1 Timoti 4 - Aria New Testament

Osep leklou tipagolgol osep aitno lisak ke pelengon yakngan

¹ Ano Itau wai malak langane. Ke taim ka mase ma polou osep leklou ma tisongon aitno lisak ila dagar. Deka ma tiklingen ke ano ka yakngan ina e ma tididi angelo soulu urok pelengon.

² Osep yak-ngan ina tiwai pelengon tonari ke osep. E tile ke elio itau e elio soulu kovok e tinamani urok elio soulu kovok.

³ Osep ka langane tidangdang osep ma tigi kovok e tidangdang isak ma tingen ngangon leklou kovok. E Ida Tapolngon due ngangon tonari. E aitno lite la dagar ke iye e iteile ila pelengon lokono. Deka itawai tenkyu ke iye ine e itangene.

⁴ Iteile Ida Tapolngon due wan ka pula keniye. Wan ka iye due isak itau vala e itavati isak langka isak wan ka soulu e itepli isak kovok. Aurou. Ma itawai tenkyu ke Ida Tapolngon deka itangen.

⁵ Ida Tapolngon ila pelengon due ngangon ka pula keniye polou itau lokono. Deka ma itawai itau ke iye e itakakai angaine ine.

Timoti ma due ila bokongon itau

⁶ Timoti langka ampalongo pelengon ane ke sudo ma omdong langka Krais Yesus ila gute bokongon ina. Ma omdue arit ka ombatno ke Ida Tapolngon ila pelengon ka aitno lugom dagar ine e ke parerengen ka itau ka emklingen e emdidie.

⁷ Deka ma ompul dogur ke basikngen adai bitna bitna ka osep leklou tibasik ine ka didi Ida Tapolngon ila pelengon kovok. Ma amnana dagar ma emdidi Ida Tapolngon ila elio vala.

⁸ Emile langka itawaiki itodue pampamu lite ila arit polou dagar deka itanana aling aling. Elio langane ma lua ite sasi boto. E langka itanana ke Ida Tapolngon ila elio ane ma polou udo arit ka lua ite itau lokono. Ane ma lua ite ke udo mosongon ka oku ane ina e ke udo mosongon ka mase ma polou.

⁹ Pelengon ane lokono e ngawaiki osep ka pula keniye tiklingen ine e ma aitno lisak kis dagar ine.

¹⁰ Ida Tapolngon dong vala dong e iye waiki lua osep ka pula keniye e dau iye karanga lua osep ka aitno lisak dagar ke iye vala. Aitno lite dagar lokono ke iye e itapara ma iye due elio itau ke ite. Deka aling aling ma itoboko engil ke ila bokongon.

¹¹ Amkar pelengon ane ke Ida Tapolngon ila osep e amparere isak ine ma tididie.

¹² E Timoti. Ngap tobor pula kovok. Deka langka osep tiwaiki tiklingen ke wom kovok are itau kovok. E dau aitno lugom kro ine kovok. Omdue elio itau vala ma osep Kristen tivati lem elio e ma tikanae. Ma omdue elio itau ke lem pelengon e ke lem mosongon e ke elio ka wom lana wom ke osep leklou. E aitno lugom dong dagar ke Yesus e amdangdang pampamu lugom ke elio epmes ina bitna bitna.

¹³ Langka ngame paide kovok ma emritim Ida Tapolngon ila pelengon ke osep amtarsak e ma amnapapra ila pelengon ke isak e ma amparere isak ke ila pelengon batne.

¹⁴ Ida Tapolngon kar kerengen ke wom alo ka osep plaungan ina tidue limsak timunu ke epem. Deka ma omboko ulik ulik ke kerengen tonari kovok. Kesua alo are tinapapra ma omdue Ida Tapolngon ila bokongon.

¹⁵ Aling aling ma omboko engil ke lem bokongon tonari. Langka omboko engil ke lem bokongon ma ompolou itau e osep ka pula keniye tikaranga tivati lem elio polou itau lokono.

¹⁶ Ma amplau wom itau ke lem elio isuk isuk e ke lem bokongon ka amparere osep. Langka omdue langane Ida Tapolngon ma lua wom e iye ma lua osep ka tiklingen lem pelengon.