2 Korin 2 - Aria New Testament

¹ Deka aitno lungong mter langane. Ma ngauti ke umu oku ane blang kovok lama lou langan opru umu blang.

² Kesua langka lou elio due aitno lumu soulu sei ma due aitno lungong itau? Umu ka ngadue aitno lumu soulu umu vala umakaranga umodue aitno lungong itau.

³ Umu osep ka umodue aitno lungong neser deka ngawaiki ngauti ke umu e aitno lungong polou soulu ine kovok. Oglou ngasogo pas uti ke umu batne langane. Ngaile langka aitno lungong neser deka umu keniye aitno lumu neser blang.

⁴ Alo ka oglou ngasogo pas ke umu aitno lungong soulu e kro lokono e ngakngis ine. E dau ngasogo pas tonari ma aitno lumu soulu ine kovok e ma umeile omur ngong lana ngong omba ke umu.

Osep Korin ina ma tisak elio ke gute ka due elio soulu

⁵ Gute ka oglou due elio soulu due aitno lungong vala soulu kovok. Aurou. Ngawaiki ngawai etres ke gute tonari kovok e ngawai langane. Iye due umu keniye aitno lumu soulu.

⁶ E kolingen ka umu pula umodue ke iye ane karanga ke iye.

⁷ E silang oku ane ma umasak ila elio epmes ina e umodue mada ke iye. Lama aitno kro lokono ke ila elio e iye karanga ine kovok.

⁸ Deka ngawai dagar ke umu ma umawai ke iye langane. “Imi dau lana imi ke wom.”

⁹ Oglou ngasogo pas uti ke umu batne ngawaiki ngatok umu e ngawaiki ngaile langka ma umedidi lou pelengon keniye koke aurou.

¹⁰ Deka langka umasak gute ila elio soulu ka iye due ke umu ma ngasake blang. E langka osep tidue elio langane e ngasake deka ke Krais bitna ngasake ma ngalua umu ine.

¹¹ Ngadue langane lama Satan karanga yak ite e mole ite. Kesua iteile omur ke Satan aitno e ke ila elio bitna bitna ka iye waiki due.

Pol waiki vati Taitus

¹² Oglou alo ka ngapolou ke Troas ma nganapapra Krais ila omon itau Ida Puda klok ekreng kodong ma ngadue bokongon tonari.

¹³ E dau aitno lungong kro kesua ngavati lou aten Taitus dong ari kovok. Ngavati iye kovok deka ngasongon Troas e ngala ke provins Masedonia.

Ida Tapolngon ila arit lua osep aposel ke urok bokongon

¹⁴ E eknikane ngakakai Ida Tapolngon angaine tito la egim. Kesua aling aling iye mgo ke imi e iye mole wan ka pula keniye e imedidi iye deka imala ke omur omur e imanapapra Krais ila omon itau e osep tiklingen ine e tile ke iye. E pelengon ka osep tiklingen ine langka amnangan itau ka engen ipue la ke omur omur.

¹⁵ E imi langka wan ka amna itau lokono ka Krais due elio opmu ina ine ka la ke Ida Tapolngon. Udo amnangan tonari la ke osep ka Ida Tapolngon lua isak ke urok elio epmes ina kodong e la ke osep ka urok elio epmes ina dau vri ke isak e ma isak kla ke omur hel.

¹⁶ Ke osep ka ma kla ke omur hel amnangan tonari langka wan ka mete ila amnangan e ke osep ka Ida Tapolngon lua isak kodong amnangan tonari langka wan ka ila mosongon dau dong ila amnangan itau. E sei karanga ke bokongon tonari? Imakaranga ine kovok.

¹⁷ Osep pula leklou tiboko langka Ida Tapolngon ila pelengon iye wan ka tidue burong ine. E imi langka isak kovok. Aurou. Ida Tapolngon rere imi ila osep bokongon ina e imawai pelengon lokono ke Krais angaine e imawai ke Ida Tapolngon bitna.