1 Pita 5 - Aria New Testament

Osep plaungan ina tiplau Ida Tapolngon ila osep itau

¹ Ngawai ke umu ka sios ina plaungan. Ngong blang gute plaungan ina e ngavati osep tidue agegeng ke Krais. E mase alo ka Krais me ma ngadong kap iye ke ila bublongon. Deka ngawai ke umu dagar langane.

² Umaplau Ida Tapolngon ila osep ka iye kar isak ke umu itau langka sipsip inarak plaungan tiplau urok sipsip itau. Aitno lumu itau ke lumu bokongon kesua umawaiki umodue bokongon tonari vala e batne osep tipagei umu ine kovok. E silang blang umodue bokongon tonari batne umawaiki umodue mani ine kovok. Aurou. Umodue kesua umawaiki umedidi Ida Tapolngon aitno e umodue ila bokongon vala.

³ Umodue elio ka opru osep ka Ida Tapolngon kar isak ke umu ma umaplau isak kovok. E umodue elio itau ma tivati umu e tiwaiki tikana lumu elio itau.

⁴ Umu osep plaungan ina umodue langane e alo ka Udo Plaungan Ka Mgongon Ina polou iye ma kar umu lumu prais ka karanga polou yagos kovok.

Itosongon Ida Tapolngon plau ite itau

⁵ Umu auram aitno umeini osep ngongle urok pelengon. Umu ka pula keniye umepes umu kenmu kenmu langka umeini umu pulu. Ida Tapolngon ila pelengon wai langane. “Ida Tapolngon aitno itau ke osep ka tikakai isak tona angainsak kovok e iye makai osep ka tipes angainsak.”

⁶ Umepes umu tona e umeini Ida Tapolngon ka ila arit ombatno lokono. Umodue langane deka mase alo ka iye rere ma iye kakai angainmu.

⁷ Ida Tapolngon aitno mter ke umu deka langka elio opru umu deka umawai ke iye ma iye lua umu ine vala.

⁸ Umeile umu itau e umaplau umu itau kesua upu oul Satan lila tamtam langka laion ka wai omba e krim Ida Tapolngon ila osep ma iye due pogle ke isak.

⁹ Umevri dagar ke aitno lumu ila dagar e umopul Satan ila tokngon. Kesua umeile omur supmu ke omur ka pula keniye tinamani agegeng eriar langka umanamani agegeng.

¹⁰ Ida Tapolngon iye makaingan batne e iye gi umu ke Krais angaine ma umodong kap iye ke ila bublongon ka dong vala dong. Lama oku ane umanamani agegeng mase ma agegeng yagos e Ida Tapolngon ma due umu umodong itau blang. E iye due aitno lumu ila dagar dong dagar lokono e due umu ma umevri dagar.

¹¹ Ida Tapolngon ila arit dong vala dong e ina yagosngon kovok. Lokono.

Pol babrun ila pelengon

¹² Ngaile gute Sailas aitno ila dagar dong dagar e iye lua ngong ke pas ane. Ngasogo pas ane kesua ngawaiki ngawai ke umu ke Ida Tapolngon ila makaingan. Ngaile makaingan ane Ida Tapolngon ila makaingan ka lokono deka ngawai malak ine. Ngawaiki ngasruk aitno lumu ma umodong dagar ine.

¹³ Osep ke Ida Tapolngon ila sios ka dong ke armok Babilon tiwai “oklou itau” ke umu. Ida Tapolngon rere isak ila osep eriar langka iye rere umu ila osep. E silang blang gute Mak ka langka erigu wai “oklou itau” ke umu blang.

¹⁴ Umu ka Ida Tapolngon ila osep umawai “oklou itau” pulu e umesekan pulu. Ngawaiki umu ka pula keniye ka Krais ila osep aitno lumu dong epen.