1 Timoti 2 - Aria New Testament

Elio ka itodue alo ka itoduni pulu

¹ E ngawai ke wan ka omdue mgo langane. Amwai ke osep ma itawai itau ke Ida Tapolngon e itepmi iye ma iye lua osep ka pula keniye. E itawai tenkyu ke wan ka pula keniye ka iye kare ke ite.

² E itepmi iye blang ke osep ka tivri mgo ke omur omur e ke osep gavman ina blang. E ite ka pula keniye ma itodong itau e aitno lite dong epen pulu. Ma itodue anit ke Ida Tapolngon e itedidi elio itau ka Ida Tapolngon aitno itau ine.

³ Pmingen ka langane itau lokono ke Ida Tapolngon ka iye Ida Luangan blang bitna e aitno itau ine.

⁴ E iye waiki lua osep ka pula keniye ma urok elio epmes ina noklok la e ma tile itau ke pelengon ka lokono.

⁵ Iteile Ida Tapolngon kene vala dong. E gute kene vala vri airavu ke ite e Ida Tapolngon e loulou ke ite. Gute tonari Krais Yesus.

⁶ Alo ka Ida Tapolngon rere io Krais soro pampamu ine ma iye lua ite ma itodong itau ke Ida Tapolngon bitna. E ke elio tonari Ida Tapolngon nis ite langka iye waiki lua osep ka pula keniye.

⁷ Ke batne langane Ida Tapolngon rere ngong ma ngapolou ila aposel gesa. E ngaboko ma nganapapra ila omon itau ke osep ka isak osep Yuda ina kovok e ngaparere isak ine. Ma aitno lisak la dagar ke Krais e ma tile ke ila pelengon ka lokono. Ngawai lokono e ngayakyak kovok.

⁸ Deka ngawaiki ma Ida Tapolngon ila osep ka tidong ke armok ka pula keniye ma tikar aitno lisak ke Ida Tapolngon lokono. E tidong itau lokono e ma tiwai itau ke Ida Tapolngon. E ngawaiki tisongon elio ka aitno lisak nevlik e amnga ke osep.

⁹ Pelengon silang blang lang-ane. Ngawaiki ma apmang titnei klos ka itau ka karanga ke isak vala. E ma tipol aparsak e tibares ke baresngen bitna bitna kovok. E titnei klos ka ina klingen omba kovok e tibares ke opmu gol kovok. Ngawaiki aitno lisak la ke urok klos e urok baresngen aling pula kovok.

¹⁰ E ma apmang tidue elio bitna bitna ka itau langka apmang ka aitno lisak dagar ke Ida Tapolngon tidue. Elio ane langka urok baresngen ka itau.

¹¹ Alo ka itoduni pulu apmang ma tidong moli e tiwai kovok e ma tiklingen Ida Tapolngon ila pelengon.

¹² E ngadangdang apmang ma tiplau osep arang e tiparere isak ke Ida Tapolngon ila pelengon. Apmang ma tiwai kovok e ma tiklingen pelengon vala.

¹³ Kesua oglou oglou ari Ida Tapolngon due Adam mgo e mase iye due Eva.

¹⁴ E Satan yak Adam e iye due elio epmes ina kovok. Aurou. Iye yak Eva deka iye due elio epmes ina.

¹⁵ E langane. Langka apmang aitno lisak dagar ke Krais aling aling e tikar aitno lisak ke iye ma tidong itau. E tididi elio itau langka isak lana isak ke osep leklou e tiplau isak itau. Deka ma Ida Tapolngon lua isak alo ka tidivir mimi.