2 Korin 6 - Aria New Testament

Osep aposel tinamani elio ka opru isak batne ke urok bokongon

¹ Imoboko kap Ida Tapolngon e ila makaingan polou ke umu deka imawaiki imawai dagar ke umu langane. Umeile umu itau lama aitno lumu mter ila makaingan wan adai vala.

² Umoklingen Ida Tapolngon ila pelengon. Iye wai langane. “Alo ka ngawaiki nga-klingen lumu pelengon ma ngaklingen ine. E alo ka ngawaiki ngalua umu ke lumu elio epmes ina ma ngalua umu ine.” Umoklingen. Eknikane Ida Tapol-ngon ma klingen ite e lua ite ke udo elio epmes ina.

³ Imawaiki osep tiwai soulu ke limem bokongon kovok deka ke batne langane imodue wan gesa ka karanga pagolgol aitno lisak kovok.

⁴ Aurou. Imodue elio itau vala ka nis osep imi Ida Tapolngon ila osep bokongon ina. Imodong dagar lokono alo ka agegeng e wan soulu e wan polou ka opru imi.

⁵ E silang blang imodong dagar lokono alo ka osep timluk imi e alo ka tidue imi imesep ke kalabus. Osep leklou aitno lisak soulu ke imi e tisruk osep aitno lisak ma tiwaiki tipaiavu imi. E imoboko engil lokono e imakaranga imomunu kudung itau kovok e sapanga due imi.

⁶ E Ano Itau lua imi ke limem bokongon deka imodue elio isuk isuk ka itau vala e imedidi ilengen itau. E aitno limi epen e imodue mada ke osep e imi lana imi ke osep e imayak ine kovok.

⁷ Imanapapra pelengon ka lokono vala e imoboko ke Ida Tapolngon ila arit. Imodue elio isuk isuk ka itau e limem elio tonari langka ola e osua ka tilua osep alo ka tidue evlei kap inarak oul.

⁸ Osep leklou tikakai angain-mi e osep leklou blang tipes angainmi. Osep leklou tidue anit ke imi e osep leklou blang tidue markan ke imi. Osep leklou tiwai imi osep yakngan ina e langane kovok. Imawai pelengon lokono vala.

⁹ Osep leklou aitno lisak mter angainmi omba kovok e dau osep pula tile ke imi. Osep leklou tivati imi langka isuk boto imemete e dau imodong. Osep tidue agegeng ke imi e dau imemete ine kovok.

¹⁰ Aling pula aitno limi kro ke elio soulu ka polou ke imi e dau aling aling aitno limi neser. Imodong langka osep ka urok mani isuk boto vala e dau limem bokongon lua osep pula ma tidong itau. Limem wan bitna bitna ka taklak ina pula kovok e dau Ida Tapolngon lua imi ke ila kerengen ka itau.

¹¹ Umu osep Korin ina. Ima-waiki imawai malak ke umu. E imi lana imi omba lokono ke umu.

¹² Imopono aitno limi ke umu kovok. E imi lana imi ke umu. E umopono aitno lumu ke imi e umu lana umu ke imi kovok vala.

¹³ Deka oku ane ngawai ke umu langka dirgu. Ngawaiki ma umu lana umu omba ke imi langka imi lana imi omba ke umu.

Ida Tapolngon ila ninu ite

¹⁴ Umu ka Ida Tapolngon ila osep umeneklep ke osep epmes ina ma umogosok umodue bokongon pulu kovok. Aitno lumu lange? Elio itau e elio soulu tikaranga tineklep pulu? Koke bublongon e aivoro tikaranga tidong pulu? Aurou lokono.

¹⁵ Koke Krais e Satan tikaranga tidong kene pulu? Koke gute ka aitno dagar ke Ida Tapolngon e gute ka aitno dagar kovok tikaranga tidong kene pulu? Aurou lokono.

¹⁶ Koke Ida Tapolngon ila ninu e sapingen tikaranga tidong pulu? Kesua ite keniye langka Ida Tapolngon ila ninu. Ila pelengon wai langane. “Ma ngadong kap isak e ngalila kap isak. E ma ngadong Inarak Tapolngon e ma tidong lou osep.”

¹⁷ E Ida Puda wai blang langane. “Umosongon isak e umo-dong mawa ke isak lama umeneklep ke elio soulu. E ma aitno lungong itau ke umu ka lou osep.”

¹⁸ E Ida Puda ka ila arit omba lokono wai langane. “Ma ngadong Pmomu e umodong dirgu arang e apmang.”