2 Korin 4 - Aria New Testament

Ida Tapolngon kar bokongon ke osep aposel

¹ Ida Tapolngon aitno due imi e kar bokongon ane ke imi e imoulou ine e imosongone kovok. E imodue vala.

² Imopul dogur ke elio bitna bitna ka osep tikukwop isak kesua batne isak mnak isak ine alo ka tidue. Imedidi elio ka yakngan kovok e imobuli wan sasi kap Ida Tapolngon ila pelengon kovok. Aurou. Imanapapra pelengon ka lokono malak ma osep tikaranga tiwade limem elio e tikaranga tile omur ke limem mosongon ke Ida Tapolngon bitna.

³ E lama osep leklou tile omur ke omon itau ka imanapapra ke isak kovok io omon tonari malak kovok ke osep ka ma isak kla ke omur hel vala.

⁴ Satan ka iye plau taklak ane due osep ka aitno lisak dagar ke Ida Tapolngon kovok aitno lisak aivoro ma tikaranga tivati bublongon ke Krais ila omon itau kovok. E Krais eriar langka Ida Tapolngon.

⁵ E imanapapra ke limem elio kovok. Aurou. Imanapapra langane. Krais Yesus iye Ida Puda e imi lumu osep bokongon ina batne ke Yesus.

⁶ Ke oglou Ida Tapolngon wai langane. “Ma esluk polou bublo airavu ke aivoro.” Ida Tapolngon tona due esluk polou bublo ke aitno limi ma imeile omur ke Ida Tapolngon ila bublongon ka bublo ke Yesus Krais bitna.

⁷ E Ida Tapolngon due ila pelengon sep ke imi osep aposel pampamu limi ka isak wan adai langka ulo. Elio langane dong ma osep tikaranga tile arit me ke Ida Tapolngon e me ke imi kovok.

⁸ Aling pula elio ka opru polou ke imi e dau elio tonari due limem arit polou yagos kovok. E aling leklou imeile omur ke wan ka ma imodue kovok e dau imeile sasi boto ine.

⁹ Osep tidue agegeng ke imi e dau Ida Tapolngon dong kap imi. Osep timluk imi ma imegene e dau imemete ine kovok.

¹⁰ Aling aling osep tiwaiki tidue burwa ke imi langka oglou tidue ke Yesus. E imodong ma tikaranga tile Yesus dong ke aitno limi.

¹¹ Aling aling imodong e osep tiwaiki timluk imi ma imemete batne aitno limi dagar ke Yesus. Imawaiki ma osep tivati Yesus ke pampamu limi.

¹² Aling aling metengen dong olwo boto ke imi ma umodue mosongon ka dong vala dong.

¹³ Oglou gute napaprangan ina sogo Ida Tapolngon ila pelengon ka wai langane. “Aitno lungong dagar ke Ida Tapolngon ila pelengon e ke batne langane nganapapra ine.” E imi blang aitno limi dagar ke Yesus deka imanapapra ine.

¹⁴ E silang blang imeile kodong langane. Ida Tapolngon due Ida Puda Yesus poga tito ke ina denga e ma iye due imi imopoga imetito ke ida denga kap iye. Deka imi kap umu itodong ke bitna.

¹⁵ Wan bitna bitna tonari tidong ma tilua umu ke lumu mosongon. E ke elio langane Ida Tapolngon ila makaingan kes lila ke osep pula ma tiwai tenkyu ke wan ka Ida Tapolngon kare ke isak e tikakai angaine tito la egim ine.

Osep aposel tidue urok arit ke Ida Tapolngon

¹⁶ Aitno limi mter ke wan tonari deka imodong dagar ke limem bokongon. Lokono. Pam-pamu limi polou nopos e sasi e dau aitno limi polou oku ke oklou kene kene.

¹⁷ Imeile elio ka polou ka opru imi tidong isuk boto vala e isak wan gesa kovok. Elio tonari kere imi ma imodue mosongon ka itau lokono ka dong vala dong. E mosongon tonari mole wan ka pula keniye.

¹⁸ Aitno lite mter ke wan ka amtada karanga vati ke taklak ane kovok. Aurou. Aitno lite mter ke wan ka omur heven ina ka amtada karanga vati kovok. Kesua wan ka itakaranga itavati isak wan ka tidong sasi boto vala e wan ka itakaranga itavati kovok isak wan ka tidong vala tidong.