2 Korin 12 - Aria New Testament

Pol munu ano e vati wan bitna bitna

¹ Alo ka osep tikakai angainsak ke urok elio ane lua osep kovok. E dau ma ngakakai angain ngong sasi boto blang. Ngawai ke wan ka Ida Puda nis ngong ine alo ka ngamunu anngong e wan ka iye wai ke ngong ine ka osep leklou tile ine kovok.

² Oglou ke tobor songotno apanal la kodong Ida Tapolngon due gute Kristen kene tito ke omur heven ka Ida Tapolngon dong ine. E ngaile kovok langka gute tonari pampamu ine la kap ano ke omur heven koke ano vala la ke omur heven. Ida Tapolngon vala ile ine.

³ E ngaile langane. Gute tonari tito ke omur heven. E ngaile kovok langka gute dau dong ke pampamu ine koke ano vala sep. Ida Tapolngon vala ile ine.

⁴ Alo ka gute tonari sep ke omur heven iye klingen pelengon ka itosep itakaranga itawai ine kovok.

⁵ Ma ngakakai gute tonari angaine e ngakakai angain ngong kovok. Ngawai lou arit dong kovok e ke wan ane vala ngakaranga ngakakai angain ngong.

⁶ E dau langka ngakakai angain ngong ngawai langka gute ka kaka kovok. Kesua ngawai pelengon lokono vala. E ngawaiki ngakakai angain ngong kovok lama osep ka tivati lou elio e tiklingen lou pelengon aitno lisak mter ngong gute ka itau lokono.

Agegeng pes Pol

⁷ Ida Tapolngon nis ngong ke wan ka itau lokono deka lama aitno lungong mter langka ngong gute ka itau lokono Ida Tapolngon songon Satan ma iye due wan soulu polou ke pampamu lungong. E wan soulu tonari polou ke ngong ma lua ngong lama ngakakai angain ngong ke elio itau lokono ka polou ke ngong.

⁸ Wan soulu tonari due ngong e aling eklu ngapmi Ida Puda ma wan soulu songon ngong.

⁹ Ngapmi Ida Puda ine e iye wai ke ngong langane. “Wan soulu dong e lou makaingan karanga ke wom ma omdong itau. Kesua lou arit polou dagar ke osep ka tile omur urok arit dong ke isak kovok.” Ida Puda wai langane deka aitno lungong neser ine. Ngawaiki ngawai ke elio ka lou arit dong kovok ma Krais ila arit dong ke ngong.

¹⁰ Ngadue Krais ila bokongon e wan bitna bitna tipolou ke ngong. Lou arit kovok e osep tiwai soulu ke ngong e wan polou ka opru ngong. E agegeng e elio soulu polou ke ngong. Wan tonari polou ke ngong e aitno lungong mter isak wan gesa kovok kesua alo ka lou arit kovok deka Ida Tapolngon ila arit lua ngong.

Pol waiki due osep Korin ina aitno lisak tidong dagar

¹¹ Ngawai langka gute ka kaka e batne ke umu. Umakakai angain ngong ke lou elio kovok deka ngong tona ngakakai angain ngong. Ngong langka gute adai vala e dau ngamole osep ka uma-wai isak lumu osep aposel ka angainsak omba lokono.

¹² Oglou alo ka ngadong kap umu ngadue wan pula ka nis umu ngong gute aposel lokono. Ngadong dagar ke lou bokongon e ngadue elio arit ina e elio bitna bitna ka osep tikaranga tidue kovok.

¹³ Ngadue elio ke umu eriar langka elio ka ngadue ke sios leklou. E ngadue elio kene ka silang ke umu. Ngapang mani ke umu kovok kesua ngawaiki ngadue wan ka opru umu kovok. E langka lou elio tonari soulu ngawaiki umasak lou elio soulu.

¹⁴ Oglou ngapolou ke umu aling orwo kodong e oku ane ngawaiki ngadue lou langan eklu ina ke umu. E alo ka ngapolou ma ngapang wan bitna bitna ke umu kovok. Aurou. Ngawaiki ngalua umu vala. Umeile agau tikere wan ke sipmarak e titnarak kovok. Aurou. Sipmarak e titnarak tikere wan ke titorok vala.

¹⁵ E aitno lungong neser ma ngakar lou wan keniye ke umu e ngakar ngong blang ke umu ma ngalua umu ine. Ngong lana ngong omba ke umu. E lange? Ma umu lana umu sasi boto ke ngong i?

¹⁶ Umeile alo ka ngadong kap umu ngapang lumu wan kovok. E dau umu leklou umawai langane. “Alo ka Pol dong kap ite iye yak ite e wai dikngen ke ite ma iye due wan bitna bitna ke ite.”

¹⁷ Aitno lumu lange? Osep ka tipolou ke umu tidue lumu wan e tikare ke ngong?

¹⁸ Oglou ngawai dagar ke Taitus e ke sudo leklou blang ma isak kla ke umu. Aitno lumu lange? Taitus wai dikngen ke umu e due lumu wan? Aurou. Umeile ngong e Taitus aitno limi kene e imodue elio eriar.

¹⁹ Aitno lumu lange? Imosogo pelengon ane ma imomosi limem elio ke omtomu? Aurou. Imi Krais ila osep e imawai pelengon ane ke Ida Tapolngon bitna. Sipmi. Imi lana imi ke umu e imawaiki aitno lumu ila dagar dong dagar.

²⁰ Ma ngapolou ke umu e dau aitno lungong nesik lama lumu elio langka elio ka ngawaiki umodue kovok. E silang blang ngawaiki aitno lumu itau ke lou elio blang. Aitno lungong kro lama ngavati elio soulu ke umu ka langane. Opmu mluk pulu e aitno lumu rim ke osep leklou e aitno lumu nevlik amnga. E aitno lumu mter ke umu kenmu kenmu vala e umawai soulu ke osep e umodue adis. E aitno lumu mter langka umomole osep leklou e umodue elio ulik ulik vala.

²¹ Oglou umodue elio epmes ina langane. Umodue elio soulu kap apmang e umodue okwa e umodue elio soulu ke osep amtarsak. E eknikane aitno lungong kro lama ngapolou ke umu e umu dau umabauluk aitno lumu ke lumu elio soulu kovok. E Ida Tapolngon due ngong mnak ngong ke omtomu e ngakngis omba ke umu pula.