2 Korin 11 - Aria New Testament

Pol due bokongon langka osep aposel yakngan ina tidue kovok

¹ Ngawaiki ngawai pelengon ane ke umu. E langka aitno lumu mter lou pelengon ulik ulik dau ngawaiki umoklingen lou pelengon vala.

² Ngong lana ngong ke umu langka Ida Tapolngon lana iye ke umu. E ngarere umu langka umegi Krais e ngawaiki umodong itau lokono langka apmang ka dau due elio kap gute kovok aitno la ke gute ka iye ma gi iye.

³ Oglou mota ka ila aiding yakngan yak Eva e Eva didi iye. E aitno lungong kro lokono lama osep leklou tiyak umu e aitno lumu ila dagar segesege e dong dagar ke Krais kovok.

⁴ Ngawai langare kesua ngaile langane. Langka gute gesa me ke umu e yak umu ke basikngen silang ka la ke Yesus ma umoklingen ine e umedidie. Koke umodue ano silang ka Ano Itau kovok ma aitno lumu itau ke iye. Koke umodue omon silang ka eriar langka omon itau ka imanapapra umu ine kovok ma umoklingen ine. Ngaile osep tidue langane ke umu deka umekis dagar ine. E ngawaiki umodue langane kovok.

⁵ Umawai osep tonari isak lumu aposel ka angainsak omba lokono e isak osep aposel lokono kovok. E aitno lungong langka timole ngong kovok.

⁶ E osep leklou aitno lisak mter ngaile omur ke elio ka ngawai ke osep amtarsak kovok e dau ngaile omur ke wan bitna bitna. E aling aling ke wan bitna bitna keniye imenis umu langka imeile omur ke wan tonari.

⁷ Alo ka nganapapra Ida Tapol-ngon ila omon itau ke umu io umekli ngong ine kovok. Ngapes ngong tona ma ngakaranga ngadue anit ke umu. Aitno lumu lange? Lou elio tonari elio soulu?

⁸ Alo ka ngaboko ke umu sios pula ke omur leklou tilua ngong ke mani. Are bitna langka ngapanako mani ke isak e ngalua umu ine.

⁹ E silang blang alo ka ngadong kap umu e lou wan isuk boto vala ngapang ke umu kovok. Aurou. Sipmi ka time ke provins Masedonia tilua ngong ke wan bitna bitna. Oglou ngawaiki lou bokongon pes umu kovok e eknikane blang ngawaiki lou bokongon pes umu kovok.

¹⁰ Nga-didi Krais ila elio ka iye wai lokono vala deka langane. Ngawai ke osep pula ke elio ka ngapang mani ke umu kovok e gute gesa ke provins Akaia karanga dangdang lou pelengon kovok.

¹¹ Aitno lumu lange? Ngapang mani ke umu kovok kesua ngong lana ngong ke umu kovok? Aurou. Ida Tapolngon ile ngong lana ngong ke umu.

¹² Deka lou elio ka ngapang mani ke umu kovok dong. Kesua ngawaiki ngadangdang osep leklou urok pelengon. Tiyakyak e tiwai langka tidue bokongon eriar langka ngadue deka tiwaiki tikakai angainsak ine. E ngawaiki nga-dangdang urok pelengon tonari deka ngapang mani ke umu kovok.

¹³ Osep tonari isak osep aposel lokono kovok. Aurou. Isak osep aposel yakngan ina e tiyak osep ke urok bokongon. E tibisi urok elio ma osep aitno lisak mter isak Krais ila osep aposel lokono.

¹⁴ E ngawai pelengon tonari e itedigrik ine kovok kesua Satan iye tona bisi ila elio e polou bitna langka iye Ida Tapolngon ila ensel gesa ka bublo.

¹⁵ E Satan ila osep bokongon ina ka isak osep aposel yakngan ina tonari tibisi urok elio langka osep ka tidue elio itau. Deka itedigrik ine kovok. Mase Ida Tapolngon ma koli batne ke urok elio soulu ka tidue.

Pol due ila bokongon e osep tidue agegeng ke iye

¹⁶ Ngawai kodong e ma ngawai ke umu blang langane. Ngawaiki osep aitno lisak mter ngong kaka kovok e dau langka langane nga-waiki umoklingen lou pelengon langka umoklingen gute ka kaka ila pelengon. Umosongon ngong ma ngawai ke lou elio e ngakakai angain ngong ine.

