1 Timoti 6 - Aria New Testament

Osep ka isak wokboi nating

¹ Osep Kristen ka isak wokboi nating ma tidue anit ke inarak plaungan lama urok elio due Ida Tapolngon angaine duru e osep tiwai soulu ke aitno lite ila dagar.

² Langka osep ka tiplau osep ka isak wokboi nating isak osep Kristen deka ma osep bokongon ina tidue markan ke isak kovok. Ma tituk urok pelengon kovok. E ma aitno lisak mter langane. Gute ka ngaboko ke iye io iye Kristen blang deka ma aitno lungong itau lokono ke iye. Ma amnapapra pelengon ane ke osep e amparere isak ine.

Osep ka tiyakyak

^3-4 Ida Puda ila pelengon parere ite ke Ida Tapolngon ila elio. Langka gute gesa songon pelengon ane e parere osep ke pelengon silang blang ka eriar langka Ida Puda Yesus Krais ila pelengon kovok deka emile langane. Gute tonari aitno itau ke iye tona e tala klingen kovok. E iye ile omur gesa kovok. Aitno soulu e iye waiki tuk pelengon e mole osep leklou urok pelengon. Elio langane ma due osep aitno lisak rim e aitno lisak soulu ke osep leklou. E tiblou osep leklou dogursak e aitno lisak mter osep leklou tidue elio soulu.

⁵ E ma tituk orsak pulu e aitno lisak soulu ke osep leklou. Osep ka aitno lisak langane aitno lisak kaka lokono e tile pelengon lokono kovok. Aitno lisak langka Ida Tapolngon ila elio e ila pelengon ekreng ka tididie e ma urok brokngon polou.

⁶ E iteile langane. Langka itedidi Ida Tapolngon ila elio e ila pelengon e aitno lite itau ke wan ka iye kare ke ite deka itodong itau lokono. Itodong langane langka aitno lite itau ke wan ka Ida Tapolngon kare ke ite.

⁷ Iteile alo ka titnada tidivir ite e itopolou ke taklak ane itakalke wan gesa me kap ite kovok. E alo ka itemete ma itakaranga itakalke wan gesa la kap ite kovok.

⁸ Deka langka ida ngangon e udo klos dong ma aitno lite itau ine e itawai langane. Ane karanga ke ngong.

⁹ E langka osep tiwaiki tidue mani pula vala deka tokngon ma polou ke isak e ma kis isak dagar langka omdu kis ongwa dagar. Deka langka aitno lisak la ke wan bitna bitna are ma due isak manga manga lokono. E elio ane ma due pogle ke isak e tidong sasi lokono.

¹⁰ Elio ka aitno lite la lokono ke mani ane elio soulu bitna bitna batne. Osep leklou aitno lisak la ke mani e elio langane ma nak isak e tisongon aitno lisak ila dagar deka agegeng ma due isak e tinamani ine.

Pol wai dagar ke Timoti

¹¹ Deka Timoti wom ka Ida Tapolngon ila gute ompul dogur ke elio soulu bitna bitna e ma omulou ine vala. E omboko engil ma omdue elio itau e omdue Ida Tapolngon ila bokongon e aitno lugom dagar lokono ke Krais. E wom lana wom itau lokono ke osep leklou e omdong dagar ke elio bitna bitna ka opru wom e omdue mada ke osep pula.

¹² Gute ka aitno dagar ke Krais iye langka gute ka due resis. Deka omsuong engil ma ommole resis e omdue lem mosongon ka dong vala dong. Omdue mosongon tonari kodong alo ka emvri e ampalongo ke osep pula amtarsak langane. “Aitno lungong dagar ke Krais.”

¹³ Ida Tapolngon due wan ka pula keniye. E Krais Yesus vri dagar e wai malak ke Pontius Pailat bitna. Deka ke amtarsak ngawai dagar lugom langane.

¹⁴ Emini Ida Tapolngon ila pelengon dagar ka omdue. Deka emdidi pelengon tonari osuk lokono. Lama osep tiwai soulu ke lem elio. Ma emdidie itau lokono la lama iding ke alo ka Ida Puda Yesus Krais iding e polou malak lokono.

¹⁵ Iye ma polou alo ka Ida Tapolngon rere. Kesua ila elio keniye itau me e iye kene vala plau wan ka pula keniye. Iye mole osep ka pula keniye ka tivri mgo ke omur omur e iye Ida Puda ka plau wan ka pula keniye.

¹⁶ Iye kene vala dong oglou lila me e iye karanga mete kovok. Iye dong ke bublungon ka ombatno lokono e itakaranga itala olwo ke iye kovok. Ke oglou gute gesa vati iye kovok. E eknikane blang gute gesa karanga vati iye kovok. Deka aling aling ite ka pula keniye ma itakakai angaine e ma ila arit ka ombatno lokono dong. Lokono.

Osep ka urok mani pula

¹⁷ Ma amwai dagar ke osep ka urok mani pula ke taklak ane ma tikaranga tikakai angainsak kovok. Ma aitno lisak la ke wan ka paide okus langka mani kovok. E ma aitno lisak dagar lokono ke Ida Tapolngon. Kesua iye kar ite wan bitna bitna pula ka due aitno lite neser.

¹⁸ Amwai dagar ke isak ma tidue elio bitna bitna ka itau ka lua osep leklou. Aling aling ma tidue tovro ke osep ka urok wan isuk boto vala.

¹⁹ Langka tidue langane mase Ida Tapolngon ma kar isak wan ka lua isak e ma tidue urok mosongon ka mosongon itau lokono.

Pol wai yagos ke Timoti

²⁰ Timoti. Ma amplau boko-ngon ka Ida Tapolngon kare ke wom itau lokono. E ma ompul dogur ke osep ka tiwai pelengon bitna bitna ka didi Ida Tapolngon aitno kovok. E omdong mawa ke osep ka tiwai pelengon adai ka para pulu ke Ida Tapolngon ila pelengon. Aitno lisak langka urok ilengen omba e tile itau lokono. E dau tile lokono kovok.

²¹ Osep ka tididi ilengen langane tisongon aitno lisak ila dagar kodong. Deka ngawai langane. Ma Ida Tapolngon ila makaingan dong kap umu.