1 Pita 3 - Aria New Testament

Pelengon ane la ke osep pasinga

¹ E umu apmang umeini lumu soboget urok pelengon. E ngaile isak leklou aitno lisak dagar ke Ida Tapolngon ila pelengon kovok. E dau umeini isak ma tivati lumu elio itau e lumu elio itau mter aitno lisak ma aitno lisak la dagar ke Ida Tapolngon.

² Ma tivati elio ka umeini isak e umodue anit ke isak.

³ Ngawaiki umu apmang aitno lumu mter ke elio ka umabares tarna lumu vala kovok. Elio langka umepilai opomu elilo koke umabares umu ke gol koke umetnei klos ka inarak klingen omba.

⁴ E ngawaiki umodue elio langka umabares aitno lumu vala. Umodong molil molil e aitno lumu epen vala. Umodue elio langane deka Ida Tapolngon vati umu langka umabares ke baresngen ka itau ka dong vala dong.

⁵ Oglou apmang ka aitno lisak dagar ma Ida Tapolngon didi ila promis tibares isak langane. Tini urok soboget.

⁶ Langka Sara ini ila boget Abraham e sir iye ina puda. E oku ane langka umu apmang umodue elio itau e umelim ke wan gesa kovok deka umu Sara napakngan.

Aling aling itodue elio itau ke osep

⁷ E umu arang aitno lumu mter itau ke lumu sasap. Umodong kap isak e aitno lumu mter urok arit eriar langka lumu arit kovok. Deka umodue anit ke isak kesua Ida Tapolngon kar umorwo mosongon ka itau. Umodue langane deka alo ka umawai itau ke Ida Tapolngon ma iye klingen lumu pelengon.

⁸ Ngababrum lou pelengon langane. Ngawaiki aitno lumu kene pulu e aitno lumu itau ke osep leklou e umu lana umu ke supmu leklou. E umodue mada ke osep leklou e umepes umu tona.

⁹ Alo ka osep tidue elio soulu ke umu deka umokoli urok elio soulu kovok. E alo ka osep tiwaiki tiluk umu umokoli e umeiluk isak blang kovok. Umawai itau ke Ida Tapolngon ma iye kere isak vala. Kesua alo ka Ida Tapolngon rere umu ila osep iye wai ma iye kar umu ila kerengen.

¹⁰ Ida Tapolngon ila pelengon wai langane. “Gute ka waiki dong itau e waiki elio itau polou ke iye ma iye wai soulu kovok e yakyak kovok.

¹¹ Ma iye pul dogur ke elio soulu e due elio itau vala. Iye arit iye e boko engil ma aitno epen kap osep leklou.

¹² Kesua Ida Puda vati e plau osep ka tidue elio isuk isuk ka itau e iye klingen isak alo ka tiwai itau ke iye. E iye pul dogur ke osep ka tidue elio soulu.”

¹³ Langka umu arit umu e umoboko engil ma umodue elio isuk isuk ka itau ke osep amtarsak gute sei ma due elio soulu ke umu ine?

¹⁴ E langka umodue elio itau vala e osep dau tidue elio soulu ke umu ine Ida Tapolngon ma kere umu itau. Umelim ke isak kovok e aitno lumu kro ine kovok.

¹⁵ Ma aitno lumu mter itau ke Krais e umodue elio molil molil e umodue anit ke iye kesua iye vala Upu Puda. Aling aling umekere umu ma umakaranga umokoli pelengon ke osep ka tipmi umu ke batne ke aitno lumu ila dagar e ke elio itau ka umapara ine.

¹⁶ E ngawaiki umodue elio itau vala ma elio gesa pes umu kovok. Deka langka osep tisin elio soulu vri ke umu e tiwai soulu ke lumu elio itau ka umodue batne ke Krais ma isak mnak isak ke urok pelengon.

¹⁷ Langka Ida Tapolngon waiki umanamani agegeng lama umodue elio itau are wan gesa kovok. E elio langane mole elio ka umanamani agegeng langka umodue elio soulu.

Krais mete e poga tito ma iye lua ite

¹⁸ Aitno lumu mter ke Krais. Oglou iye mete aling kene batne ke udo elio epmes ina. Ite osep epmes ina e iye dong itau lokono. E iye mete ma iye paur ite ke Ida Tapolngon. Osep timluk Krais pampamu ine e iye mete deka Ida Tapolngon due poga tito ke ina denga e iye dong ano ke omur heven.

¹⁹ Iye ano e iye la napapra ke osep ka ansak tidong ke omur ka kalabus.

²⁰ Ansak tonari isak ansak ke osep ka tipul dogur ke Ida Tapolngon ila pelengon alo ka Noa uri sip ombatno. Alo ari tidue elio soulu pula e dau Ida Tapolngon wade isak ine kovok e iye dong para ma tibauluk aitno lisak ke urok elio soulu. Iye para la lama Noa uri sip kodong. Iye uri sip kodong deka osep lumeklu vala tisep ke sip tonari. Tisep kodong deka ongon ombatno polou e isak lumeklu vala tidong itau ke sip.

²¹ Aki tonari nisngen ke aki ke elio paunimngen ina. E elio paunimngen ina nisngen ke elio ka Ida Tapolngon lua umu ke lumu elio epmes ina. E aki ke elio paunimngen ina langka ris tarna lumu kovok. Aurou. Ane langka pelengon ka umawai ke Ida Tapolngon ma umedidi iye ma umodong itau ke bitna. Ida Tapolngon due Yesus Krais poga tito ke ina denga e ke batne langane umodong itau ke bitna.

²² Yesus la ke omur heven kodong e iye dong ke Ida Tapolngon limla odung. Deka ensel e wan ansak ka urok arit dong lisak tini iye.