2 Korin 3 - Aria New Testament

Osep aposel tiboko ke Ida Tapolngon ila kontrak oku

¹ Oku ane imonogrum ima-kakai angainmi i? Koke imawaiki imodue pas ke osep leklou ka palongo lumu langka imi osep itau langka osep leklou tidue? Koke imawaiki umosogo pas ka palongo osep leklou imi osep itau? Aurou lokono.

² Umu tona umodong langka pas ka palongo osep ke limem elio. Deka osep ka pula keniye tikaranga tiritim pas are e tile omur ine.

³ Umodong malak langka pas ka me ke Krais. Ke limem bokongon Krais sogo pas are. Iye sogoe ke ing kovok. Iye sogoe ke Ida Tapolngon ka dong vala dong Ano Itau. E silang iye sogoe ke opmu kovok e iye sogoe ke osep aitno lisak vala.

⁴ Imakaranga imawai langane kesua Krais due aitno limi ila dagar dong dagar ke Ida Tapolngon.

⁵ E dau imakaranga ke bokongon tonari kovok e imakaranga imawai imodue wan gesa kovok. Aurou. Ida Tapolngon vala karanga due imi ma imakaranga ke bokongon tonari.

⁶ Iye vala due imi imopolou ila osep bokongon ina ke kontrak oku. Kontrak oku iye wan ka tisogoe ke buk kovok. Aurou. Iye wan ka me ke Ano Itau. Kesua wan ka tisogoe ke buk paur metengen e wan ka me ke Ano Itau kar mosongon ka dong vala dong ke osep.

⁷ Oglou Ida Tapolngon kar ila pelengon ke Moses e pelengon tonari due metengen polou ke osep. E alo ka Ida Tapolngon sogoe ke opmu pelengon polou kap Ida Tapolngon ila bublongon. Deka Moses bitna bublo omba e osep Israel ina amtarsak tikaranga tinekek ine kovok. E dau bublongon dong tauni kovok e mase yagos.

⁸ E lama langane Ano Itau ila bublongon ma mole bublongon tonari e Ida Tapolngon ila bublongon bublo ombatno lokono.

⁹ Kesua langka wan ka wade ite e paur metengen ke ite bublo omba deka wan ka due ite itodong itau e osuk ke Ida Tapolngon bitna ma mole e bublo ombatno lokono.

¹⁰ Bublongon ka oglou dong kap pelengon dagar oglou ina eknikane bitna langka bublongon kovok kesua bublongon ka dong kap Ano Itau ila bokongon mole bublongon tonari lokono.

¹¹ E langka bublongon dong kap wan ka dong sasi boto vala bublongon dong lokono kap wan ka dong vala dong.

¹² Aitno limi dagar e imapara ke elio oku ina ka Ano Itau due polou deka imanapapra ine e imoulou tarna limi kovok.

¹³ E imodue elio langka oglou Moses due kovok. Oglou iye due molo arlak e kading bitna ine ma osep Israel ina tikaranga tivati bublongon ke bitna lila lila duru deka yagos kovok.

¹⁴ E bara lisak pono e tikaranga tile itau kovok. E alo ari lila me ke eknikane alo ka tiritim Moses ila sogongon langka wan dau pono bara lisak. Krais vala karanga pi wan are la.

¹⁵ Lokono eknikane alo ka tiritim Moses ila sogongon langka wan dau pono bara lisak.

¹⁶ E langka gute aitno la dagar ke Ida Puda iye pi wan ka pono baraine la.

¹⁷ Ida Puda ka imawai ine iye Ano Itau e Ida Puda Ano Itau due ite ma itodong fri.

¹⁸ E wan gesa kading ite keniye amtada kovok deka Ida Puda ila bublongon polou ke ite e itopolou langka glas ka osep tikaranga tivati Ida Puda ine. Deka aling aling itolumus itopolou nisngen ke Ida Puda. E Ida Puda iye Ano Itau.