2 Korin 5 - Aria New Testament

Itapara ke alo ka itodong ke omur heven

¹ Iteile pampamu lite langka ninu molo ina. Langka ninu tonari polou yagos Ida Tapolngon ma kere ninu oku ina ke ite ka osep tiurie kovok. Ninu oku ina tonari dong vala dong ke omur heven.

² E eknikane itodong ke ninu ane ka pampamu lite e itangangir e itapara ma itesep ke ninu oku ina ka omur heven ina.

³ Ninu ane langka klos ka itakading pampamu lite ine. Kesua alo ka itesep ke klos tonari itodong albus ite kovok.

⁴ Alo ka itodong ke ninu molo ina ane itapara ke alo ka wan ka opru ite yagos. Ane langka itawaiki itosongon pampamu lite oglou ina vala kovok. Aurou. Itawaiki itesep ke pampamu lite oku ina vala ma pampamu lite ane polou yagos deka itodue mosongon oku ina.

⁵ E Ida Tapolngon kere ite ke mosongon oku ina tonari e iye kar Ano Itau ke ite ka wan mgongon ina ke wan bitna bitna ka mase ma iye kare ke ite.

⁶ Aitno lite mter langare e aling aling elio tonari due aitno lite dagar. Kesua iteile alo ka itodong ke pampamu lite ke taklak ane itodong kap Ida Puda ke ila omur kovok.

⁷ Eknikane itodong batne ke aitno lite ila dagar e batne ke wan ka itakaranga itavati kovok.

⁸ Aitno lite mter langane deka itodong dagar e itawaiki itosongon pampamu lite e itala itodong kap Ida Puda ke ila omur.

⁹ Aimana lite langane. Lama itodong ke pampamu lite ane koke itosongone itawaiki ma Ida Puda aitno itau ke elio ka itodue.

¹⁰ Iteile mase ma ite kente kente itevri ke Krais bitna ma iye wade ite. Ma iye wade wan bitna bitna ka itodue ke taklak ane. Langka isak elio itau koke elio soulu.

Itoboko ma osep aitno lisak kene kap Ida Tapolngon

¹¹ Imodue anit ke Ida Puda e ke batne langane imawai ke osep ma aitno lisak la dagar ke iye. Ida Tapolngon ile ke limem elio kodong e ngawaiki umeile ine blang.

¹² E imawaiki imawai ke umu aling silang blang ma aitno lumu itau ke imi kovok. Aurou. Imosogo pas ane uti ke umu ma aitno lumu neser ke limem elio isuk isuk. Imawaiki ma umakaranga umokoli pelengon ke osep ka tikakai angainsak ke wan bitna bitna ka tikaranga tidue. E aitno lisak mter ke wan ka dong ke aitno lisak kovok.

¹³ Langka aitno limi kaka ane wan ke imi e Ida Tapolngon vala. E langka aitno limi mter itau ane lua umu.

¹⁴ Kesua elio ka Krais lana iye ke imi plau imi. E imeile gute kene mete e kasip osep ka pula keniye amunsak e elio ane langka isak ka pula keniye timete blang.

¹⁵ Gute tonari mete ma iye lua osep ka dau tidong ma aitno lisak mter ke isak vala kovok. Aurou. Ma aitno lisak mter ke gute ka mete e kasip amunsak deka iye poga tito ke ina denga.

¹⁶ Ke oglou itawade Krais ke ilengen ka taklak ina e oku ane itawade iye langane kovok. E silang blang oku ane itedidi ilengen ka taklak ane ina e itawade osep ine kovok. Aurou.

¹⁷ Langka gute gesa nepir ke Krais iye polou gute oku ina. Ila mosongon oglou ina yagos la e ila mosongon oku ina polou kodong.

¹⁸ Wan bitna bitna tonari polou ke Ida Tapolngon. Oglou ite Ida Tapolngon ina oul ite deka ke Krais iye due aitno lite tipolou kene kap iye. Aitno lite kene kap iye deka iye kar bokongon ke ite ka itoboko e itodue osep leklou aitno lisak kene kap iye blang.

¹⁹ Ane langka ke Krais Ida Tapolngon due osep ka pula keniye aitno lisak kene kap iye e urok elio soulu vri ke isak kovok. E iye kar bokongon ke ite ka itanapapra omon itau ma itodue osep aitno lisak tipolou kene kap iye.

²⁰ Deka imi Krais ila osep meriang ina. Are langka Ida Tapolngon wai ke osep ke epmi. Deka imepmi umu dagar ke Krais angaine ma aitno lumu kene kap Ida Tapolngon.

²¹ Alo ka Krais dong ke taklak iye due elio epmes ina kovok. E Ida Tapolngon waiki lua osep deka iye due udo elio epmes ina ina klingen munu pes Krais e iye kasip amunte. Iye due langane ma itakaranga itodong itau e osuk ke bitna batne ke Krais.