1 Pita 4 - Aria New Testament

Aitno lite la ke elio oglou ina kovok

¹ Oglou Krais polou langka itosep e namani elio soulu ka osep tidue ke iye. Deka ngawaiki umu arit umu e aitno lumu mter langane blang kesua alo ka umanamani agegeng ke osep umawaiki umodue elio epmes ina kovok.

² E oku ane la lama iding ke alo ka lumu maglakngan yagos umedidi elio bitna bitna ka pampamu lumu waiki umodue kovok. Aurou. Umedidi Ida Tapolngon aitno vala.

³ Ke oglou kodong umodue elio epmes ina bitna bitna ka osep epmes ina tidue. Ari umodue elio epmes ina e elio ulik ulik ka pampamu lumu waiki umodue. Umeinim aki dagar ma omtomu balilu e umodue rogo ka umodue elio okwa ine. E umodue rogo omba ka umeinim aki dagar e umodue elio soulu ine. E aitno lumu la ke sapingen bitna bitna ka Ida Tapolngon aitno soulu lokono ke isak.

⁴ E oku ane umodue elio soulu bitna bitna tonari kovok. E osep epmes ina tidigrik kesua umodue elio epmes ina kap isak kovok. Deka tiwai soulu ke umu ine.

⁵ Mase ma Ida Tapolngon wade osep tonari ke elio soulu ka tidue. Ma iye wade osep ka timete kodong e osep ka dau tidong.

⁶ Ke batne ane osep ka timete kodong tiklingen Ida Tapolngon ila omon itau alo ka dau tidong. E lama timete kodong langka osep taklak ina timete oku ane tidong ansak langka Ida Tapolngon dong ano.

Ma itoboko ke kerengen ka Ida Tapolngon kare ke ite

⁷ Oku ane isuk boto wan ka pula keniye yagos. E ke batne langane ngawaiki aitno lumu mter itau e umaplau umu itau. Umodue langane ma umakaranga umawai itau ke Ida Tapolngon.

⁸ Wan ka omba umu lana umu pulu lokono. Kesua langka umu lana umu pulu e supmu leklou tidue elio soulu ke umu ma aitno lumu mter ine kovok.

⁹ Langka supmu leklou time ke lumu ninu deka umekere isak itau. E umongurngur ine kovok.

¹⁰ Umedidi kerengen ka Ida Tapolngon kare ke umu kenmu kenmu deka umolua osep leklou ine. Umu Ida Tapolngon ila osep bokongon ina deka umolua umu pulu ke kerengen ka iye kare ke umu.

¹¹ Langka gute due kerengen ma iye napapra ke osep deka iye napapra Ida Tapolngon ila pelengon vala. E langka gute due kerengen ma iye lua osep leklou ke bokongon bitna bitna deka ma iye didi Ida Tapolngon ila arit ine. Umodue langane ma wan ka pula keniye ka umodue kakai Ida Tapolngon angaine tito la egim batne Yesus Krais dong. Krais angaine omba lokono e ila arit dong vala dong. Lokono.

Osep tidue elio soulu ke ite eriar langka tidue ke Krais

¹² Sipmi. Ngong lana ngong ke umu deka ngawai ke umu langane. Umedigrik omba ke agegeng ka polou ke umu ma tok umu sakam. Agegeng langane polou ke umu vala kovok. Aurou. Agegeng polou ke osep Kristen pula leklou blang.

¹³ E aitno lumu neser alo ka umanamani agegeng eriar langka Krais namani agegeng. Ma alo ka Krais ila elio ka itau itau lokono polou malak ke osep amtarsak umu blang aitno lumu neser e aitno lumu itau kap iye.

¹⁴ Langka osep tiwai soulu ke umu batne umu Krais ila osep aitno lumu itau itau ine. Kesua elio ane nis ite Ida Tapolngon Ano Itau ka itau lokono dong kap umu.

¹⁵ Umaplau umu itau lama osep tidue agegeng ke umu batne umodue elio soulu. Elio soulu tonari langka umodue burwa ke osep koke umapanako osep urok wan koke umodue elio soulu leklou koke umawaiki umavati e umeile omur ke wan bitna bitna ka osep leklou urok wan vala.

¹⁶ Langka osep tidue agegeng ke umu batne umu osep Kristen umu mnak umu ine kovok. E umakakai Ida Tapolngon angaine tito la egim ke elio ka umu osep Kristen.

¹⁷ Taim ka Ida Tapolngon wade osep urok elio isuk isuk polou kodong. E mgo iye wade ila osep urok elio isuk isuk. Deka mase ma iye wade osep ka aitno lisak dagar ke omon itau kovok. Deka lange? Langka iye wade ila osep paide deka wansua ma polou ke osep ka aitno lisak dagar ke iye kovok?

¹⁸ Kesua Ida Tapolngon ila pelengon wai langane. “Langka osep ka tidue elio isuk isuk ka itau opru isak ke elio ka Ida Tapolngon lua isak ke urok elio epmes ina deka lange ke osep ka tipul dogur ke Ida Tapolngon e osep ka tidue elio epmes ina?”

¹⁹ Deka langane. Langka Ida Tapolngon didi aitno e songon agegeng polou ke ite ma aitno lite dong dagar ke iye e itodue elio itau. Kesua iteile omur Ida Tapolngon ma kere ite itau e didi ila pelengon keniye.