1 Tesalonaika 1 - Aria New Testament

¹ Ngong Pol ngagosok Sailas e Timoti imosogo pas ane uti la ke umu ka umodong ke sios ke armok Tesalonaika. Umu ka pula keniye umodong ke Ida Tapolngon ka Pmada e Ida Puda Yesus Krais urok osua. Ma Ida Tapolngon ila makaingan dong kap umu e due aitno lumu tidong epen.

Osep Tesalonaika ina aitno lisak dagar ke Yesus

² Aling aling imawai tenkyu ke Ida Tapolngon ke umu ka pula keniye e ke lumu elio e silang blang imepmi iye ke umu alo ka imawai itau ke iye.

³ Aitno limi langane. Imawai itau ke Ida Tapolngon ka Pmada kesua aitno lumu ila dagar sruk aitno lumu deka umodue elio itau. E umu lana umu ke osep ka pula keniye deka umoboko dagar ma umolua osep. E umapara ke Ida Puda Yesus Krais ma iye iding me.

⁴ Sipmi. Imeile Ida Tapolngon lana iye ke umu deka iye rere umu ila osep.

⁵ Omon itau ka imanapapra ine ke umu polou ke umu langka pelengon adai vala kovok. Aurou. Ano Itau sruk aitno limi deka imanapapra ke ila arit. E aitno limi dagar langka omon tonari iye pelengon lokono. E umeile elio ka imodue ka lua umu alo ka imodong kap umu.

⁶ Umodue Ida Tapolngon ila omon itau deka osep tidue elio soulu bitna bitna ke umu. E dau umakana limem elio e Ida Puda ila elio e Ano Itau sruk aitno lumu ma aitno lumu neser ine.

⁷ E umenis elio itau ke osep ka pula keniye ka aitno lisak dagar ke Krais ke provins Masedonia e provins Akaia ma tikana lumu elio.

⁸ Ida Puda ila pelengon ka umawai ine la ke osep pula e tiklingen ine. Pelengon tonari la ke provins Masedonia e provins Akaia vala kovok. Aurou. Osep pula tiklingen basikngen ka aitno lumu la dagar ke Ida Tapolngon. E imawai ke isak ine kovok kesua tiklingen ke umu kodong.

⁹ Isak tona tiwai ke elio itau ka umodue ke imi alo ka imeme ke umu. Tipalongo urok ke elio ka umopul dogur ke tapolngon yakngan ina e aitno lumu la dagar ke Ida Tapolngon ma umodue ila bokongon. Iye Ida Tapolngon ka lokono e iye dong vala dong.

¹⁰ E tipalongo urok ke elio ka umapara ke alo ka Ida Tapolngon Otno Arang Yesus ma iding me ke omur heven. Otno Arang tonari mete deka Ida Tapolngon didi ila arit e due poga tito e dong blang e iye mole udo elio epmes ina e lua ite ma itanamani Ida Tapolngon aitno ila engil ka mase ma me kovok.