1 Tesalonaika 3 - Aria New Testament

Pol pagei Timoti la ke armok Tesalonaika

¹ Aitno limi kro lokono ke umu e aitno limi langka imakaranga imodong imapara kovok. Deka imalalo limem pelengon langka ngong imorwo Sailas imodong ke armok Atens.

² E imapagei Timoti la ke umu. Timoti iye limen aten e boko kap imi ke Ida Tapolngon ila bokongon ka imanapapra omon itau ka la ke Krais ke osep. Imapagei iye uti lumu ma iye due umu umevri dagar e aitno lumu ila dagar dong dagar.

³ Lama elio ka osep tidue agegeng ke umu due aitno lumu kro ine. Umeile Ida Tapolngon rere ite ma itanamani elio soulu langane.

⁴ Alo ka imi dau imodong kap umu imawai ke umu langane. Ma osep tidue agegeng bitna bitna ke ite. E umeile elio langane polou kodong.

⁵ Ke batne langane ngakaranga ngapara kovok. E ngapagei Timoti la ke umu ma ngaile omur langka aitno lumu ila dagar dau dong dagar koke aurou. Lama Satan polou ke umu e tok umu kodong e umosongon aitno lumu ila dagar e limem bokongon ke umu polou adai.

Timoti wai osep Tesalonaika ina urok mosongon itau

⁶ Io Timoti vati umu kodong deka songon umu e bauluk ke imi. E iye wai ke lumu elio. Iye wai aitno lumu dong dagar e umu lana umu ke osep. Iye wai aling aling omtomu sisir ke imi e aitno lumu itau ke imi. E umawaiki umavati imi eriar langka imi blang imawaiki imavati umu. Deka omon tonari due aitno limi itau.

⁷ Sipmi. Imeklingen aitno lumu ila dagar dau dong dagar. E elio langane due aitno limi dong itau lokono ke elio soulu bitna bitna ka opru imi.

⁸ Deka eknikane imeile umodong dagar ke Ida Puda e aitno limi itau e limem mosongon polou itau lokono.

⁹ Imawai tenkyu ke Ida Tapolngon kesua iye due aitno limi neser omba batne ke umu. Umodong dagar deka imakakai Ida Tapolngon angaine tito la egim ine.

¹⁰ Aling aling ke oklou e epmes imepmi Ida Tapolngon ma imakaranga imavati umu blang. Imawaiki imavati umu ma imakaranga imapalongo lumu ke pelengon bitna bitna ka dau umeile omur ine kovok.

¹¹ Imawaiki Ida Tapolngon ka Pmada kap Ida Puda Yesus tinis imi ke ekreng ma imakaranga imopolou ke umu.

¹² Imawaiki Ida Puda due umu ma umu lana umu pulu e umu lana umu ke osep ka pula keniye. Ma umu lana umu ke osep eriar langka imi lana imi ke umu.

¹³ E ke elio langane Ida Tapolngon ma due aitno lumu dong dagar lokono. Deka alo ka Ida Puda Yesus bauluk me kap ila osep ma iye vati umu umodong itau lokono. Ma umodong itau lokono e lumu elio soulu gesa vri ke umu ke Ida Tapolngon ka Pmada bitna kovok.