2 Korin 10 - Aria New Testament

Pol wai iye due Ida Tapolngon ila bokongon itau

¹ Osep leklou tiwai ke umu langane. “Alo ka Pol dong kap umu langka iye pes iye vala e alo ka iye dong mawa iye wai dagar.” Deka ngawai ke umu ma aitno lumu mter ke Krais ila elio e umoklingen lou pelengon. Krais ila elio langane. Ila elio molil molil e iye due mada ke osep.

² E ngawai ke umu ma umaplau umu itau lama alo ka ngapolou ke umu ngawai dagar lokono ke umu. Eriar langka ngawai dagar lokono ke osep ka aitno lisak mter imedidi elio isuk isuk ka taklak ane ina.

³ Lokono. Imodong ke taklak ane e dau imodue evlei langka osep taklak ina tidue kovok.

⁴ E imodue evlei ke ola e osua langka tidue kovok. Aurou. Imodue evlei ke Ida Tapolngon ila arit ka ombatno deka imakaranga imapaiavu ipem oul ka urok arit omba.

⁵ Imomole pelengon bitna bitna ka para pulu ke Ida Tapolngon ila pelengon e pelengon ka waiki pagolgol osep aitno lisak ma tile Ida Tapolngon kovok. Limem pelengon mole osep ka aitno lisak mter pelengon ka para pulu ke Ida Tapolngon ila pelengon deka ma tini Krais.

⁶ E imapara ke alo ka umeini limem pelengon keniye. E langka umeini limem pelengon keniye deka ma imoules osep ka tiklingen limem pelengon kovok.

⁷ Umawade elio bitna bitna ka umavati. Langka gute gesa aitno mter iye Krais ila gute ma aitno mter langane blang. Imi Krais ila osep eriar langka iye Krais ila gute.

⁸ Ida Puda kar arit ke imi ma imodue ila bokongon. Imoboko e imolua umu ma imodue aitno lumu ila dagar dong dagar. Iye waiki limem bokongon due pogle ke aitno lumu ila dagar kovok. Deka aitno lungong neser e imakakai angainmi ke limem bokongon tonari e ngong mnak ngong ine kovok.

⁹ E ngawaiki aitno lumu digrik ke pas ka oglou ngapagei uti ke umu kovok. Aurou.

¹⁰ Osep leklou tiwai langane. “Pol sogo pelengon ka dagar ke ila pas keniye e alo ka iye polou ke amtada itavati iye langka ila arit kovok e elio ka iye wai ke osep are wan adai vala.”

¹¹ E ngawaiki osep ka tiwai pelengon tonari tile omur langane. Pelengon ka imosogoe ke pas alo ka imodong mawa ke umu eriar langka elio ka imodue alo ka imodong kap umu.

¹² Imawai imi eriar langka osep leklou ka tikakai isak tona angainsak kovok. E imawai limem elio eriar langka urok elio kovok. Aurou. Aitno lisak mter ke isak tona urok elio e isak kensak kensak tiwade isak ine. E gute kene wade ila elio kap gute silang ila elio. Osep ka tidue langane tile omur kovok.

¹³ E imawai ke bokongon ka osep leklou tidue kovok. Aurou. Imawai ke bokongon ka Ida Tapolngon kare ke imi vala e imakakai angainmi ine. E bokongon tonari lua umu blang.

¹⁴ Ida Tapolngon rere omur ka iye waiki imoboko ine e umodong ke omur tonari. E imi osep ka imopolou mgo ke umu e imanapapra Krais ila omon itau ke umu.

¹⁵ E imawai ke bokongon ka osep leklou tidue ke omur silang kovok e imakakai angainmi ine kovok. Aurou. Imawaiki aitno lumu ila dagar res polou omba ma imakaranga imoboko dagar lokono airavu ke umu. E imoboko ke omur ka Ida Tapolngon rere ke imi e imoboko ke omur silang kovok.

¹⁶ Imoboko ke umu deka mase imawaiki imanapapra omon itau ke omur oku ka osep ke omur tonari tiklingen omon itau dau kovok. Lama imoboko e imakakai angainmi ke bokongon ka osep leklou tidue.

¹⁷ E Ida Tapolngon ila pele-ngon langane. “Langka gute waiki ketir e kakai angaine ma iye ketir ke wan ka Ida Puda due e kakai angaine ine vala.”

¹⁸ Deka langane. Langka gute kakai iye tona angaine ke ila bokongon ane wan adai vala. E langka Ida Puda kakai gute angaine ke ila bokongon ane wan omba.