2 Korin 7 - Aria New Testament

¹ Lou saten. Imodue Ida Tapol-ngon ila promis kodong. Deka ma itopul dogur ke elio soulu bitna bitna ka tidue pampamu lite e ante amum. Ma itodue anit ke Ida Tapolngon e itodue elio itau ka aitno itau ine.

Pol aitno neser ke osep Korin ina

² Ngawaiki ma umu lana umu ke imi. Imodue elio soulu ke gute kene kovok. Imayak osep deka imodue urok wan kovok. Aurou.

³ Ngawai ke umu ma ngamulu umu ine kovok. Aurou. Kesua oglou ngawai langane. Imi lana imi ke umu lama imodong koke imemete.

⁴ Ngaile ngakaranga ngawai malak e osuk ke umu. Umodue aitno lungong itau. Aitno lungong dong epen batne ke umu. Agegeng bitna bitna tipolou ke imi e dau aitno lungong neser omba.

⁵ Alo ka imopolou ke provins Masedonia imakaranga imomtong boto kovok. Imopolou e elio soulu bitna bitna tipolou ka opru imi. Osep ka tidong dogur orsak timluk pelengon pulu kap imi e imedigrik e anmi nesik.

⁶ E dau Ida Tapolngon ka lua osep ka aitno lisak kro ke wan ka opru isak due aitno limi itau alo ka Taitus polou ke imi.

⁷ E aitno limi itau ke Taitus vala kovok. Aitno limi itau kesua iye palongo limem ke elio ka umodue aitno itau. Iye wai umawaiki umavati imi blang e iye wai aitno lumu soulu ke elio ka oglou umodue e iye wai umawaiki umodong aitno lumu kene pulu kap ngong blang. Deka aitno lungong neser omba ine.

⁸ E ngaile lou pas ka oglou ngasogoe uti ke umu due aitno lumu soulu e aitno lungong kro ine kovok. E dau aitno lungong kro ine boto. Lou pas tonari due aitno lumu soulu e due langane sasi boto vala.

⁹ Oku ane aitno lungong neser batne ke elio ka aitno lumu soulu vala kovok. Aurou. Aitno lungong neser batne aitno lumu soulu deka elio ane due umu ma umabauluk aitno lumu. Ngaile Ida Tapolngon didi aitno e due aitno lumu soulu e imodue elio soulu ke umu kovok

¹⁰ Alo ka Ida Tapolngon due osep aitno lisak soulu ane due isak ma tibauluk aitno lisak. E ke elio ane Ida Tapolngon lua isak ke urok elio epmes ina e aitno lisak itau ke wan bitna bitna ka tipolou ke isak. E ke osep leklou ka aitno lisak soulu batne ke elio ka taklak ane ina elio ane due metengen polou.

¹¹ Umeile elio ka Ida Tapolngon due aitno lumu soulu due elio bitna bitna itau tipolou. Elio tonari langane. Umawaiki umomosi pelengon ka mter umu e aitno lumu engil ke gute ka due elio epmes ina. E umodue anit ke Ida Tapolngon e aitno lumu kro ke imi e umoboko dagar ma umomosi gute ka due elio soulu ila elio. Ke wan ka pula keniye ka umodue umenis imi langane. Elio gesa vri ke umu ine kovok.

¹² Alo ka ngasogo pas uti ke umu aitno lungong mter ngamosi elio ke gute ka due elio soulu kovok. E aitno lungong mter ke gute silang ka gute tonari due elio soulu ine kovok. Aurou. Ngasogoe ma lumu elio itau polou malak e ke Ida Tapolngon bitna umeile umu lana umu ke imi.

¹³ Deka lumu elio langane due aitno limi itau lokono. Aitno limi dong itau e silang blang aitno limi neser kesua Taitus aitno itau e kro kovok batne ke lumu elio itau ka umodue.

¹⁴ Ke oglou ngawai ke Taitus ke lumu elio itau e ngakakai angainmu ine. Deka ngong mnak ngong ke lou pelengon kovok. Pelengon ka imawai ke lumu elio iye pelengon lokono e oku ane Taitus vati umu e ile limem pelengon ka imawai ka kakai angainmu iye pelengon lokono.

¹⁵ Alo ka iye polou ke umu deka umodue anit ke iye e umedidi ila pelengon. E elio ka iye lana iye ke umu res polou omba.

¹⁶ Oku ane aitno lungong neser kesua ngaile ma umodue elio itau vala.