2 Korin 13 - Aria New Testament

Osep Korin ina ma tiplau isak itau

¹ Sasi boto deka ma ngapolou ke umu aling eklu ina. Ngawaiki aitno lumu mter ke Ida Tapolngon ila pelengon ka wai langane. “Langka osep orwo eklu langane tivati gute due elio soulu deka umomosi iye ine.”

² Alo ka ngadong kap umu aling orwo ina ngawai dagar kodong ke osep ka oglou tidue elio epmes ina e ke osep leklou blang ma tidue langare kovok. Eknikane ngadong mawa ke umu e ngawai ke umu blang langane. Alo ka ngapolou aling silang blang ngasongon umu ma umodue elio epmes ina kovok.

³ Umawaiki umeile omur langka ngong Krais ila aposel gesa e ngong ila gute meriang ina koke aurou. Alo ka iye didi ila arit e boko airavu ke umu ma umeile omur ine.

⁴ Lokono. Alo ka osep tinilim Krais mana ke ina akai iye didi ila arit kovok. E oku ane Ida Tapolngon ila arit due poga tito ke ina denga. E imeneklep ke Krais e imi kenmi kenmi limem arit kovok. E dau alo ka imodong kap umu ma umeile omur Ida Tapolngon ila arit dong kap imi.

⁵ Umawade umu itau ke aitno lumu ila dagar. Langka aitno lumu ila dagar dau dong dagar koke aurou. Umeneklep ke Yesus Krais kodong deka iye dong ke aitno lumu. Langka iye dong ke aitno lumu kovok umu ila osep kovok.

⁶ Ngawaiki umeile omur imawade imi tona deka imeile omur imodue Krais ila bokongon.

⁷ Imawai itau ke Ida Tapolngon ma iye lua umu ma umodue elio soulu kovok. Langka osep aitno lisak itau ke limem bokongon koke aitno lisak soulu ine are wan gesa kovok. Wan ka omba langane. Imawaiki umodue elio itau.

⁸ Imakaranga imodue wan gesa ka dangdang Ida Tapolngon ila pelengon ka lokono kovok. Aurou. Imakaranga imedidie vala.

⁹ Aitno limi itau alo ka limem arit dong kovok e lumu arit dong kap umu. E imawai itau ke Ida Tapolngon ma aitno lumu ila dagar dong dagar vala.

¹⁰ Ngasogo pas ane uti ke umu alo ka ngong dau ngadong mawa ke umu. Ngasogoe batne langane. Ngasogoe lama alo ka ngapolou ke umu lumu elio soulu dau dong e ma ngamosi umu ine. Ida Puda rere ngong ma ngakaranga ngadue elio langane e dau ngawaiki ngalua umu e ngaules umu kovok.

Pol babrun ila pelengon

¹¹ Sipmi. Ngababrum lou pelengon ane. Aitno lungong itau ke umu. Ngawaiki umomosi lumu elio ka ulik ulik. Ngawaiki umoklingen e umedidi lou pelengon ka ngawai ine kodong. Ngawaiki aitno lumu kene pulu e aitno lumu epen pulu. Umodue langane e Ida Tapolngon ka iye lana iye ke osep e due aitno lisak epen pulu ma dong kap umu.

¹² Umu ka Ida Tapolngon ila osep umawai “oklou itau” pulu e umesekan pulu. Ida Tapolngon ila osep ka pula keniye ka tidong kap ngong tiwai “oklou itau” ke umu.

^13-14 Ngawaiki Ida Puda Yesus Krais ila makaingan e elio ka Ida Tapolngon lana iye ke umu e elio ka Ano Itau due aitno lumu kene pulu dong kap umu ka pula keniye.