¹⁷ E alo ka ngawai e ngakakai angain ngong ngadidi aitno lungong e ngawai langka gute ka kaka. E ngadidi Ida Puda aitno ine kovok.

¹⁸ Osep pula tididi elio ka taklak ina e tikakai angainsak deka ngong blang ma ngakakai angain ngong.

¹⁹ Umu tona aitno lumu mter lumu ilengen ombatno e umosongon osep ka isak kaka tiwai ke umu.

²⁰ E ngaile osep leklou tiwaiki tipagei umu e tiplau umu koke tiwaiki tipi lumu wan bitna bitna deka umosongon isak ma tidue langane. Koke tiwaiki tiyak umu ma umedidi isak koke aitno lisak langka isak itau e timole umu koke tiwaiki tiuri limsak ke banga lumu deka umosongon isak tidue langane.

²¹ Osep tonari tidue elio langane ke umu e imakaranga imodue langane blang kovok. Deka lange? Ma ngong mnak ngong ine? E dau langka gute gesa wai dagar ke ila elio e kakai angaine ine ma ngong blang ngawai dagar ke lou elio. Ngawai langka ngong gute ka kaka.

²² Tiwai pelengon Hibru i? Ngong blang ngawai pelengon Hibru. Isak osep Israel ina i? Ngong blang gute Israel ina. Isak Abraham ila napakngan i? Ngong blang Abraham ila napakngan gesa.

²³ Tiwai langka isak Krais ila osep bokongon ina i? Ma ngawai langka gute ka kaka. Ngong Krais ila gute bokongon ina e ngamole isak. Ngaboko engil lokono e aling pula osep tidue ngong ngasep ke kalabus e aling pula osep timluk ngong omba e aling pula isuk boto ngamete.

²⁴ Osep Yuda ina tiules ngong aling elme e aling kene kene tonari tiules ngong aling 39.

²⁵ Aling elku osep timluk ngong ke wan langka alika e aling kene osep tiuri opmu ke ngong ma ngamete ine e aling eklu ngadue langan ke sip e sip dardar e aling kene ngaples ke misuon oklou epmes kene.

²⁶ Aling pula ngalila ngala ke omur mawa e lou langan pula kakluk metengen. Langan tonari kakluk metengen ke aki e ke osep panakongon ina e ke osep ka lou osua e ke osep ka isak osep Yuda ina kovok. E lou langan kakluk metengen ke armok e ke omur ka dong adai vala e ke misuon e ke osep Kristen yakngan ina.

²⁷ Ngadue bokongon ka engil lokono e aling pula ngaboko e ngamunu kudung kovok. E aling pula sapanga due ngong e aki vel ngong kesua ngau ngangon sasi boto vala e tarna lungong blesim kesua lou klos karanga ke ngong kovok.

²⁸ Wan tonari polou ke ngong aling pula. E silang blang langane. Oklou aling aling aitno lungong mter pula ke sios ka pula keniye e aitno lungong kro ke isak.

²⁹ Langka gute gesa aitno ila dagar yagos aitno lungong kro ine. E langka gute kene due gute silang iye due elio epmes ina aitno lungong engil ke gute tonari ka due gute gene.

³⁰ Ngakakai angain ngong ke wan pula kovok. Aurou. E langka ngakakai angain ngong io ma ngakakaie kesua lou arit dong kovok.

³¹ Ngawai lokono e Ida Tapolngon ile ngawai pelengon yakngan kovok. Ma itakakai Ida Tapolngon ka Ida Puda Yesus Timla angaine tito la egim dong vala dong.

³² Oglou alo ka ngadong ke armok Damaskus gute Aretas vri mgo ke omur ka Damaskus dong ine. E gute ka plau armok tonari due osep ola ina tiplau armok ina ari ina ekreng bitna. Iye due langane kesua iye waiki due ngong ngasep ke kalabus.

³³ E osep Kristen leklou tilua ngong e tidue ngong ngasep ke kerka omba e tidue kerka klou windo ke ari e duru ke taklak ke ari dogur. Deka ngakos ke osep tonari inarak mangai e ngala.