1 Pita 2 - Aria New Testament

Yesus dong langka opmu ka ina mosongon dong ine

¹ Umopolou Ida Tapolngon ila osep kodong deka umepli elio soulu bitna bitna. Elio langka umayak osep e umawai pelengon gesa e dau aitno lumu silang ine e aitno lumu rim e umodue adis e lumu pelengon mter osep aitno lisak.

² Langka mimi oku aling aling tiwaiki tinim sisu vala ngawaiki aitno lumu la ke Ida Tapolngon ila pelengon vala. E ila pelengon itau e wan sasi dong ine kovok. E pelengon tonari karanga lua umu ma umopolou ngongle ke aitno lumu ila dagar.

³ Umeile Ida Puda iye itau e iye due mada ke umu kodong.

⁴ Umopolou ke Ida Puda ka iye dong langka opmu ka ila mosongon dong ine. Osep pula tipli iye e dau Ida Tapolngon rere iye e vati iye langka wan ka itau lokono.

⁵ Umu blang umodong langka opmu ka urok mosongon dong ke isak ka Ida Tapolngon Ano Itau uri ila ninu ine. E umopolou osep loulou ina ka itau lokono e ke Yesus Krais angaine langka umodue elio opmu ina ke umu kenmu kenmu. Deka ma Ida Tapolngon aitno itau ine.

⁶ Oglou osep tisogo Ida Tapolngon ila pelengon ka wai langane. “Ngadue opmu ka due ninu nepir pulu dong ke omur Saion. E ngarere iye e iye itau itau lokono. E osep ka aitno lisak dagar ine ma iye due elio itau ke isak e didi ila pelengon dagar ka iye wai ine e isak mnak isak ine kovok.”

⁷ Deka umu ka aitno lumu dagar ke Krais umeile omur iye opmu ka itau lokono. Ida Tapolngon ila pelengon wai blang langane. “Osep ka osep ka tiuri ninu ninu tipli opmu are. E dau opmu are opmu mgongon ina ka due opmu leklou ka tiuri ninu ine tinepir pulu.”

⁸ E Ida Tapolngon ila pelengon silang blang wai langane. “Osep kamsak tinaplai ke opmu ane deka tigene ine.” Kamsak tinaplai e tigene kesua aitno lisak dagar ke Ida Tapolngon ila pelengon kovok. Agegeng ane langka oglou Ida Tapolngon wai ma polou ke isak.

⁹ E Ida Tapolngon rere umu ma umodong ila osep. E Ida Tapolngon ka vri mgo ke ite e plau ite rere umu ila osep loulou ina. E iye rere umu ila osua ka itau itau lokono. Iye rere umu ila osep kesua iye waiki umanapapra osep pula ke ila elio itau ka iye due. Iye gi umu ma umosongon lumu elio epmes ina e umesep ke ila bublongon ka itau lokono. Ila bublongon tonari itau itau lokono.

¹⁰ Oglou umodong Ida Tapolngon ila osep kovok e eknikane umu ila osep. Oglou Ida Tapolngon aitno due umu kovok e eknikane aitno due umu kodong.

Itodong Ida Tapolngon ila osep bokongon ina

¹¹ Sipmi ka ngong lana ngong ke umu. Umodong ke taklak ane langka osep kaulei e langka osep ka tilila ke omur omur deka ngawai dagar ke umu ma umopul dogur ke elio soulu ka pampamu lumu waiki umodue. Kesua aling aling elio soulu waiki mole umu.

¹² Umodong airavu ke osep epmes ina e ngawaiki umodue elio isuk isuk ka itau vala. Umodue elio itau vala e langka tisin elio soulu vri ke umu ma tivati lumu elio itau e ma tikakai Ida Tapolngon angaine tito la egim ke oklou ka iye ma me e wade osep ine.

¹³ Umeini osep gavman ina ka tiplau umu kesua elio ane didi Ida Puda aitno. Umeini gute ka vri mgo ke umu kesua iye plau osep ka tidong ke omur ka iye vri mgo ine.

¹⁴ E umeini osep ka tiplau omur emkil emkil kesua gute ka vri mgo ke omur rere osep ka tiplau omur emkil emkil. Ma tiules osep ka tidue elio soulu e tikakai osep ka tidue elio itau angainsak.

¹⁵ Ida Tapolngon waiki umodue elio ka itau e osuk. Umodue langane deka osep ka kaka tikaranga tiwai ulik ulik ke lumu elio kovok.

¹⁶ Umodong fri e dau ngawaiki aitno lumu mter langane kovok. Itodong fri e itakaranga itodue elio soulu bitna bitna ka itawaiki itodue. Aurou. E ngawaiki umodong Ida Tapolngon ila wokboi nating.

¹⁷ Umodue anit ke osep ka pula keniye. E umu lana umu ke osep ka aitno lisak dagar ke Ida Tapolngon. E umodue anit ke osep ka tivri mgo ke omur omur.

Ma itakana elio isuk isuk ka Krais due e itanamani elio soulu

¹⁸ Umu ka wokboi nating umeini osep ka tiplau umu e umodue anit ke isak. E umodue langane ke osep plaungan ka tidue elio itau e elio molil molil ke umu vala kovok. Aurou. Umodue langane ke osep plaungan ka urok elio soulu e tidue elio ka opru umu blang.

¹⁹ E Ida Tapolngon aitno itau ke gute ka didi iye e namani elio soulu ke osep plaungan langare. Deka Ida Tapolngon ma kere iye itau.

²⁰ E langka osep tiules umu batne ke elio soulu ka umodue deka umanamani ine e umodong dagar ine elio ane lua umu? Aurou. E langka umodue elio itau vala e dau osep tiules umu ine deka umanamani ine e umodong dagar ine elio ane due Ida Tapolngon aitno itau ke umu.

²¹ Ke oglou Krais namani agegeng ka osep tidue ke iye ma iye lua umu. E Ida Tapolngon rere umu ma umakana Krais ila elio itau tonari.

²² Iye due elio epmes ina gesa kovok e iye wai pelengon yakngan kovok.

²³ Alo ka osep tiwai soulu ke iye io iye koli urok pelengon ke pelengon soulu blang kovok. Alo ka osep tidue agegeng ke iye io iye dong vala e wai ma iye koli urok elio soulu kovok. Aurou. Aitno dagar ke Ida Tapolngon e iye ile Ida Tapolngon ma didi ila elio itau e wade osep ka pula keniye ine.

²⁴ Krais mana ke ina akai e mete e kasip amunte. E Ida Tapolngon due udo elio epmes ina munu pes Krais pampamu ine ma aitno lite oglou ina mete e itakaranga itodue elio itau e osuk vala. Osep timluk Krais e pampamu ine amal amal ma iye lua ite ma itopolou itau blang.

²⁵ Iye due elio langane kesua oglou umodong langka sipsip ka tilila ulik ulik vala. E eknikane iye due umu umeiding ke iye e iye polou lumu Gute Plaungan Ina e iye plau aitno lumu itau langka gute plaungan ina plau ila sipsip itau.