1 Timoti 5 - Aria New Testament

Elio ka itodue ke osep

¹ Langka gute namor due elio soulu amwai pelengon amnga ke iye kovok. Aurou. E ommosi iye ke pelengon molil molil vala e omdue anit ke iye langka iye ngap abo. E omdue elio itau ke osep arang ka isak dau auram langka omdue ke ngap saiver e ngap titovro.

² E omdue elio itau blang ke apmang ka namor langka omdue ke ngap aiya. E omdue elio itau blang ke apmang belbela langka omdue ke sulup. Aitno lugom mter ke elio silang blang kovok.

Apmang ka sasap batne

³ Langka apmang ka sasap batne tidong kensak vala deka omdue elio itau ke isak.

⁴ E langka apmang tonari titno koke subumno tidong ma tikere e tiplau tnarak e urok seia. Ke elio langane ma tikoli sipmarak e titnarak e urok seia blang urok luangan ka tidue ke isak ma lua isak. E Ida Tapolngon aitno itau ke elio langane.

⁵ Langka apmang ka sasap batne tidong kensak vala ma apmang tonari tidue elio langane. Ma aitno lisak dagar lokono ke Ida Tapolngon ma iye lua isak e kere isak itau. Deka ke oklou e ke epmes ma tiwai itau ke Ida Tapolngon e tipmi iye ma iye lua isak.

⁶ E langka apmang ka isak sasap batne mase tididi pampamu lisak vala deka apmang tonari tidong langka ansak vala timete kodong.

⁷ E ma amwai ke osep ma tididi pelengon ane. Ma tidue elio itau vala ma osep tikaranga tiwai soulu ke isak kovok.

⁸ Langka gute gesa plau tna e timla e ila osua blang kovok ane langka iye songon aitno ila dagar kodong. E osep ka tile ke Ida Tapolngon kovok urok elio mole ila elio. Kesua tidue elio langane kovok.

⁹ E omsogo apmang ka sasap batne angainsak munu ke buk gesa. Ma omsogo apmang ka langane vala angainsak. Apmang ka ina tobor mole langka iselme songotno kodong e iye dong langka oglou ila boget kene vala.

¹⁰ E isak langka apmang ka osep tile isak tidue elio itau vala. Ngawai ke elio itau langka tiplau titorok itau e tikar ngangon ke osep kaulei e tidong moli e tilua osep Kristen leklou. E tilua osep ka agegeng polou ke isak e tidue bokongon bitna bitna blang ka itau. Ma omsogo apmang ka langane angainsak.

¹¹ Ma omsogo apmang sasap batne ka dau belbela boto angainsak kovok. Kesua isak ma tidue Krais ila bokongon isuk boto deka alo ka aitno lisak itau ma tigi blang ma tipul dogur ke Krais.

¹² Deka ma Ida Tapolngon mulu isak kesua tiwai ma tidue ila bokongon deka tipul dogur ine.

¹³ E tidue elio silang langane. Tidue elio ka ropo e tilila ulik ulik vala ke ninu ninu. E elio silang blang ka soulu langane. Tiwai pelengon adis ke osep e tiwaiki tiklingen wan bitna bitna ka osep leklou urok wan. Deka tibasik ine ke osep leklou blang.

¹⁴ Deka aitno lungong mter langka apmang sasap batne ka isak dau belbela boto ma tigi blang deka ma tidivir titorok e tikere urok osua itau. Langka tidue langane ma osep epmes ina tikaranga tiwai soulu ke isak kovok.

¹⁵ E apmang sasap batne leklou tipul dogur ke Ida Tapolngon kodong e tididi Satan vala.

¹⁶ Langka apmang sasap batne tidong ke apmang gesa ka Kristen ila osua ma iye kere isak itau. E osep ka sios ina ma tikere apmang sasap batne tonari kovok. Kesua urok osua tidong tiplau isak. Deka osep ka sios ina ma tikaranga tikere apmang ka sasap batne lokono ka dong kene vala.

Osep ka tiplau Ida Tapolngon ila osep

¹⁷ Umu ma umakar osep plaungan ina inarak klingen ke bokongon itau ka tidue. Osep ka tidue wan langane. Osep ka tiplau sios itau e tinapapra osep ke Ida Tapolngon ila pelengon e tiparere isak ke lana ine.

¹⁸ Kesua Ida Tapolngon ila pelengon wai langane. “Umu ma umopono bulma-kau ene alo ka kamla pes wit tarna e kokloke la ko-vok. Ma iye karanga ngen gesa.” E Ida Tapolngon ila pelengon wai silang langane. “Gute bokongon ina iye ka-ranga due ina klingen ke ila bokongon.”

¹⁹ Langka gute kene vala sin elio vri ke gute plaungan ina deka amkaranga emklingen ila pelengon kovok. E langka osep orwo koke eklu tiwai tivati elio tonari deka ma amkaranga emklingen ke isak.

²⁰ E langka osep plaungan ina tidue elio epmes ina deka ma ommosi isak ke osep amtarsak. Omdue langane ma osep plaungan ina leklou tivati elio ane e tilim ma tidue elio soulu kovok.

²¹ Deka Timoti. Ke Ida Tapolngon bitna e ke Krais Yesus bitna e ke Ida Tapolngon ila ensel amtarsak ngawai dagar ke wom langane. Ma omboko dagar ke wan ka ngawai ke wom ine. Ke wan ka pula keniye ka omdue ma omdue elio eriar ke osep ka pula keniye.

²² E omsuong ma emrere gute ma iye due Ida Tapolngon ila bokongon kovok. Amwade ila elio isuk isuk paide lama iye due elio soulu ka munu pes wom blang. E ma amplau wom itau e omdong itau lokono lama omdue elio soulu.

²³ Silang blang langane. Aling pula dangon polou ke wom. Deka eminim aki vala kovok. Are itau ma eminim aki wain sasi boto ma lua pele lugom.

²⁴ Osep leklou tidue elio epmes ina ke osep amtarsak deka urok elio soulu la polou ke kot mgo. E osep leklou urok elio epmes ina ka tidue dong kukwop e mase ma polou malak.

²⁵ E langane blang ke elio itau. Osep leklou tidue elio itau e lokono osep tivati. E osep leklou urok elio itau polou malak paide kovok e mase ma elio itau tonari karanga dong kukwop kovok.