1 Pita 1 - Aria New Testament

¹ Ngong Pita ngong Yesus Krais ila aposel gesa. Ngasogo pas ane uti ke umu ka Ida Tapolngon ila osep ka umodong umadardar langka osep kaulei ke provins Pontus e provins Galesia e provins Kapadosia e provins Esia e provins Bitinia.

² Oglou ari Ida Tapolngon ka Pmada ile umu kodong e rere umu ila osep e Ano Itau lua umu ma umodong itau lokono ke Ida Tapolngon bitna. Iye due langane ma umeini Yesus Krais ka ina marau baser e kli lumu elio epmes ina. Ngawaiki Ida Tapolngon ila makaingan e elio ka iye due aitno lumu dong epen bon ke aitno lumu.

Mosongon itau dong para ke ite ke omur heven

³ Ma itakakai Ida Tapolngon ka iye Ida Puda Yesus Krais timla angaine tito la egim. Ida Tapolngon aitno due ite omba lokono. Deka iye due Yesus Krais poga tito ke ina denga e due ite itopolou oku langka mimi edimor. Elio ane due aitno lite dagar ma Ida Tapolngon kar ite ke wan ka iye wai ine kodong.

⁴ E itapara ke kerengen itau ka Ida Tapolngon due dong para ke ila osep. Kerengen tonari dong ke omur heven e karanga polou okus koke polou soulu koke polou yagos kovok. Aurou.

⁵ Aitno lumu dagar ke Ida Tapolngon deka iye plau umu ke ila arit. Iye waiki lua ite e elio ane ma polou malak alo ka Krais iding me.

⁶ Oklou aling aling aitno lumu neser ke elio tonari vala. Lama oku ane tokngon bitna bitna polou ke umu e aitno lumu kro ine isuk boto vala.

⁷ Tokngon bitna bitna tonari polou ke umu ma tok aitno lumu ila dagar langka iye wan lokono koke aurou. Iteile gol karanga polou yagos e dau langka osep tiwaiki tile gol tonari gol lokono tidue eiou ngene ma tile langka wan sasi dong ine koke aurou. E aitno lite ila dagar mole gol lokono deka tokngon tonari tok aitno lumu ila dagar. Deka ke oklou ka Yesus Krais iding me Ida Tapolngon ma kakai angainmu e due anit ke umu.

⁸ Lama oglou umavati Krais kovok dau umu lana umu ke iye. E oku ane lama umavati iye kovok aitno lumu la dagar ke iye. E umeketir omba ke ketirngen ka mole ketirngen ke taklak e umakaranga umawai pelengon ka wai ke ketirngen tonari kovok.

⁹ Aitno lumu neser langane kesua umeile Ida Tapolngon lua umu ke lumu elio epmes ina. Ke batne langane aitno lumu la dagar ke Krais.

¹⁰ Oglou osep napaprangan ina tiwai ke Ida Tapolngon ila luangan ka ma me ke umu. Tinana dagar ke Ida Tapolngon ila pelengon ma tikaranga tile omur ke batne ke elio ka Ida Tapolngon ma lua osep ka aitno lisak dagar ke iye.

¹¹ Ari Krais Ano Itau due aitno lisak deka nis isak ke elio ka mase Krais namani agegeng ka polou ke iye. Ano Itau nis osep napaprangan ina ke elio tonari deka tiwaiki tile omur lesen ma elio tonari polou lokono e elio itau lokono lange ma polou.

¹² Ida Tapolngon nis osep napaprangan ina tonari tiwai ke wan ka ma polou alo ka tidong kovok. Aurou. Tiwai ke wan ka mase ma polou ke umu alo ka tinapapra pelengon ka oku ane umoklingen ine. Mase Ida Tapolngon pagei Ano Itau duru ke omur heven e iye due osep aitno lisak deka tiwai omon itau ke umu. E ensel ka tidong ke omur heven tiwaiki tile omur ke wan tonari ka Ida Tapolngon due ke umu.

Ida Tapolngon waiki itodue elio itau vala

¹³ Ke batne langane ngawaiki umekere aitno lumu ma aitno lumu mter ke elio isuk isuk ka umodue e umaplau umu itau. Umu arit umu ma umapara ke kerengen ma umodue alo ka Yesus Krais me polou malak.

¹⁴ Umu Ida Tapolngon titno deka ma umeini ila pelengon vala. Oglou aitno lumu kaka e umedidi elio bitna bitna ka taklak ane ina e eknikane umedidi elio tonari sakam.

¹⁵ Iteile Ida Tapolngon ka rere ite ila osep iye itau itau lokono e ngawaiki umodong itau itau lokono ke wan ka pula keniye ka umodue.

¹⁶ Kesua Ida Tapolngon ila pelengon wai langane. “Ngadong itau itau lokono vala e ma umodong itau itau lokono vala blang.”

Ida Tapolngon kli ite ke klingen omba

¹⁷ Alo ka umawai itau ke Ida Tapolngon umesir iye Pmada. E Ida Tapolngon didi elio kene vala e wade ite kente kente udo elio isuk isuk ka itodue. Deka alo ka umu dau umodong ke taklak ane umodong langka osep kaulei e umodue anit ke Ida Tapolngon ke wan ka pula keniye ka umodue.

¹⁸ Umeile kodong oglou umedidi elio ka adai vala ka lumu seia tidue blang. E Ida Tapolngon kli umu ke elio tonari. Iye kli umu ke wan langka silva e gol ka karanga polou yagos kovok.

¹⁹ Aurou. Iye kli umu ke Krais ina marau ka wan ka itau lokono. E Krais iye langka sipsip otno ka itau itau lokono e egle e wan soulu silang dong ke iye kovok.

²⁰ Oglou alo ka Ida Tapolngon dau tapol wan gesa kovok iye rere Krais ma iye polou Ida Luangan. Deka ke taim ane alo ka wan ka pula keniye isuk boto yagos Ida Tapolngon due Krais polou malak.

²¹ Deka aitno lumu dagar ke Ida Tapolngon batne ke Krais. Oglou alo ka Krais mete Ida Tapolngon due poga tito ke ina denga deka iye kakai Krais tito la egim. Iye due langane deka aitno lumu dagar ke Krais e umapara ma iye didi ila pelengon ka iye wai ine kodong.

Ite lana ite ke sudo

²² Umedidi pelengon ka lokono e Ida Tapolngon due lumu elio epmes ina noklok la deka umodong itau lokono. E aitno lumu omba e umu lana umu lokono ke Ida Tapolngon ila osua. E ngawaiki umu lana umu omba ke isak.

²³ Umopolou osep oku ina langka mimi edimor batne ke Ida Tapolngon ila pelengon ka umoklingen ine. Ngawai pelengon ano langane. Langka osep tiser wit londo ke yage io londo tonari karanga polou okus. E Ida Tapolngon ila pelengon langka londo ka karanga polou okus kovok. Aurou. E mosongon dong ine e ina yagosngon kovok.

²⁴ Ida Tapolngon ila pelengon wai langane. “Osep ka pula keniye isak langka gras e wan ka tikakai angainsak ine langka plaua. Gras tonari polou kakrak e plaua gene duru ke taklak.

²⁵ E Ida Puda ila pelengon dong vala dong.” Pelengon ane omon itau ka osep tinapapra ke umu.