong kap iye. E ngawaiki osep Kristen tile imapakaru umu ke lumu elio itau adai kovok.